| e-texts navigator |
| Wylie |
301a1 ལྔ་ཡི་གང་བྱས་པ། །སྨན་དང་རིན་ཆེན་འབྲུ་རྣམ་ལྔས། །གང་བ་བརྒྱད་དམ་བཅུ་དྲུག་གཞག་།དཀྱིལ་འཁོར་བདག་པོས་མངོན་བསྔགས་པའི། །རྣམ་རྒྱལ་བུམ་པ་དེ་བཞིན་དུ། །དབུས་ཉིད་དུ་ནི་གཞག་པར་བྱ། །ཡང་ན
301a2 བུམ་པའི་སྐྱིན་པར་རོ། །ཟླ་བ་ཉི་མ་དྲི་ཆུ་དང་། །བཏུང་བ་རབ་ཏུ་སྣུམ་པོ་དང་། །དབང་པོ་ཀུན་ནས་འབྱུང་བ་རྣམས། །ཤ་སྲང་གཅིག་གིས་རབ་བསྲེས་པས། །གང་བའི་བན་ད་དེ་བཞིན་གཞག་།རྨད་དུ་བྱུང་བའི་གཏོར་མ་དགྲམ། །དེ་ལ
301a3 སོགས་པ་མཐའ་ཡས་མཆོག་། ཅི་རིགས་རྣམས་ཀྱིས་མཛེས་པར་བྱ། །ཞེས་གསུངས་སོ། །དེ་ལ་འདི་དག་ནི་འཕེན་སྦུད་ཀྱི་ལས་སྤྱིར་བསྟན་པའོ། །དེ་ནས་སྔགས་པ་མཉམ་བཞག་སྟེ། །ཏིང་འཛིན་དཀྱིལ་འཁོར་གསལ་བར་བསྒོམ། །
301a4 གསལ་བ་གཉིས་མེད་དཀྱིལ་འཁོར་དུ། །རང་བཞིན་ཀུན་རྫོབ་སྤྱན་དྲངས་དང་། །དབབ་དང་ཞུག་དང་བརྟན་པ་དང་། །མི་གཡོ་དམ་ཚིག་ཟིལ་གནོན་དང་། །ཕྱག་འཚལ་མཆོད་པ་བརྗོད་པ་དང་། །གསང་བ་མཆོག་གི་དཀྱིལ་འཁོར
301a5 དུ། །འཇུག་དང་དངོས་གྲུབ་གསོལ་བ་དང་། དབང་བསྐུར་བ་ཡི་ལས་རྣམས་བྱ། །དེས་ནི་ཚེ་འདི་ཉིད་ལ་ཡང་། །སངས་རྒྱས་ཉིད་ཀྱང་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །ཞེས་གསུངས་སོ། །འཕགས་པ་རྒྱུད
301a6 ཀྱི་རྒྱལ་པོ་ཡེ་ཤེས་རྔམ་པ་གློག་གི་འཁོར་ལོའི་མདོ་ཞེས་བྱ་བ་ལས་གཟུགས་བརྙན་གྱི་དཀྱིལ་འཁོར་རིམ་པར་ཕྱེ་བའི་ལེའུ་སྟེ་བདུན་པའོ། ། །། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེ་ཆོས་ཐམས་ཅད
301a7 ལྷུན་གྱིས་གྲུབ་པའི་ཕྱག་རྒྱ་ལས་མི་འདའ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཕྱག་རྒྱ་དམ་ཚིག་གི་མཚན་ཉིད་རྣམས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །གསང་སྔགས་རྒྱ་མཚོ་ཆེན་པོ་འདི། །ཕྱག
301a8 རྒྱ་བསམ་ཡས་ཇི་སྙེད་པ། །མདོར་བསྡུས་རྣམ་པ་བཞི་རུ་འདུས། །དང་པོར་ཕྱག་རྒྱ་ཆེན་པོ་སྟེ། །གཉིས་པ་དམ་ཚིག་རྒྱ་ཡིན་ནོ། །གསུམ་པ་ཆོས་ཀྱི་ཕྱག་རྒྱ་སྟེ། །བཞི་པ་ལས་ཀྱི་ཕྱག་རྒྱ་སྟེ། །ཕྱག་རྒྱ་ཆེན་པོ་སྐུ་ཡི་རྒྱ། །རང་བཞིན
iiif viewer powered by OpenSeadragon
