| e-texts navigator |
| Wylie |
93b1 དབུས་སུ་གསེར་ཕོར་སུལ་མེད་ལ། །དུང་ཆེན་འཁོར་བ་ཅན་གྱིས་སྦྱར། །ཤར་དུ་ཤེལ་ཕོར་སུལ་འགྲེང་ལ། །རིན་ཆེན་མཛོད་སྤུ་གསལ་བར་སྦྱར། །ལྷོ་རུ་རིན་ཆེན་སུལ་མངས་ལ། །རིན་ཆེན་ལོ་འདབ་རྒྱས་པས་སྦྱར། །ནུབ་ཏུ་རྒྱ་ཕོར་ཟླ་གམ་ལ། །
93b2 བཞིན་མཚམས་རིན་ཆེན་འབུར་གཉིས་སྦྱར། །བྱང་དུ་བསེ་ཕོར་རྒྱ་གྲམ་ལ། །གཙུག་ཏོར་རིན་ཆེན་འབུར་བཞི་རྒྱས། །རྩ་བ་ལྔ་ནི་ཕྱོགས་ཕྱོགས་སྦྱར། །སྒོ་ལྔའི་གཙོ་བོ་རིགས་སུ་སྦྱར། །དབུས་ནས་ཤར་ལྷོ་ནུབ་བྱང་དུ། །ཀ་ཀོ་ལ་དང་དུ་རུ་ཀ་།
93b3 ཛ་ཏི་ཕ་ལ་ཁ་དྲི་ཞིམ། །ལྕེ་པོག་དཀར་ཞེས་རིམ་པར་སྦྱར། །དེ་བཞིན་གོང་གི་རིམ་པ་བཞིན། ། རུ་ར་དང་ག་ཕུར་དང་། །གུར་ཀུམ་པདྨ་ལི་ག་ཏུར། །དེ་ན་རཱ་ས་ཡཱ་ན་རྣམས། །ཐམས་ཅད་རིགས་དང་ཁ་དོག་དང་། །ལས་དང་འཐུན་པར་སྦྱར་བར་བྱ། །
93b4 ས་བོན་ལྔ་ནི་རིམ་པར་སྦྱར། །དཔལ་དང་ལྡན་པའི་སྣོད་ནང་དུ། །ཡབ་ཡུམ་སྙིང་པོ་རིམ་བཞིན་བྱ། །དབུས་དང་པད་མ་ལྕེ་ལ་དགོད། །གནས་ཡུལ་ལ་སོགས་མཛེས་པར་གཞག་།དུར་ཁྲོད་རྫས་དང་བཀྲ་ཤིས་རྫས། །འབྱོར་པའི་ཡོ་བྱད
93b5 ཐམས་ཅད་བཤམ། །དེ་ནས་བྱིན་ཕབ་དངོས་གྲུབ་གསོལ། །ཐམས་ཅད་རྣམ་པར་སྦྱར་བར་བྱ། །དམ་པ་དེ་ཉིད་གསང་ཆེན་གྱི། །རིགས་བརྒྱ་རིགས་ལྔ་རིགས་གཅིག་གིས། །ཐམས་ཅད་སྦྱང་བའི་མཆོག་ཏུ་བྱ། །དེ་ནས་ཁྲོལ་བུ
93b6 སྦྱང་བ་ན། །བསལ་བསྔོ་བསྡུ་དང་དབྱེ་བ་དང་། །ཁྲུས་བྱ་བ་དང་བཤགས་པ་དང་། །ཡོན་ཏན་བརྗོད་དང་བྱིན་དབབ་བྱ། །དེ་ནས་སྐད་ཅིག་ཐང་ཅིག་གམ། །ཞག་གཅིག་དག་གིས་སྦྱར་བར་བྱ། །རྟགས་དག་བྱུང་ན་དེར་འབྱོངས་པའོ། །
93b7 ཕྱེ་མའི་མཆོག་ཏུ་སྦྱར་བ་ནི། །སྣོད་ཀྱི་སྨན་རྣམས་ཤེས་རབ་མས། །བསྡུས་ཏེ་བཏག་པའི་ཆོ་ག་ཡང་། །ཡུམ་གྱིས་བཟུང་ཞིང་ཡབ་ཀྱིས་བཏག་།རིག་འཛིན་རྩལ་ཅན་དབབ་ཅིང་དྲང་། །སོ་སོ་ལས་ཀྱི་སྔགས་བརྗོད་ཅིང་། །གཏན་གཏུན་ཐབས
93b8 དང་ཤེས་རབ་སྟེ། །སྨན་ཉིད་བྱང་ཆུབ་སེམས་སུ་སྦྱར། །རྡོ་རྗེ་གླུ་འདི་ལྷ་མོས་བླང་། །ཀུན་ཏུ་བཟང་མོའི་གཞལ་ཡས་སུ། །ཐབས་དང་ཤེས་རབ་ལྡན་པ་ལས། །འཁོར་བ་བདུད་རྩི་སྨན་དུ་སྦྱར། །ཡེ་ཤེས་ལྔ་རུ་གསལ་པ་ལས། །འབྲས་བུ་སྐུ་གསུང་ཐུགས་སུ་རྫོགས། །
iiif viewer powered by OpenSeadragon