| e-texts navigator |
| Wylie |
92b1 བྱའོ། །བུད་མེད་ཆགས་པའི་རང་བཞིན་ཏེ། །ཆགས་པ་ཁྲག་གི་རྒྱ་མཚོ་ཡིན། །ལས་ཀྱིས་འཁོར་བའི་སེམས་ཅན་རྣམས། །ཆགས་པ་ཁྲག་གི་རྒྱ་མཚོར་བྱིང་། །ཆགས་ལས་རྣམ་གྲོལ་འགོག་པ་སྟེ། །ཆགས
92b2 པ་དེ་ཉིད་ཁྲག་ཅེས་བྱ། །ཁྲག་གི་རྒྱ་མཚོ་བསྐམ་པའི་ཕྱིར། །བུད་མེད་ཁྲག་གི་རྒྱ་མཚོ་རྣམས། །འཚོ་བ་བདུད་རྩིའི་རྒྱ་མཚོར་བསྒྱུར། །དེ་ལྟར་ཤེས་པར་གྱུར་པ་དང་། །ཀུན་རྫོབ་ཚུལ་དུ་འདི་ལྟར་སྦྱར། །ལས་ཀྱི་བརྩམས་པ
92b3 ཕུན་སུམ་ཚོགས། །རིམ་པ་བཞིན་དུ་བརྩམས་ནས་ཀྱང་། །མཎྜལ་འདོམ་གང་གྲུ་བཞི་ལ། །འཁོར་ལོ་བཞི་ཡི་ཐིག་ཏུ་གདབ། །མུ་ཁྱུད་ཕྱི་རིམ་གྲུ་ཆད་བཞི། །དེ་ནས་སྒོ་ཁྱམས་དམར་པོར་བྱ། །ཀུན་གྱི་ཕྱི་རིམ
92b4 ལག་ཆུ་ཧྭའི། །མེ་རི་འབར་བས་གཏིབ་ཐག་གཅད། །དབུས་སུ་ཤར་ལྟ་ཟླ་གམ་བྲི། །བནྡྷ་དཔལ་ལྡན་ཡབ་ཡུམ་དགོད། །འཁོར་ལོ་བཞི་ལ་རིགས་བཞིར་ལྡན། །བར་ཁྱམས་གཉིས་ལ་གནས་ཡུལ་རྣམས། །
92b5 ཟླ་གམ་ཐིག་ལེར་ལྡན་པར་བྱ། །སྒོ་ཁྱམས་སྒོ་བཞི་ཟླ་གམ་བཅས། །ཕྱི་ཁྱམས་ལག་ཆུ་ཧྭ་ཡི་མེ། །མེ་ཡི་ཁྲོ་བོ་ཐིག་ལེར་བཅས། །དུར་ཁྲོད་རྒྱན་གྱིས་ཀུན་བརྒྱན་བྱ། །ཏིང་འཛིན་རྫོགས་དང་དངོས་བསྒྲུབ་དང་། །འཇུག
92b6 པ་དབང་བསྐུར་དངོས་གྲུབ་རྣམས། །གནས་བསྲུང་ལ་སོགས་རྫོགས་པར་བྱ། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་འཁོར་ལོ་དབང་སྒྱུར་གྱི་སྒྲུབ་ལུགས་ཀྱི་ལེའུ་སྟེ་ཉི་ཤུ་རྩ་གསུམ་པའོ།། །།
92b7 དེ་ནས་སེམས་དཔའི་རྡོ་རྗེ་དམ་པ་དེས་འདི་སྐད་ཅེས་བཀའ་སྩལ་ཏོ། །འདུས་པ་ཆེན་པོའི་ཚོགས་ཆོས་ཐམས་ཅད་ནི་བདུད་རྩི་སྨན་གྱི་རང་བཞིན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་སྣང་བའི་ཆོས་ཐམས་ཅད་ཀྱི་དོན་རྟོགས་ན་ནི་འཚོ་བ
92b8 ཆོས་ཉིད་ཀྱི་རྩི་ཡིན། མ་རྟོགས་ནས་ནི་འཆི་བ་འཁོར་བའི་དུག་ཡིན། དེ་བས་ན་ཆོས་འདི་དག་ཐམས་ཅད་བདུད་རྩིའི་རང་བཞིན་དུ་ཤེས་པར་བྱའོ། །དེ་ལྟར་ཤེས་ནས་ཀུན་རྫོབ་ཏུ་འདི་ལྟར་བསྒྲུབ་པར་བྱའོ། །ཇི་བཞིན་འབྱུང་ལྡན་བདེ་སྦྱར་ནས། །
iiif viewer powered by OpenSeadragon