| e-texts navigator |
| Wylie |
93a1 མ་ཏྲང་ཁོག་པའི་སྙིང་ག་རུ། །འདོམ་གང་ཚད་དང་འཐུན་པ་ལ། །རྩིབས་བརྒྱད་འབར་བའི་འཁོར་ལོར་གདབ། །མེ་ཡི་འོད་ཀྱིས་བསྐོར་བར་བྱ། །རྡོ་རྗེ་ར་བས་བསྐོར་བ་ཡི། །མཐའ་མ་སྒོ་ཁྱུད་འབར་བར་བྱ། །དབུས་སུ་རིན་ཆེན་ཟུར
93a2 བརྒྱད་བྱ། །དེར་ནི་ཕྱག་རྒྱ་འབར་བ་དགོད། །ལང་ཀ་བསྒྲལ་བའི་གནས་མཆོག་འདིར། །རལ་པ་ཅན་གྱི་ཚོགས་འདུས་ཏེ། །རཱཀྵ་འཇོམས་པའི་མཐུ་ཆེན་ཀུན། །སྲིད་པ་གསུམ་རིལ་འདིར་སྒྲོལ་བའོ། །དུས་བཞི་མཆོད་པའི་དམ་རྫས་ཀྱིས། །
93a3 དེ་དག་ཇི་ལྟར་རིགས་པར་མཆོད། །དུས་བཞི་བཅུད་སྨིན་སྙིང་པོ་ཡིས། །དངོས་གྲུབ་ཆེན་པོའི་རྫས་སུ་བྱ། །ཕྱོགས་བཞི་དབུས་ཀྱི་རྫས་ཆེན་རྣམས། །རྨད་དུ་བྱུང་བའི་རལ་པ་ཅན། །འབྱུང་བ་ལྔ་ལ་དབང་སྒྱུར་མཛད། །འབྱུང་བ་ལྔ་ཡི་ཆོ
93a4 འཕྲུལ་སྒྲུབ། །དབྱར་ཆུ་སྟོན་མེ་དགུན་ས་སྟེ། །དབྱིད་རླུང་ནམ་མཁའ་གསང་བར་སྦྱར། །ཆོ་འཕྲུལ་དེ་ལ་དབང་ཐོབ་ནས། །དེ་དག་རལ་པ་ཅན་དུ་བསྒྲུབ། །ཏིང་འཛིན་རྣམ་པ་ལྔ་གསལ་བས། །འབྱུང་ལྔ་ལས་བྱུང་ཤ་རིགས
93a5 ལྔ། །ཁྱི་ཤ་བ་ལང་རྟ་ཤ་དང་། །བྱ་དང་རི་དགས་སྣ་ཚོགས་ནི། །རྫུ་འཕྲུལ་ཤུགས་སུ་སྒྲུབ་པའི་རྫས། །སྒྲུབ་པའི་རྫས་ཆེན་འབྱུང་ཆེན་ལྔ། །འཇིག་རྟེན་ཀུན་ལ་དབང་སྒྱུར་བའི། །དེ་ལྟར་རྫས་རྣམས་འབྱོར་པ་དང་། །ཏིང་འཛིན
93a6 བསྒོམ་དང་བསྒྲུབ་པ་དང་། །ཐམས་ཅད་གོང་དང་འཐུན་སྦྱར་ནས། །འཇུག་དང་དངོས་གྲུབ་དབང་ཆེན་རྣམས། །ཅི་རིགས་པར་ནི་བདེ་བར་སྦྱར་ཞེས་གསུངས་སོ། །བདུད་རྩི་རང་བྱུང་དཀྱིལ་འཁོར་ཞེས་བྱ་བའི་མདོ་བཤད་པའོ། །དེ་ནས་ཡང
93a7 སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །གཞན་ཡང་བདུད་རྩི་ཆེན་པོ་ནི། །གོང་མ་བཞིན་དུ་ལེགས་སྦྱར་ནས། །མཎ་ཌལ་ཚད་དང་འཐུན་པ་ལ། །པད་མ་དམར་པོ་འོད་ཀྱི་མཁའ། །
93a8 ཕྱི་རིམ་ཟླ་གམ་དམར་པོ་བཞི། །རྡོ་རྗེ་འབར་བས་མཛེས་པར་བསྐོར། །མེ་ལྕེ་འབར་བའི་ཕྲེང་བ་ནི། །ཟླ་གམ་མཐའ་ཟད་བྲི་བར་བྱ། །རིན་ཆེན་གེ་སར་ཕྲེང་བས་ནི། །པད་མའི་ལྕེ་ལ་བསྐོར་བར་བྱ། །སྒོ་བཞི་རིན་ཆེན་འབར་བས་བྱ། །ཕྱག་རྒྱ་འབར་བའི་ལྷ་བཀོད་ན། །
iiif viewer powered by OpenSeadragon