| e-texts navigator |
| Wylie |
325a1 དེ་བས་སྤྱད་པར་བྱ་བ་འོ། །གཟུགས་སུ་སྣང་བ་རྣམ་སྣང་མཛད། །ཚོར་བ་རིན་ཆེན་འབྱུང་ལྡན་གཙོ། །འདུ་ཤེས་སྣང་བ་མཐའ་ཡས་ཏེ། །འདུ་བྱེད་གདོན་མི་ཟ་གྲུབ་པ། །རྣམ་ཤེས་རྡོ་རྗེ་སེམས་དཔའོ། །ས་ནི་རྡོ་རྗེ་ཞེས་སུ
325a2 བཤད། །རིན་ཆེན་ཆུ་སྟེ་པད་མ་མེ། །ཐོགས་མེད་རླུང་གི་རང་བཞིན་ཏེ། །ནམ་མཁའི་ཁམས་ནི་རྣམ་སྣང་མཛད། །མིག་གི་དབང་པོ་རྣམ་སྣང་མཛད། །རྣ་བ་རིན་ཆེན་འབྱུང་བའི་ཚུལ། །སྣང་བ་མཐའ་ཡས་སྣ་ཞེས་གྲགས། །ལྕེ
325a3 ནི་གདོན་མི་ཟ་གྲུབ་པ། །ལུས་ནི་མི་བསྐྱོད་པ་རུ་བཤད། །གཟུགས་ནི་རྣམ་པར་སྣང་མཛད་ཚུལ། །སྒྲ་ནི་རིན་ཆེན་འབྱུང་བ་སྟེ། །དྲི་ནི་སྣང་བ་མཐའ་ཡས་སོ། །རོ་ནི་དོན་ཡོད་གྲུབ་པ་ཡིན། །རེག་རྣམས་མི་བསྐྱོད་པ་རུ་བཤད། །
325a4 དེ་བཞིན་དཀར་པོ་རྡོ་རྗེའི་རིགས། །སེར་པོ་བདེར་གཤེགས་རིགས་སུ་བཤད། །མཐིང་ག་རིན་ཆེན་དམར་པོ་ཆོས། །ལྗང་གུ་ལས་ཀྱི་རིགས་སུ་བཤད། །དེ་ཕྱིར་ཤེས་པར་བྱ་བའོ། །དམ་ཚིག་ཡིན་པར་དཔའ་བོས་གསུངས། །
325a5 བསྒྲུབ་པར་བྱ་བའི་འབྲས་བུ་ཡང་། །རིགས་ལྔ་ཉིད་དུ་གྲུབ་པས་ན། །དེ་གྲུབ་པ་ཡི་དམ་ཚིག་ཡིན། །དམ་ཚིག་འདི་ནི་རྨད་པོ་ཆེ། །ཡན་ལག་དམ་ཚིག་འདའ་བའོ། །ཞེས་གསུངས་སོ། །ཡན་ལག་གི་དམ་ཚིག་མདོ་རྒྱས་པའོ། །
325a6 དེ་ལ་འདི་ནི་དབྱེ་བའོ། །རྩ་བ་ཡན་ལག་དམ་ཚིག་རྣམས། །བསྲུང་བ་རྟོག་པ་གཉིས་སུ་དབྱེ། །དེ་དག་དངོས་སུ་བསྲུང་བས་ན། །མི་འདའ་བསྲུང་བའི་སྡོམ་བཅས་ཡིན། །རྣམ་པར་དག་པའི་ངང་ཉིད་དུ། །དེ་དག་རྟོགས་པས་ཁྱད
325a7 པར་དུ། །རྟོགས་པའི་དམ་ཚིག་ཡིན་པར་གསུངས། །དེ་ལ་འདི་ནི་དམ་ཚིག་ཉམས་པ་ལྟུང་བའི་གནས་སོ། །རྩ་བ་ཉམས་པའི་སྐྱོན་ཆེན་ཡང་། །བསྐལ་པ་གྲངས་མེད་བགྲངས་པར་ཡང་། །དམྱལ་བའི་གནས་སུ་ལྟུང་བར་འགྱུར། །
325a8 རྡོ་རྗེ་བླ་མའི་སྐུ་དམད་ན། །དུས་གསུམ་སངས་རྒྱས་བརྙས་པ་ཡིན། །བྱང་ཆུབ་སེམས་ལ་སྐུར་བས་ན། །དེ་ཡི་སྡིག་པ་བརྗོད་མི་ལང་། །དཔེར་ན་འཇིག་རྟེན་ས་ཡི་རྡུལ། །གྲངས་ཀྱིས་བགྲང་བར་ཤེས་ཀྱང་སྲིད། །རྒྱ་མཚོ་ཆེན་པོའི
iiif viewer powered by OpenSeadragon
