| e-texts navigator |
| Wylie |
284b1 པོ་དེས་ཆོས་ཐམས་ཅད་དོན་དམ་པ་བྱང་ཆུབ་སེམས་ལ་ཤར་བར་མཁྱེན་ནས་མི་དམིགས་ནམ་མཁའི་དབྱིངས་ནས་རྡོ་རྗེའི་མངོན་དུ་ཕྱུང་སྟེ། དཔེར་ན་ཟླ་བ་དྲི་མ་མེད་པ་ནམ་མཁའ་དང་བ་ལ་ཤར་བ་བཞིན་ནོ། །རྡོ་རྗེའི་སྐུ་དེ
284b2 ལས་རིག་པའི་ཆོ་འཕྲུལ་གྱི་འོད་ཟེར་རྣམ་པར་འཕྲོ་བ་ནི་དཔེར་ན་ཉི་འོད་ཀྱི་འོད་ཟེར་དུས་གཅིག་ཤར་བ་ལྟ་བུའོ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་ཏིང་ངེ་འཛིན་ལས་ལངས་ནས་འདོད་ཆགས་ཆེན་པོའི
284b3 ཚུལ་རྡོ་རྗེ་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཞུགས་ནས་ཀྱང་ཡུམ་ཀྲོ་དྷིའི་རྒྱལ་མོ་ལ་གཟིགས་ཏེ་འཛུམ་པ་རྣམ་པར་མཛད་དོ། །དེ་ནས་ཡུམ་ཀྲོ་དྷིའི་རྒྱལ་མོས་ཀྱང་སྤྱན་ཟིམ་བག
284b4 གི་ཚུལ་གྱིས་གཟིགས་ནས་ལན་སྟོང་དུ་རྐྱང་ཕྱག་བཙལ་ཏེ་གཡན་པ་སློང་བའི་གླུ་འདིས་རྣམ་པར་བསྐུལ་ལོ། །ེ་མའོ་ཡིད་བཞིན་སྐུ་མཆོག་ཚོགས་ཆེན་མངོན་རྫོགས་ལྷ། །རྡོ་རྗེ་གར་གྱིས་ཚུལ་གྱིས
284b5 གར་མཛད་ཅིང་། །དགའ་མཆོག་རྡོ་རྗེའི་བྱང་ཆུབ་སེམས་ཆེན་དེ། །འཛུམ་ཞིང་འཁྱིལ་བའི་པད་མའི་གནས་སུ་ཕོབ་ཧོ། །ེ་མའོ། དཀར་ལ་འཚེར་བའི་བྱང་ཆུབ་སེམས་སྤྲིན་དང་། །ཆགས་པ
284b6 དམར་པོ་དབང་གི་རང་བཞིན་དུ། །གཉིས་མེད་འཕྲོས་པའི་བྱིན་བརླབས་བསམ་ཡམ་ལས། །ཡེ་ཤེས་ལྷ་ཚོགས་སྤྲུལ་སྐུ་བསམ་ཡས་འཐོན། །མ་རིག་མུན་པས་ལྡོངས་པས་དོན་གྱིས་ཕྱེ། །དགོན་གདུངས
284b7 གནས་ནས་བྱང་ཆུབ་མྱུ་གུ་སྐྱེད། །ཞི་བ་འགོག་པའི་ས་ལས་རྣམ་པར་སློང་ཞེས་རྣམ་པར་བསྐུལ་བས་གཉིས་སུ་མེད་པའི་རྣམ་པར་རོལ་པས་རོལ་ཞིང་བརྗིད་པ་དང་བཅས་ནས་གར་མཛད་པ་དང་། ཞལ་འཛུམ
284b8 པ་དང་། འདོར་བ་དང་། སྐུམ་པ་དང་། འགྱིང་བ་དང་། སྤྱན་མཛེས་པའི་སྨིན་རིང་བསྐྱོད་ཅིང་སྒྱུར་བ་དང་། དུང་གི་ཕུར་བས་གཡན་པ་སློང་བ་དང་། འདོར་ཞིང་སྐུམ་བ་དང་། འཇོགས་ཅིང་འདེག་པ་དང་།
iiif viewer powered by OpenSeadragon
