| e-texts navigator |
| Wylie |
333a1 དྲག་ཤུལ་སྤྱོད། །མྱུར་ཞིང་བར་ཆད་མེད་པས་ན། །གློག་གི་ཕྲེང་བ་ཞེས་སུ་བྱ། །སྐོར་དང་གཅོད་དང་རྒྱུན་མི་གཅད། །འཁོར་ལོ་ལྟ་བུའི་རྣམ་པ་དེར། །གསང་བ་ཀུན་འདུས་མདོ་བྱའོ། །ཞེས་གསུངས་སོ། །དེ་ནས་སྨྲ་བའི
333a2 སེང་གེ་བྱེད་པ་པོ་རྡོ་རྗེ་ཀུན་ཏུ་བཟང་པོས་གསོལ་པ། རྒྱུད་ཅེས་བགྱི་བ་ཇི་ལྟ་བུ། །མདོ་འདི་འབྲེལ་བ་ཇི་ལྟར་ལགས། །དེ་བཞིན་དགོས་དང་ཡང་དགོས་ཅི། །བརྗོད་པ་ཇི་ལྟར་ཤེས་པར་བགྱི། །བཅོམ་ལྡན་གསང་བ་མཆོག
333a3 གི་བདག་པོས་བཀའ་སྩལ་པ། །འབྲེལ་དང་མ་ཚང་མེད་པ་དང་། །ཕུན་སུམ་ཚོགས་ཕྱིར་རྒྱུད་ཅེས་བྱ། །འདི་དོན་རིག་པའི་སྐྱེས་བུ་ཡིས། །གསང་བ་ཀུན་དོན་ཤེས་པའི་ཕྱིར། །ཕྱོགས་བཅུ་ཀུན་དུ་རབ་གྲགས་པའི། །
333a4 རྒྱུད་ཀུན་དང་ནི་འབྲེལ་པར་བཤད། །གསང་བའི་སྒོར་ཞུགས་རྣལ་འབྱོར་པ། །བྱང་ཆུབ་སེམས་དང་དཀྱིལ་འཁོར་དང་། །ཕྱག་རྒྱ་བསྙེན་དང་དངོས་གྲུབ་དང་། །སྡོམ་དང་བརྟུལ་ཞུགས་མ་རུངས་མཉེས། །ལས་དང
333a5 ནན་ཏུར་བྱ་བའི་རྣམས། །མཆོག་ཏུ་དགོས་པས་དགོས་པ་ཡིན། །བདེན་གཉིས་རྟོགས་ནས་བདག་གཞན་དོན། །གྲུབ་པ་ཡང་དགོས་ཡིན་པར་བཤད། །དགོས་པའི་དོན་ཡང་རྗོད་བྱེད་པའི། །དོན་བསྡུས་མདོ་འདི་བརྗོད
333a6 པ་ཡིན། །དེ་བས་རྣམ་པ་བཞི་པོ་ཡིས། །བདེ་བླག་ཏུ་ནི་རྟོགས་པར་འགྱུར་ཞེས་གསུངས་སོ། །ཡང་སྨྲ་བའི་སེང་གེས་གསོལ་པ། དབང་མཆོག་དམ་པ་མ་ཐོབ་པར། །སྒྲུབ་པ་ཅི་ཡང་མི་འགྲུབ་པ། །ཇི་ལྟར་དབང་བསྐུར་མཚན
333a7 ཉིད་ལགས། །སྣོད་ནི་ཇི་ལྟ་བུ་དག་ལགས། །གོ་རིམ་ཇི་ལྟ་བུ་དག་ལགས། །རྣམ་གྲངས་དག་གི་མཚན་ཉིད་ཅི། །དབང་ཐོབ་རྟགས་དང་མཚན་མ་ཅི། །བཅོམ་ལྡན་སྙིང་པོས་བཤད་དུ་གསོལ། །གསང་བ་མཆོག་གི
333a8 བདག་པོས་བཀའ་སྩལ་པ། །གསང་བའི་ཚིག་ལ་གསལ་འདྲིས་ཤིང་། །དོན་ལ་གཞོལ་ཞིང་ཡིད་ཆེས་ཀྱང་། །དབང་བསྐུར་བཀའ་རྟགས་མ་བྱིན་པར། །ནོར་བུ་བློན་གྲལ་བསྐོས་པ་ལྟར། །ས་རྣམས་ཐོབ
iiif viewer powered by OpenSeadragon
