| e-texts navigator |
| Wylie |
274a1 ཕྲག་དོག་ཡངས་པའི་དོན་སྦྱོར་བ། ། ང་དང་བདག་མེད་དོན་རྟོགས་ན། །དོག་དང་ཡངས་པ་གཉིས་མེད་དེ། །བདེ་མཆོག་དཀྱིལ་འཁོར་ཡངས་པ་འགྲུབ། །ཕྲག་དོག་དངོས་པོ་མི་ཤེས་ཤིང་། །ང་དང་བདག་ཏུ་འཛིན་འགྱུར་ན། །ལྷ་མ
274a2 ཡིན་གྱི་གནས་སུ་སྐྱེ། །དེ་ནས་ཡི་དགས་གནས་སུ་འགྲོ། །གལ་ཏེ་ཡུལ་ས་རྙེད་འགྱུར་ན། །ཤིན་ཏུ་མི་བདེ་དོག་པར་འགྱུར། །གཞན་ཡང་ལོངས་སྤྱོད་ཐམས་ཅད་ལ། །དབང་བྱར་མེད་ཅིང་གཞན་དབང་འགྱུར། །མདོར་ན་ཉོན་མོངས་སྡུག
274a3 བསྔལ་འགྲུབ། །ཕྲག་དོག་ཡང་དག་རྟོགས་པ་ནི། །ང་དང་བདག་ཏུ་འཛིན་པ་དང་། །ཕྱིན་ཅི་ལོག་ལ་ཕྲག་དོག་སྟེ། །ཐམས་ཅད་གཉིས་སུ་མེད་པར་སྦྱོར། །བདེ་བ་མཆོག་ཀྱང་འགྲུབ་པར་འགྱུར། །གཉིས་མེད་དོན་ཡང་རྟོགས་པར་འགྲུབ། །
274a4 ང་མེད་བདག་མེད་དབྱིངས་སུ་ཐིམ། །ལྷུན་གྲུབ་དོན་མཆོག་འགྲུབ་པར་འགྱུར། །ཡིད་ལ་ལྷ་ནི་རྟག་བསྒོམས་ན། །རྒྱུ་འབྲས་ལྷུན་གྱིས་གྲུབ་པ་ཡི། །བདག་གིས་ཀུན་ཏུ་དབང་བསྒྱུར་ཏེ། །རིག་འཛིན་གནས་སུ་སྐྱེ་བར་འགྱུར། །རྡོ་རྗེའི་རིགས
274a5 ཀྱིས་བསྒྲུབ་བྱ་བ། །སྒྲོལ་དང་སྦྱོར་བས་མཐར་ཕྱིན་འགྱུར། །སྦྱོར་བ་ཉིད་ནི་སྒྲོལ་བ་ཡིན། །རང་བཞིན་གྱིས་ནི་སྦྱོར་སྒྲོལ་དང་། །སྒྲོལ་བ་ཉིད་ན་སྦྱོར་བ་ཡིན། །ཏིང་ངེ་འཛིན་གྱིས་སྦྱོར་སྒྲོལ་དང་། །དབང་པོའི་ཡུལ་དུས་སྦྱོར་སྒྲོལ་དང་། །
274a6 ཐབས་ཆེན་དག་གི་སྦྱོར་སྒྲོལ་དང་། །མངོན་དུ་ཕྱུང་བའི་སྦྱོར་སྒྲོལ་ལོ། །ཡང་ན་སྦྱོར་སྒྲོལ་བདག་ལ་སོགས། །ཤེས་རབ་དབྱིངས་དང་བདག་ཏུ་སྦྱོར། །ཐབས་ཆེན་སྤྲུལ་པ་བསམ་མི་ཁྱབ། །དབྱིངས་དང་དབྱིངས་སུ་ཐམས་ཅད་སྒྲོལ། །
274a7 རོལ་པའི་འཕྲིན་ལས་བསམ་མི་ཁྱབ། །ཐུགས་རྗེ་སྤྲུལ་པ་བསམ་མི་ཁྱབ། །སྦྱོར་སྒྲོལ་ཕྲིན་ལས་བདག་ལ་རྫོགས། །བྱང་ཆུབ་སེམས་སྤྲུལ་ཕྱོགས་བཅུར་འཕྲོ། །ངན་སོང་གནས་རྣམས་སྟོངས་པར་བྱེད། །རིག་འཛིན་བདེ་ལྡན
274a8 ཐོབ་པར་བྱེད། །བླ་མེད་ཞིང་རྣམས་དག་པར་བྱེད། །སྐུ་གསུང་ལྷུན་གྲུབ་ཕྱོགས་བཅུར་འདུལ། །རྡོ་རྗེ་ཞེས་ནི་མཚན་བསྒྲགས་ཏེ། །ཐེག་དམན་རྣམས་ཀྱང་རྡོ་རྗེར་དགོད། །ཟད་མི་ཤེས་པའི་གཏེར་ཡང་འགྲུབ། །རྡོ་རྗེ་རིག་པ་འཛིན་པའི་སྐུ། །
iiif viewer powered by OpenSeadragon
