| e-texts navigator |
| Wylie |
88b1 ཕྱི་ཡི་ཁྲུས་རྣམས་བྱས་ནས་ནི། །ཤར་དུ་ཁ་བསྟན་དབུས་སུ་གཞག་།ལྕེ་ལ་གཟུངས་ཐག་སྣ་ལྔས་གདགས། །རྣལ་འབྱོར་རྣམས་ཀྱིས་བསྐོར་བར་བྱ། །ཕྱག་རྒྱ་རྫས་དང་བཅས་པར་དགྲམ། །དེ་ཡི་ཁོང་དུ་གཞལ་ཡས
88b2 བསྐྱེད། །རིམ་པར་བརྩེགས་པའི་དཀྱིལ་འཁོར་ནི། །འབར་བའི་འབྱུང་ཆེན་འབར་བ་ལྔ། །དོན་གྱི་ལྷ་མོ་ལྔ་རུ་གསལ། །ཀུན་གཞི་ཀུན་ཏུ་བཟང་མོར་གསལ། །དེ་ཡི་ཐུགས་ཀྱི་ཁོང་ཐག་ཏུ། །ཐིག་ལེ་ཟླ་བ་ཉ་རྒྱས་ལ། །
88b3 ཡེ་ཤེས་སེམས་དཔའ་ཚོན་གང་པ། །ཐུགས་ཀར་ནོར་བུ་རིན་ཆེན་འབར། །དབུས་སུ་ཉི་མའི་གའུ་ལ། །དཔལ་བེའུ་ཡུངས་འབྲུའི་བུམ་པ་ལ། །ཧཱུ~ཾ་དམར་ཏིལ་འབྲུར་གནས་པ་ནི། །བདེ་ཆེན་བྱང་ཆུབ་སེམས་ཤེས་བྱ། །
88b4 རྡོ་རྗེ་གསང་ཐག་རྒྱུན་མི་གཅད། །རྡོ་རྗེ་ཁ་བྲ་གདབ་པར་བྱ། །དེ་ནས་མཚན་མ་བྱུང་གྱུར་ན། །དངོས་གྲུབ་བླངས་ཏེ་དེ་བསྒྲལ་ལ། །བསྐམས་ཏེ་བདུད་རྩི་རྩ་བར་བྱ། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ
88b5 བཀོད་པ་ཀུན་འདུས་རིག་པའི་མདོ་ལས་མཆོག་ཕྲན་ཐབས་ཀྱི་བསྒྲུབ་ལུགས་ཀྱི་ལེའུ་སྟེ། བཅུ་བདུན་པའོ།། །། དེ་ནས་ཡང་སེམས་དཔའི་རྡོ་རྗེ་དེས་འདི
88b6 སྐད་ཅེས་གསུངས་སོ། །འདུས་པ་ཆེན་པོའི་ཚོགས་ཐམས་ཅད་ནི་སྒྱུ་མའི་རང་བཞིན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། སྒྱུ་མ་ནི་དངོས་པོར་སྣང་ཡང་རང་བཞིན་མེད་པ་ཡིན་ཏེ། རང་བཞིན་མེད་པའི་དོན་ནི་ཆོས་ཉིད་རྡོ་རྗེ་ཡིན་ནོ། །དེ་བས
88b7 ན་སྒྱུ་མའི་ཆོས་ཐམས་ཅད་ཁོང་དུ་ཆུད་པར་བྱའོ། །དེ་ནས་འཁོར་དེར་འདུས་པར་གྱུར་པའི་ལྷ་མ་ཡིན་གྱི་ཚོགས་བདག་སྒྱུ་མ་མཁན་ཞེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱི་དམ་ཚིག་ནི་སྒྱུ་མའི་ཆོ་འཕྲུལ་གནས་ཤིང
88b8 སྒྱུ་མ་ཆེད་དུ་བགྱིད་ལགས་ཀྱིས་བདག་ཅག་རྣམས་ཀྱི་དོན་ཆེད་དུ་སྒྱུ་མའི་ཆོས་ཐམས་ཅད་བཤད་དུ་གསོལ་ཞེས་གསོལ་པ་ལས། བཅོམ་ལྡན་འདས་ཀྱིས་བཀའ་སྩལ་པ། ཚོགས་བདག་ཆེན་པོ་སྒྱུ་མའི་ཆོ་འཕྲུལ་ནི་འདི་ལྟར་རིག་པར་བྱའོ། །ཆོས་རྣམས་ཐམས་ཅད
iiif viewer powered by OpenSeadragon