| e-texts navigator |
| Wylie |
343b1 བྱུང་བར་གྱུར་ཏེ། དེས་མི་ཤེས་པའི་དབང་གིས་མི་ཤེས་པའི་འཁོར་རྣམས་ལ་གསང་བའི་ཚུལ་དུ་བཅོས་ནས་ལོག་པའི་ཚོགས་བསྐྱངས་པས་ཚོམ་བུ་ལྔ་བརྒྱ་དང་བཅས་པར་ཡང་དག་པའི་དོན་ལས་གོལ་ཞིང་ངན
343b2 འགྲོ་ལོག་པའི་ལམ་དུ་ལྟུང་བར་གྱུར་པ་དེ་བཞིན་དུ་ཤེས་པར་བྱའོ། །དེ་ནས་ཡང་སྨྲ་བའི་སེང་གེས་གསོལ་པ། གང་ཟག་ལ་ལ་དག་གསང་བའི་དོན་ཟབ་མོ་རྟོགས་པ་མེད་པར་དགའ་བའི་བཞུང་བོར་དེ་གཞན་ངེས
343b3 པའི་རྣལ་འབྱོར་རྣམས་ལ་སྐུར་པ་འདེབས་པའི་རྣམ་པར་སྨིན་པ་ནི་ཇི་ལྟ་བུར་འགྱུར་བ་ལགས། གསང་བ་མཆོག་གི་བདག་པོས་བཀའ་སྩལ་པ། སྨྲ་བའི་སེང་གེ་གང་ཟག་ལ་ལ་དག་རང་ཉིད་གསང་བའི་དོན་ལ
343b4 ཡིད་ཆེས་པའི་ངེས་པ་མེད་པར་གཞན་ངེས་པའི་རྣལ་འབྱོར་པ་རྣམས་ལ་སྒྲོ་སྐུར་གྱིས་སུན་འབྱིན་པའི་བློ་སྐྱེ་ཞིང་བདག་གི་ནི་ཡིན། གཞན་གྱི་ནི་མ་ཡིན་ཞེས་བདག་ལ་བསྟོད་ཅིང་གཞན་ལ་སྨོད་པ་ནི་དོན་ལས་འབན
343b5 ཐག་ཆད་དེ་མནར་མེད་པར་ལྟུང་ངོ་། །དེ་ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་དུས་ང་དྲན་པ་ཐོག་མའི་ཚེ་བསྐལ་པ་ཀུན་དུ་བཀོད་པ་ཞེས་བྱ་བའི་དུས་དེ་ཉིད་ལ་དཔལ་སྦྱིན་ཞེས་བྱ་བའི་རྣལ་འབྱོར་ཞིག་ཏུ
343b6 ཁས་འཆེས་པ་ཞིག་ཡང་དག་པའི་དོན་ལ་ཤེད་མ་བྱེ་ཞིང་ལམ་གྱི་བགྲོད་ཐབས་ལ་མི་མཁས་པས་དེས་བཀའ་ངེས་པའི་གཞུང་ནི་མ་རྟོགས། ཆོས་མ་ཡིན་པའི་ཆོས་ལ་ཆོས་སུ་སྤྱོད་ཅིང་ནོར་བས་བདག་ཉིད་སུན
343b7 འབྱིན་ཅིང་ལོག་པའི་ཚད་མས་གཞན་ངེས་པའི་དོན་སྤྱོད་པའི་རྣལ་འབྱོར་པ་ལ་ཁྱོད་ཀྱི་དེ་ནི་ཡང་དག་པའི་དོན་མ་ཡིན། ཡང་དག་པའི་བདུད་རྩི་དང་འདྲ་བ་ནི་ཆོས་འདི་ཡིན་ནོ་ཞེས་བདག་བསྟོད། གཞན་ལ་ནི་དམོད
343b8 པས་ཡང་དག་པའི་དོན་དང་ནི་གཏན་དུ་འགྱངས། མནར་མེད་པའི་སེམས་ཅན་དམྱལ་བ་ཆེན་པོར་བསྐལ་པ་བཅུ་གཉིས་ཀྱི་བར་དུ་འཁྱམས་པར་གྱུར་ཏོ། །དེ་བཞིན་དུ་ཤེས་པར་བྱའོ། །དེ་ནས་ཡང་སྨྲ་བའི་སེང
iiif viewer powered by OpenSeadragon
