| e-texts navigator |
| Wylie |
102b1 འདི་ནི་རྡོ་རྗེ་གླུ་འཁོར་ལོ། །ཡེ་ཤེས་རྒྱན་གྱི་ལས་ཡིན་ནོ། །ཞེས་སེམས་དཔའི་རྡོ་རྗེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་གླུའི་ལེའུ་ཞེས་བྱ་སྟེ་སུམ་བཅུ་པའོ།། །།
102b2 དེ་ནས་ཡང་སེམས་དཔའི་རྡོ་རྗེ་དེས་རྡོ་རྗེ་རྣལ་འབྱོར་འཇུག་པ་ཞེས་བྱ་བའི་ལེའུ་འདི་གསུངས་སོ། །འདུས་པ་ཆེན་པོའི་རྣལ་འབྱོར་པ། །གསང་བའི་དཀྱིལ་འཁོར་དམ་པ་འདིར། །གང་དག་འཇུག་པར་བྱེད་པ་ཡི། །རྣལ་འབྱོར་རིགས་ཀྱི་བུ་རྣམས་ཀུན། །
102b3 སྣོད་དུ་གྱུར་པ་ཀུན་བསྡུས་ནས། །བྱང་ཆུབ་མཆོག་གི་སེམས་བསྐྱེད་དེ། །ཚིག་འདི་བརྗོད་དེ་གནས་པར་བྱ། །ེ་མ་བདེ་མཆོག་དགའ་འཚལ་འདིར། །བདག་ཅག་ཀུན་ཏུ་འཇུག་པར་འཚལ། །དགའ་བ་བྱང་ཆུབ་སེམས་བསྐྱེད་ནས། །
102b4 གསང་བའི་དོན་འདི་སྤྱད་པར་བགྱི། །དེ་སྐད་གསོལ་ཏེ་ཞུས་པ་དང་། །གསང་བ་མཆོག་གི་བདག་པོ་ཡིས། །རྒྱུད་སྦྱང་རྒྱུད་དྲུག་ལས་སྒོ་གཅད། །རིག་པ་འཛིན་པའི་རྣལ་འབྱོར་ཀུན། །དཀྱིལ་འཁོར་ཆེན་པོ་གསལ་བཏོན་ཏེ། །ཕྱག་རྒྱ་དབང་དང
102b5 བཅས་པ་ཡི། །འཁོར་བའི་རྒྱུད་རྣམས་སྦྱང་བར་བྱ། །འཇུག་པ་དེ་ཡི་གནས་ལྔ་རུ། །རྒྱུད་དྲུག་ས་བོན་བསྐྱེད་ནས་ཀྱང་། །ཧཱུ~ཾ་ལྔ་དག་གིས་གནན་པར་བྱ། །བཅུག་པ་དེ་ཡི་སྤྱི་བོར་ནི། །པ་ཡི་ཡེ་ཤེས་ལ་བསྐྲུན་པ། །པད་མ་ཁ་བཞི་ལྟེ་བ་ལ། །
102b6 མི་དང་ལྷ་ཡི་ས་བོན་དགོད། །ཤར་ལྷོ་ནུབ་དང་བྱང་དག་ཏུ། །ལྷ་མིན་དུད་འགྲོ་ཡི་དགས་དང་། །དམྱལ་བ་རྣམས་ཀྱི་ས་བོན་གདབ། །ཧཱུ~ཾ་གི་ལམ་སྒོ་བཅད་པར་བྱ། །ལག་གཉིས་མཐེའུ་ཆུང་མཐེ་བོས་མནན། །སོར་མོ་གསུམ་སྦྱར་དཔྲལ
102b7 བར་བསྣོལ། །ལྷ་དང་ལྷ་མིན་གནས་དག་ཏུ། །མི་བཏང་བཟློག་པའི་ཕྱག་རྒྱ་ཡིན། །ལག་གཉིས་བསྣོལ་ནས་མཆན་ཁུང་བསྡམ། །མི་ཡི་ཁམས་ནས་བཟློག་པའི་རྒྱ། །ཁུ་ཚུར་བཅངས་ཏེ་འབྲུ་བསྒྲེང་ནས། །གཡོན་གྱི་སྟེང་དུ
102b8 མནན་པ་འདི། །བྱོལ་སོང་གནས་ནས་བཟློག་པའི་རྒྱ། །ཐལ་མོ་མཉམ་སྦྱར་གུང་རྩེ་སྤྲད། །གུང་མོ་རྒྱབ་ཏུ་སྲིན་ལག་བསྣོལ། །མགུལ་ནས་མཛུབ་མོས་འཁྱུད་པ་ནི། །ཡི་དགས་ཁམས་ལས་བཟློག་པའི་རྒྱ། །
iiif viewer powered by OpenSeadragon