| e-texts navigator |
| Wylie |
91a1 བདེ་ཆེན་མཆོད་པའི་ཚོགས་ཆེན་དག་།རོ་མཆོག་ལྔ་དང་མཉམ་སྦྱར་བས། །ཆོས་ཀྱི་ལོངས་སྤྱོད་རྒྱས་པར་སྦྱར། །མཉམ་ཉིད་བདེ་བའི་སྙིང་རྗེ་ཡིས། །དྲེགས་པ་ཆེན་པོ་གཞོམ་པ་དང་། །འཁོར་བའི་དྲ་བ་གཅད
91a2 པའི་ཕྱིར། །ཁྲོ་ཚེགས་འབར་བའི་སྤྲིན་འཕྲོས་པས། །གཏུམ་ཐུང་རྔམ་པ་མགྱོགས་པའི་ཚོགས། །ཕྱག་བརྙན་ཆར་ཆེན་ཕབ་ནས་ནི། །འཁོར་བའི་ཐ་བ་སྤངས་ནས་ནི། །བདེ་བ་ཆེན་པོའི་ཞིང་བཟློག་སྟེ། །བྱང་ཆུབ་མྱུ་གུ
91a3 བསྐྱེད་ནས་ནི། །བྱང་ཆུབ་སེམས་དཔའི་ལོ་ཏོག་བསྐྱེད། །དུར་ཁྲོད་ཆེན་པོའི་བཞིན་ཕྱོགས་ནི། །མགོ་ནི་ལྷོ་ནུབ་མཚམས་སུ་བཏིང་། །རྐང་པ་བྱང་ཤར་མཚམས་སུ་བཏིང་། །ང་ནི་དུར་ཁྲོད་དབང་ཕྱུག་ཆེ། །སངས་རྒྱས་སྐུ་སྟེ་ཡེ་ཤེས་ཡིན། །
91a4 ཐུགས་རྗེ་རྣོན་པོའི་དམག་ཚོགས་ལ། །ཡེ་ཤེས་རྣོན་པོའི་མཚོན་ཆ་ཡིས། །ལོག་རྟོག་འཁོར་བའི་རྒྱུན་བཅད་དོ། །གྲུ་བཞི་ཁ་བཞིར་རྡོ་རྗེ་ཡི། །དབྱིབས་འདྲའི་ཐབ་ནི་བརྩིགས་ནས་ཀྱང་། །སྙིང་གར་འཁོར་ལོའི་ཐབ་ཏུ་བྱ། །རིགས་ཀྱི
91a5 ཡམ་ཤིང་ལྔ་བརྩིགས་ཏེ། །ཧོམ་ལྔ་འབྲེལ་པའི་ལས་ཆེན་བརྩིག་།ཐབ་ཆེན་ལྔ་ཡི་ཧོམ་ཁུང་དུ། །འཁོར་བའི་སྡུག་བསྔལ་ཡམ་ཤིང་ལ། །ཡེ་ཤེས་ཆེན་པོའི་མེ་ཀློང་དུ། །ཉོན་མོངས་ལྔ་ཡི་བསྲེགས་སྦྱངས་རྫོགས། །
91a6 བྱ་བར་སྦྱོར་བ་མཐའ་དག་ཀུན། །ཇི་ལྟར་འབྱོར་ཅིང་འཚམ་པར་འོས་ཞེས་གསུངས་སོ།། །།རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་དྲེགས་པ་ཅན་གནོན
91a7 པ་ཞེས་བྱ་བའི་ལེའུ་སྟེ། ཉི་ཤུ་པའོ།། །། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་འཁོར་བའི་རྒྱ་མཚོ་ཟད་པར་བྱེད་པའི་ཞལ་གྱི་དཀྱིལ་འཁོར
91a8 ཞེས་བྱ་བ་བསྒྲུབ་པའི་དོན་འདི་ནི་འདི་ལྟར་རིག་པར་བྱའོ། །འདི་ཡང་དེ་འདྲར་ཀུན་སྦྱར་ནས། །འཁོར་ཁང་ཅན་གྱི་གཞལ་ཡས་སུ། །ཁྲུ་གང་གྲུ་བཞིའི་ཚད་དེ་ལ། །བཞི་ནི་འཁོར་ཁང་ཁྱམས་དེ་དག་།ཕྱོགས་བཞི་དག་ཏུ་བརྩམ་པར
iiif viewer powered by OpenSeadragon