| e-texts navigator |
| Wylie |
94b1 ཕྱེ་མ་ཆུ་ཚགས་ནང་ནས་དབྱུང་། །ཕྱེ་མའི་མཆོག་ཏུ་གྱུར་པ་དང་། །ཕྱེ་མའི་རྒྱལ་མོ་དེ་དག་ནི། །བསེ་ཕོར་ཁ་སྦྱར་ནང་དུ་བླུགས། །རྒྱས་བཏབ་བྱིན་རླབས་དབང་བསྐུར་ནས། །བཟླས་བརྗོད་འཕྲོ་འདུ་རྒྱུན་མི་ཆད། །སྦྲང་ཆང་རྒྱ་ཆང་བུ་རམ་ཆང་། །
94b2 རྒུན་ཆང་འོ་མ་ལ་སོགས་པ། །བཅུད་ཀྱི་ཁུ་བ་ཐམས་ཅད་སྦྱར། །རིན་ཆེན་གའུ་མཚན་ལྡན་དུ། །བླུགས་ཏེ་ཁ་སྦྱར་རྒྱས་བཏབ་ནས། །འཕྲོ་འདུ་བཟླས་བརྗོད་གོང་མ་བཞིན། །བྱས་ཏེ་མཚན་མ་བྱུང་བ་དང་། །དངོས་གྲུབ་ཆེན་པོ
94b3 བླང་བར་བྱ། །ཕྱེ་མའི་བསྒྲུབ་རྫས་དེ་དག་ནི། །ཆ་ལྔ་དག་ཏུ་བགོས་ནས་ཀྱང་། །རྣལ་འབྱོར་སོ་སོའི་ཆ་རྣམས་ལས། །ཅི་རན་ཙམ་གྱིས་ཆ་གཅིག་དང་། །སྦྱར་ཆང་ཆ་ལྔར་བགོས་པ་ནས། །རྣལ་འབྱོར་སོ་སོའི་ཆ་རྣམས་ལས། །སྦྱར་ཏེ་དངོས་གྲུབ་རྟེན་དུ་བྱ། །ཟླ་བ་གཅིག་ཏུ
94b4 ཟོས་པས་ནི། །བ་སྤུ་རངས་ཤིང་གཉེར་མ་རངས། །ཟླ་བ་གཉིས་སུ་ཟོས་བྱས་ན། །གཟི་མདངས་ཐམས་ཅད་འབར་བར་འགྱུར། །ཟླ་བ་གསུམ་གྱི་ཕན་ཡོན་གྱིས། །ནད་ཀྱི་བསྐལ་པ་དག་ལས་ཐར། །ཟླ་བཞི་ཕན་ཆད་གང་ཟག་གི། ཟས་དང་མ་འདྲེས་བརྩོན་བསྒྲུབས་ན། །
94b5 གཞན་གྱི་ནད་རྣམས་འཇོམས་པར་ནུས། །དྲུག་དང་བདུན་དང་བརྒྱད་རྣམས་ལ། །བདུད་རྩི་བཅུད་ཀྱིས་འཚོ་བར་འགྱུར། །དགུ་དང་བཅུ་ལ་ཟག་པ་ཟད། །བཅུ་གཅིག་རིག་འཛིན་ནམ་མཁར་འཕུར་ཞེས་གསུངས་སོ། །བདུད་རྩི་སྐྱོ་མའི
94b6 བསྒྲུབ་པ་རྣམ་པར་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །རྡོ་རྗེ་རིག་འཛིན་རྩལ་ལྔའི་ཟས། །འདེ་གུའི་ཆོ་ག་ཆེན་པོ་ནི། །འདི་ལྟར་ཁོང་དུ་ཆུད་པར་བྱ། །སྦྲང་རྩི་བུ
94b7 རམ་རྒུན་འབྲུམ་རྣམས། །ལོ་ཡི་འཚོ་བར་སྦྱར་ནས་ཀྱང་། ཁ་དོག་མཚན་ལྡན་དམར་པོའི་བ། །ལོ་ཡིས་འཚོ་བར་གཟུང་ཞིང་བསྲེལ། །སྨན་གྱི་རྒྱལ་མོ་རབ་མཉེ་བས། །རྒྱུན་དུ་གསོས་པའི་འོ་མ་དེ། །རིག་འཛིན་ཟས་ཀྱི་མཆོག་ཏུ་འགྱུར། །
94b8 བདུད་རྩི་རྒྱལ་མོ་རབ་མཉེ་བ། །ཕྱེ་མའི་མཆོག་ཏུ་བྱས་ནས་ཀྱང་། །ལོ་ཡི་འཚོ་བའི་སྦྱར་བྱས་ཏེ། །སུས་མི་མཐོང་བའི་ས་ཕྱོགས་སུ། །བསྒྲུབ་རྫས་དེ་དག་བཀྲམ་ནས་ཀྱང་། །བདུད་རྩི་བསྒྲུབ་པ་དེ་བཞིན་བྱ། །དུས་ལ་བབ་པའི་ཚོད་རྣམས་ལ། །
iiif viewer powered by OpenSeadragon