| e-texts navigator |
| Wylie |
305b1 ལེའུ་སྟེ་བཞི་བཅུ་པའོ། །དཀྱིལ་འཁོར་འདིའི་མཚན་ནི་དབང་ཆེན་བསྡུས་པའི་དཀྱིལ་འཁོར་ཏེ། དེ་ལ་དཀྱིལ་འཁོར་གྱི་གཞི་ཟླུམ་པོར་བྱ་བ་ནི་ཆོས་ཀྱི་དབྱིངས་སྤྲོས་པ་མེད་པའི་དོན་ནོ། །འཁོར་ལོ་རྩིབས་ཟུར་ཅན་དུ་བྱ་བ་གཞི་ཟླུམ་པོའི་ནང་ན་གནས་པ་ནི་ཆོས་ཀྱི
305b2 དབྱིངས་སྤྲོས་པ་མེད་བཞིན་དུ་བྱིན་གྱི་བརླབས་གྱིས་ལྷ་དང་། ལྷ་མོ་དང་། ཁྲོ་བོ་དང་། ཁྲོ་མོ་དང་། ཕོ་ཉ་ལ་སོགས་པ་དང་ཉིད་ཀྱིས་འཕྲོ་བའི་དོན་ནོ། །རྣམ་པ་གཅིག་ཏུ་ཆོས་ཀྱི་དབྱིངས་རྣམ་པར་རྟོག་པ་མེད་བཞིན་དུ་ཐམས་ཅད་མཁྱེན་པའི་ཡེ་ཤེས་ཅི་ཡང་མཁྱེན་པ་ལྷུན
305b3 གྱིས་གྲུབ་པའི་དོན་ནོ། །མཐའ་གྲུ་བཞི་བྱ་བ་ནི། ཕྱོགས་བཅུའི་སྣོད་དང་བཅུད་ཀྱི་འཇིག་རྟེན་ཐམས་ཅད་ལ་དབང་བསྒྱུར་པས་བདེ་བ་ཆེན་པོ་རྒྱས་པའི་དོན། དཀྱིལ་ནས་ལྷ་མོ་ལྔ་ཕྱིར་ལྟ་བ། ལྷ་མོ་ནི་དབྱིངས་ཉིད་ཉེ་བའི་བྱིན་བརླབས་ཏེ། སེམས
305b4 དཔས་དབྱིངས་ཉིད་དང་ཉེ་བ་མཐོང་བའི་དོན་ནོ། །སེམས་དཔའ་ལྔ་ནང་དུ་ལྟ་བ་ནི་དབྱིངས་ཉིད་ཉེ་བ་ལ་ལྟ་བའི་དོན་ནོ། །སེམས་དཔའ་གཞན་ཕྱིར་ལྟ་བ་ནི། དབྱིངས་ཉིད་ཐམས་ཅད་དུ་ས་རྡོ་ལྟ་བུ་བེམས་པོ་མ་ཡིན་གྱི་མཁྱེན་པའི་ཡེ
305b5 ཤེས་དང་ལྡན་ཞིང་སེམས་དཔའ་ཉིད་དབྱིངས་ལས་མི་གཞན་པའི་ཐ་ཚིག་གོ། སེམས་མ་གཞན་ནང་དུ་ལྟ་བ་ནི་མཁྱེན་པའི་ཡེ་ཤེས་དངོས་པོ་ལ་སོགས་པ་ཐམས་ཅད་དུ་རྣམ་པར་རྟོག་པ་མ་ཡིན་གྱི་དབྱིངས་ཉིད་དང་ལྡན་ཞིང་དབྱིངས་ཉིད་ཀྱང་མཁྱེན་པའི་ཡེ་ཤེས
305b6 ལས་མི་གཞན་པའི་ཐ་ཚིག་གོ། རྣམ་པ་གཅིག་ཏུ་སེམས་དཔའ་ཕྱིར་ལྟ་བ་ནི་སྣོད་དང་བཅུད་ཀྱི་འཇིག་རྟེན་ཐམས་ཅད་ལ་དབང་བསྒྱུར་བའི་དོན། སེམས་མ་ནང་དུ་ལྟ་བ་ནི་སྣོད་དང་བཅུད་ཀྱི་འཇིག་རྟེན་ཐམས་ཅད་དབང་དུ་འདུས་པའི་དོན། སེམས་དཔའ
305b7 དང་སེམས་མ་ཕྱི་ནང་དུ་གཅིག་ལ་གཅིག་གཟིགས་པ་ནི་མཉེས་པར་བྱེད་པའི་ཐ་ཚིག་གོ། ཁྲོ་བོ་དང་ཁྲོ་མོ་རིལ་ཕྱིར་ལྟ་བ་ནི་ཕྱིའི་དངོས་པོ་དང་རྒོལ་བ་ལ་སོགས་པ་འཇོམས་ཤིང་འདུལ་བའི་དོན། དེ་ལ་དབྱིངས་ནི་དཔེར་ན་ཉི་མའི་དཀྱིལ་འཁོར
305b8 ལྟ་བུའོ། །མཁྱེན་པའི་ཡེ་ཤེས་ནི་ཉི་མའི་འོད་སྣང་ཞིང་གསལ་བ་ལྟ་བུའོ། །དེའི་བྱིན་བརླབས་ནི་དྲོ་ཞིང་འཇམ་པ་ལྟ་བུའོ། །ཕྱིའི་དངོས་པོ་ལ་སོགས་པ་འཇོམས་ཤིང་འདུལ་བ་ནི་རྩི་ཤིང་བསྐམས་པ་དང་ཚིག་པ་ལྟ་བུ་སྟེ། ལྷ་མོ་དང
iiif viewer powered by OpenSeadragon
