| e-texts navigator |
| Wylie |
339b1 ཡང་མི་ཕོད་དོ། །དེ་ཅིའི་ཕྱིར་ཞེ་ན། དེ་ནི་གསང་བའི་ཐེག་པ་འདི་ཉིད་ལས་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཐེག་པ་རྣམས་འབྱུང་ཞིང་གསང་བའི་ཐེག་པ་ཉིད་ལ་འགྲོ་བ་གཟུད་པའི་ཐབས
339b2 སུ་བསྟི་བའི་གནས་སུ་གསུངས་པ་ཡིན་གྱི་གཏན་དུ་གཞག་པའི་ས་ནི་མ་ཡིན་ནོ། །དེ་བས་ན་ང་ཉིད་ཀྱི་སྤྲུལ་པ་བས་ཀྱང་ཆོས་རྣམ་པ་སྣ་ཚོགས་ཇི་ལྟར་འདུལ་བར་སྟོན་པ་ཡིན་ནོ། །དེ་བས་ན་གསང་སྔགས་ཀྱི་ཡོན
339b3 ཏན་ནི་བསམ་གྱིས་ཀྱང་མི་ཁྱབ་བོ། །རིགས་ཀྱི་བུ་གང་ཟག་ལ་ལ་དག་གིས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་རྒྱུའི་ཐེག་པའི་སྒོ་ནས་དགེ་བའི་རྩ་བ་རྒྱས་པར་སྤྱད་པ་བས་ནི་གསང་བའི་ཐེག་པ་འདིའི་དོན
339b4 སྐད་ཅིག་ཙམ་ཡིད་ལ་བྱས་པའི་བསོད་ནམས་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་ཕོད་དོ། །རིགས་ཀྱི་བུ་གང་ཟག་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་སོ་སོའི་སྐྱེ་བོ་འམ། ཉན་ཐོས
339b5 སམ། རང་རྒྱལ་བ་འམ། བྱང་ཆུབ་སེམས་དཔས་སངས་རྒྱས་ཀྱི་ཞིང་ཡོངས་སུ་གང་བ་སྙེད་ལ་མེ་ཏོག་དང་། ཕྲེང་བ་དང་། བྱུག་སྤོས་དང་། བླ་བྲེ་དང་། རྒྱལ་མཚན་དང་། བ་དན་དང་། ལྷབ་ལྷུབ་དང་། རོལ་མོའི་ཁྱད་པར
339b6 མང་པོ་ལ་སོགས་པས་སངས་རྒྱས་ཀྱི་ཞིང་ཡོངས་སུ་གང་བར་བྱས་ཏེ་ཕུལ་བ་བས་ཐ་ན་གསང་བའི་ཐེག་པ་ལ་གནས་པའི་རྣལ་འབྱོར་པ་གཅིག་ཙམ་ལ་འང་གཡོ་སྒྱུ་དང་། བསོག་འཇོག་སྤངས་པའི་སྒོ་ནས
339b7 འདོད་པའི་ཡོན་ཏན་གྱི་ཚོགས་སྐད་ཅིག་ཙམ་བཏེག་ཅིང་ལོངས་སྤྱད་པའི་བསོད་ནམས་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་ཕོད་དོ། །དེ་ཅིའི་ཕྱིར་ཞེ་ན། །སོ་སོའི་སྐྱེ་བོ་འམ། ཉན་ཐོས་སམ། རང་སངས་རྒྱས
339b8 སམ། བྱང་ཆུབ་སེམས་དཔའི་བསོད་ནམས་དང་ཡེ་ཤེས་ཀྱི་ཕུང་པོ་དེ་དག་བས་གསང་བའི་ཐེག་པ་ལ་གནས་པ་གཅིག་གི་བ་སྤུའི་ཆ་གཅིག་གི་བསོད་ནམས་དང་། ཡེ་ཤེས་ཀྱི་ཕུང་པོ་ཁྱད་པར་དུ་འཕགས་ཏེ
iiif viewer powered by OpenSeadragon
