| e-texts navigator |
| Wylie |
336b1 བདག་པོས་ཐུགས་སུ་ཆུད་དེ་བཀའ་སྩལ་པ། གསང་བ་ཞེས་པ་རྣམ་པ་བཞི། །རང་བཞིན་དོན་གྱི་གསང་བ་དང་། །གབ་པ་སྦས་པའི་གསང་བ་དང་། །བསྟན་མེད་རྫས་ཀྱི་གསང་བ་དང་། །སྣོད་མེད་བཀའི་གསང
336b2 བ་དང་། །ཆོས་ཉིད་རང་བཞིན་གསང་བ་དང་། །ཐུགས་ཀྱི་ཀློང་ནས་བསྐུངས་པ་དང་། །དམན་ལ་མི་བསྟན་རྫས་རྣམས་དང་། །གསང་སྔགས་ཐེག་ཆེན་ཟབ་མོའི་དོན། །རབ་ཏུ་ཤེས་པ་དཀའ་བའི་ཕྱིར། །
336b3 བསྟན་པར་ཡང་ནི་མི་བྱ་བས། །གསང་བ་ཞེས་སུ་རྒྱལ་བས་གསུངས། །དེ་ཉིད་སྦས་པས་སྦས་པའི་དོན། །སྦས་པ་རྣམ་པ་གསུམ་ཡིན་ཏེ། །ཕྱི་ཡི་སྦས་པ་གསང་བ་དང་། །དེ་བཞིན་ནང་གི་སྦས་པ་དང་། །
336b4 གཉིས་གར་མ་ངེས་སྦས་པ་དེ། །རྨད་འབྱུང་སྔགས་ཀྱི་སྤྱོད་པ་སྟེ། །ཕྱི་རོལ་སྡེ་བས་མཐོང་ཐོས་ན། །དེ་ལ་བཟོད་པ་ཐོབ་མིན་པས། །དེ་ནི་སྦས་པ་ཕྱི་ཞེས་བྱ། །ལྷུན་གྲུབ་བདེ་ཆེན་ཟབ་མོ་དེ། །མིང་གི་རྣལ
336b5 འབྱོར་ཕལ་དག་གིས། །རྟོགས་ཤིང་ཁོང་དུ་ཆུད་པར་དཀའ། །དེ་ནི་ནང་གི་སྦས་པ་ཡིན། །ཕྱི་ནང་གཉིས་སུ་ཐ་དད་མིན། །བདེན་པ་གཉིས་སུ་དབྱེར་མེད་པ། །རྒྱལ་བ་སངས་རྒྱས་སྤྱོད་ཡུལ་དེ། །
336b6 མ་ངེས་སྦས་པར་རྒྱལ་བས་གསུངས། །སྦས་པའི་དོན་རྣམས་གསལ་འབྱིན་པ། །བླ་མ་རྡོ་རྗེའི་ཐུགས་ལ་གནས། །དེས་ན་སྦས་ཤེས་ངེས་པར་གསུངས། །ཐབས་དང་ཤེས་རབ་ཅེས་བྱ་བ། །གཉིས་སུ་མེད་པའི་བྱང་ཆུབ་སེམས། །
336b7 དེ་ཉིད་ཐིག་ལེ་རྣམ་གསུམ་སྟེ། །ཐབས་མཆོག་ཡབ་ཀྱི་མཁའ་ཉིད་དང་། །ཤེས་རབ་ཡུམ་གྱི་ཀློང་ཉིད་དང་། །གཉིས་མེད་བདེ་ཆེན་ངང་ཉིད་དུ། །ཆོས་ཀུན་འདུས་ཤིང་གཅིག་པ་དང་། །སྤྲོས་མེད་ཐིག་ལེར་གནས་པའི་ཕྱིར། །
336b8 ཐིག་ལེ་ཞེས་སུ་རྒྱལ་བས་གསུངས། །མཉམ་པ་ཉིད་ཀྱང་རྣམ་གསུམ་སྟེ། །དོན་དམ་དབྱིངས་སུ་མཉམ་པ་དང་། །ཀུན་རྫོབ་སྒྱུ་མར་མཉམ་པ་དང་། །དབྱེར་མེད་གཅིག་པར་མཉམ་པ་སྟེ། །མ་སྐྱེས་མ་གྲུབ་དབྱེར་མེད་པར། །
iiif viewer powered by OpenSeadragon
