| e-texts navigator |
| Wylie |
285a1 རྣམ་པར་འདོར་པའི་རོལ་པའི་གར་གྱིས་ནམ་མཁའི་ཁམས་ཀུན་ཏུ་ཁྱབ་པར་མཛད་དོ། །རྣམ་པར་རོལ་པ་ངེས་འབྱུང་བ་དང་། འབྱུང་བ་ལས་གྱུར་པ་ཐམས་ཅད་ལ་ཁྱབ་པར་མཛད་དོ། །དེས་སེམས
285a2 དང་། སེམས་ལས་བྱུང་བ་ཀུན་ལ་ཁྱབ་པར་མཛད་པས་བཅོམ་ལྡན་འདས་ཀྱི་བྱང་ཆུབ་ཀྱི་སེམས་ཞི་ཞིང་འཁྱིལ་པས་རོལ་པའི་ཆར་མངོན་པར་ཕབ་པས་སྣོད་ཀྱི་ཁམས་དང་། བཅུད་ཀྱི་ཁམས་དང་། བསམ་གཏན
285a3 དང་། འགོག་པ་པ་དང་། སའི་ཁྱད་པར་ཐམས་ཅད་དང་། བྱང་ཆུབ་ཀྱི་རོལ་པ་སྣ་ཚོགས་སྒྲེག་པ་དང་། སྟེག་པ་དང་། སྦྱོར་བ་དང་། འཁྱུད་པ་དང་། སྡོམ་པ་དང་། བསྟིམ་པ་དང་། མཉེས་པ་དང་།
285a4 གསོལ་བ་དང་། མྱང་བ་དང་། བཅའ་བ་དང་། བདེ་བ་དང་། སྤྲོད་པ་དང་། འཇོག་པ་ལ་སོགས་པ་བཅོམ་ལྡན་འདས་ཀུན་ཏུ་བཟང་པོའི་རྡོ་རྗེ་འཛིན་གྱིས་ཀུན་ཏུ་རྒྱས་པར་བྱས་ཏེ་ཡང་དག་པར་གནས་སོ། །
285a5 དེ་ནས་དེའི་ཚེ་ཐུགས་རྣམ་པར་དག་པའི་མཁའ་ཀློང་ནས་རིག་པ་བྱང་ཆུབ་ཀྱི་སེམས་ཀྱི་འོད་ཟེར་བརྗོད་ཀྱིས་མི་ལང་བ་འབྱམ་ཀླས་པ་ཤར་བ་དེ་ལས་གསུང་གི་ཡིག་འབྲུ་འཁོར་ལོའི་ཚོགས་སུ་ཡང་སྣང་ངོ་། །ཡིག་འབྲུ་དེ་ཉིད
285a6 ཐུགས་ཕྱག་མཚན་དུ་ཡང་གྱུར། ཐུགས་དམ་ཚིག་གི་ཕྱག་རྒྱ་འོད་དུ་འཕྲོས་ཤིང་རྣམ་པར་འདུ་བའི་ཚུལ་གྱིས་རྣལ་འབྱོར་གྱི་དབང་ཕྱུག་གི་འཁོར་རྒྱལ་བ་ཡབ་ཡུམ་དང་། སེམས་དཔའ་དང་། སེམས་མ་དང་།
285a7 ཐུབ་པ་དང་། འཇོམས་པ་དང་། འཇོམས་མ་རྣམས་ཀྱིས་སྐུར་ཡང་རང་རང་གི་དམ་ཚིག་གི་ཕྱག་རྒྱ་ལས་སྣང་བར་བྱས་ཏེ་གསང་བ་མཆོག་གི་བདག་པོ་ལ་མདུན་གྱིས་བལྟས་ནས་རྡོ་རྗེ་གསང་བའི་གྲལ་དུ་འཁོད་དེ།
285a8 དེ་ལྟར་རེ་རེ་ལའང་སངས་རྒྱས་ཀྱི་འཁོར་ཞབས་འབྲིང་དང་བཅས་པ་འབྱམ་ཀླས་པ། ནམ་མཁའི་དབྱིངས་ཀྱི་མཐའ་ཀླས་པ་ལྷུན་གྱིས་གྲུབ་བོ། །ཡང་འོད་ཟེར་དེ་དག་རེ་རེ་ལས་ཧེ་རུ་ཀ་མང་པོའི་ཚོགས་ཀྱང་ཤར་ཏོ། །
iiif viewer powered by OpenSeadragon
