| e-texts navigator |
| Wylie |
345b1 བཅས་པ་གནས་སོ། །དེའི་ཚེ་རྣམ་པར་སྨིན་པ་དེས་གཏི་མུག་ཕག་གི་ལུས་སུ་ལྷུང་བ་དེ་བཞིན་དུ་ཤེས་པར་བྱའོ། །ཡང་སྨྲ་བའི་སེང་གེས་གསོལ་པ། གང་ཟག་ལ་ལ་དག་ཚིག་ཏུ་མཉམ་ཟེར་ཡང་བློ་མཉམ་པ་དང་མི་ཉེ་བར་ཆགས
345b2 སྡང་ལ་འཆེལ་བ་དག་མཆིས་ན་དེའི་རྣམ་པར་སྨིན་པ་ཇི་ལྟ་བུ་ལགས། གསང་བ་མཆོག་གི་བདག་པོས་བཀའ་སྩལ་པ། མཉམ་པ་མ་རྟོགས་པར་ཆགས་སྡང་ལ་འཆེལ་བ་དེ་ནི་རིག་ཤ་སྲིན་པོའི་རིགས་སུ་འགྱུར་ཏེ། དེ
345b3 ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་དུས་ང་དྲན་པ་ཐོག་མའི་ཚེ་མཉམ་པ་ཉིད་མ་རྟོགས་པར་ཆགས་སྡང་ལ་འཆེལ་བའི་དགེ་སློང་དེ་སྦྱིན་ཞེས་བྱ་བ་ཚོམ་བུ་སྟོང་དང་བཅས་པ་ཞིག་གིས་གསང་བའི་སྤྱོད་པ
345b4 མངོན་དུ་སྤྱོད་པས་ལས་དེའི་རྣམ་པར་སྨིན་པས་རག་ཤ་སྲིན་པོའི་གནས་སུ་སྐྱེས་སོ། །དེ་བས་ན་དེ་ལྟར་ཤེས་པར་བྱའོ། །ཡང་སྨྲ་བའི་སེང་གེས་གསོལ་པ། གལ་ཏེ་གང་ཟག་ལ་ལ་དག་རྡོ་རྗེ་འཆང་གི་གྲལ་དུ་ཚོགས་པའི
345b5 ཚེ་དོན་ལ་དགའ་བའི་རྣལ་འབྱོར་པ་དག་གིས་ཡང་དག་པའི་དོན་ལ་གླེང་བསླང་བ་དེ་ལ་འཇིགས་སྐྲག་ཞུམ་སྟེ་མི་དགའ་ཞིང་གུད་དུ་བྱོལ་པའི་རྣམ་པར་སྨིན་པ་ཇི་ལྟ་བུ་ལགས། གསང་བ་མཆོག་གི་བདག་པོས་བཀའ
345b6 སྩལ་པ། ཡང་དག་པའི་དོན་གྱིས་འཇིགས་པའི་ཕྲག་དོག་ཅན་དེ་ནི་འཁོར་བའི་གནས་སུ་འཁྱམས་ཏེ་ཡག་ཤ་གནོད་སྦྱིན་གྱི་གནས་སུ་ལྷུང་ངོ་། །དེ་ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་དུས་ང་དྲན་པ་ཐོག
345b7 མ་ཨའི་ཚེ་རྣལ་འབྱོར་ལས་དང་པོའི་སར་སློབ་པའི་དགེ་སློང་ལྷ་སྦྱིན་ཞེས་བྱ་བ་ཞིག་དོན་དང་ལྡན་པའི་རྣལ་འབྱོར་ཕལ་ཆེན་ཚོགས་པར་གྱུར་པ་ལས་རྣལ་འབྱོར་དེ་དག་གིས་ཡང་དག་པའི་དོན་གླེངས་པ་ལས་ལྷ་སྦྱིན་འཁོར་དང་བཅས་པ
345b8 གླེང་བསླང་བ་མི་དགའ་ཞིང་ངན་སེམས་ཀྱི་ཕྲག་དོག་སྐྱེས་ནས་རང་གི་གནས་སུ་བྱོལ་ཏེ་དེ་དག་ལ་མི་སྙན་པར་བརྗོད་པས་དེའི་རྣམ་པར་སྨིན་པས་ཡང་དག་པའི་དོན་ལས་གོལ་ཏེ་གནོད་སྦྱིན་ཁ་འབར་མའི་གནས་སུ་སྐྱེས་སོ། །དེ་བས
iiif viewer powered by OpenSeadragon
