| e-texts navigator |
| Wylie |
65a1 འཇིག་རྟེན་འདས་པའི་ཆོས་རྣམས་སྟོན།། དེ་ལ་བདག་གིས་ཇི་ལྟར་བགྱི།། བཅོམ་ལྡན་འདས་ཀྱིས་བཀའ་སྩལ་པ།། གཟུགས་ངན་ཁོང་ཁྲོ་མི་བསྐྱེད་ཅིང་།། གཟུགས་བཟང་འདོད་པར་མི་བྱ་སྟེ།། དེ་ལ་ལུས་ཀྱི
65a2 རྒྱབ་ཏུ་བསྟར། ། ལན་བྱེད་དཔའ་བོ་མཁའ་འགྲོ་ཡི།། དངོས་གྲུབ་སྤྲུལ་པ་ཡིན་པར་ངེས།། བརྟུལ་ཞུགས་ཅན་གྱིས་དངོས་གྲུབ་བླང་།། ལན་མེད་བདུད་ཀྱི་བར་ཆད་དེ།། བདུད་བསལ་བ་ཡི་ཆོ་ག་བརྩམ།། ཀུན་ལ
65a3 མཁས་པས་སྦྱོར་བར་བྱ། ། སྒྲ་སྙན་འདོད་པ་མི་བསྐྱེད་ཅིང་།། འཇིགས་པའི་སྒྲ་ལ་ཁོང་མི་ཁྲོ།། དེ་ལ་གཏང་སྙོམས་སེམས་བྱ་སྟེ།། རྡོ་རྗེ་ཀླུ་ཡིས་བརྟག་པར་བྱ།། དེ་བཞིན་དྲི་བཟང་མི་ཆགས་ཤིང་།། དྲི་ངན་ཁོང་ཁྲོ་མི་བྱ་བར།།
65a4 མཉམ་པར་དམིགས་ལ་བརྟག་པར་བྱ།། དྲི་ཡི་ཕྱག་རྒྱ་དེ་ལ་བསྟན།། ལན་བྱེད་མཁའ་འགྲོའི་སྤྲུལ་པ་སྟེ།། ལན་མེད་བདུད་ཀྱི་སྤྲུལ་པའོ།། རོ་བཟང་བཟའ་བར་མི་བྱ་ཞིང་།། རོ་ངན་དོར་བར་མི་བྱའོ།། མཉམ་པར་བཞག
65a5 ལ་བརྟག་པར་བྱ། ། དེ་ལ་རོ་ཡི་ཕྱག་རྒྱ་བསྟན།། དེ་བཞིན་བྱེ་བྲག་ཤེས་པར་བྱ།། དེ་བཞིན་ཆོས་ལ་ཆོས་ཕྱག་རྒྱ།། བརྟགས་ཏེ་བདུད་རྣམས་བསལ་བར་བྱ།། ལུས་ལ་བྱུང་བའི་བདུད་རྣམས་ཀྱང་།། ཁ་དོག་དབྱིབས་ལ
65a6 ཤེས་པར་བྱ། ། དང་པོ་དངོས་གྲུབ་བླང་བ་ཡང་།། མིག་གིས་གཟུགས་ལ་རྣ་བས་སྒྲ།། སྣ་ཡིས་དྲི་དང་ལྕེ་ཡིས་རོ།། ལུས་ཀྱི་རེག་དང་ཡིད་ཀྱིས་ཆོས།། བརྟུལ་ཞུགས་ཅན་གྱི་དངོས་གྲུབ་བླང་།། དེ་ནས་བདུད་ནི་བསལ
65a7 བྱ་སྟེ། ། ཡང་ན་སྟོང་པའི་རྫོང་ལ་གནས།། ཡང་ན་ཕྲིན་ལས་བཞི་ཡིས་བསལ།། ཆུ་ཡི་བདེ་བ་འཇམ་སོགས་པས།། ནང་གི་བདུད་ནི་བསལ་བའོ།། པད་མཁྲིས་སྟེང་སྒོ་འདུས་པའི་བར།། རླུང་ཅན་མགོ་ཡི་སྒོ་རུ་སྟེ།། རྒྱུད
65a8 འདི་གཏད་ཀྱིས་ལེགས་པར་ཟུང་། ། དེ་ལྟར་བྱས་ན་དངོས་གྲུབ་ཐོབ།། དཔལ་མཁའ་འགྲོ་མ་གསང་བ་འབར་བའི་རྒྱུད་ཀྱི་རྒྱལ་པོ་རྫོགས་སྷོ།། ། རྒྱ་གར་གྱི་མཁན་པོ་གཱ་ཡ་དྷ་ར་དང་། བོད་ཀྱི་ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།།
iiif viewer powered by OpenSeadragon
