| e-texts navigator |
| Wylie |
86b1 གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྨད་བྱུང་རྫས་ཀྱི་ལེའུ་སྟེ་བཅུ་བཞི་པའོ།། །། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས
86b2 པ་ཆེན་པོའི་ཚོགས་ཆོས་ཐམས་ཅད་ནི་མངོན་སུམ་དུ་ཤེས་ཤིང་རིག་པར་བྱའོ། །མངོན་སུམ་གང་ཞེ་ན། དྲན་པ་མངོན་དུ་བཞག་པའི་ཡུལ་ལ་མི་གནས་པའི་ཆོས་ཐམས་ཅད་དང་། ཕྱིས་འབྱུང་བའི་ཆོས་ཐམས་ཅད་དང་།
86b3 སྔོན་དུ་བྱུང་བའི་ཆོས་ཐམས་ཅད་མངོན་སུམ་མར་རིག་པའོ། །དེ་ཅིའི་ཕྱིར་ཞེ་ན། མངོན་སུམ་མར་ཤེས་པ་ནི་ཡེ་ཤེས་ཆེན་པོའི་རྒྱུ་ཡིན་པའི་ཕྱིར་རོ། །དེ་ཡང་ཇི་ལྟ་ཞེ་ན། ཆོས་ཐམས་ཅད་སྒྱུ་མའི་རང་བཞིན་དུ་དྲན་པ་མངོན་དུ
86b4 བཞག་ན་མངོན་དུ་གྱུར་པའི་ཆོས་ཉིད་ཕྱིན་ཅི་མ་ལོག་པར་ཤེས་པ་ཡིན་ནོ། །ཆོས་ཉིད་ཕྱིན་ཅི་མ་ལོག་པར་མངོན་དུ་གྱུར་ན་མི་གནས་པའི་ཡེ་ཤེས་ཆེན་པོ་ཉིད་དེ་ཡིན་ནོ། །དེ་བས་ན་མངོན་པར་ཤེས་པ་རྣམས་དྲན་པ་མངོན་སུམ་མར་ཡིད་ལ
86b5 བྱོས་ཤིག་དེ་སྐད་ཅེས་གསུངས་པ་དང་། མངོན་ཤེས་རིག་པའི་དྲང་སྲོང་ཆེན་པོ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མངོན་པར་ཤེས་པ་ནི་བདག་ཅག་རྣམས་ཀྱི་དམ་ཚིག་ལགས་སོ། །བཅོམ་ལྡན་འདས་ཀྱིས
86b6 བདག་ཅག་རྣམས་ཀྱི་དམ་ཚིག་བཤད་དུ་གསོལ་ཞེས་ཞུས་པ་ལས། བཅོམ་ལྡན་འདས་ཀྱིས་བཀའ་སྩལ་པ། རིག་འཛིན་ཆེན་པོ་རྣམས་ཡེ་ཤེས་ཆེན་པོའི་རྒྱུ་མངོན་པར་ཤེས་པ་ནི་རྣམ་པར་ལྔར་རིག་པར་བྱའོ། །མིག་གི་དབང
86b7 པོ་ཐམས་ཅད་ལས། །ཞིབ་ཏུ་བཏགས་པའི་ཕྱེ་མར་བྱ། །བཅུད་ཀྱི་སྙིང་པོར་སྦྱར་བྱས་ནས། །མཐོང་བའི་སྙིང་པོ་འབུམ་བཟླས་ན། །ཐམས་ཅད་མ་ལུས་མཐོང་བར་འགྱུར། །འདི་ནི་མིག་གི་མངོན་ཤེས་སོ། །རྡོ་རྗེ་ལྕེ་ཡིས
86b8 བརྗོད་པའི་ཚིག་། དུས་སམ་རྒྱུན་དུ་བརྗོད་པར་བྱའོ། །བཛྲ་ཙཀྵུ་གརྦྷ་བིདྱཱ་ཧཱུ~ཾ། རྣ་བའི་དབང་པོ་ཐམས་ཅད་ཀྱང་། །བཏགས་སམ་ཕྱེ་མར་བྱས་ནས་ནི། །བཅུད་ཀྱི་སྙིང་པོར་སྦྱར་བྱས་ཏེ། །ཐོས་པའི་སྙིང་པོ
iiif viewer powered by OpenSeadragon