| e-texts navigator |
| Wylie |
281a1 ཅ་ཧོ་འཕྲུལ་ཆེན་པོའི་བདག་ཉིད་དེ་འོག་མིན་གྱི་གནས་མཐའ་དང་དབུས་བརྗོད་དུ་མེད་པ་ན་རང་བཞིན་ལྷུན་གྱིས་གྲུབ་པའི་གསང་བ་མཆོག་གི་དཀྱིལ་འཁོར་གསང་བ་ཡུམ་གྱི་མཁའ་རྣམ་པར་དག་པའི་གཞལ་ཡས་ཁང་ན་གཅིག་དང་དུ་མ
281a2 དང་བྲལ་བའི་ཕྱིར་རྒྱ་ཕྱོགས་བཅུར་ཡོངས་སུ་མ་ཆད་པ། ཆོས་ཐམས་ཅད་གཉིས་སུ་མེད་པའི་དབྱིངས་སུ་ཐིམ་པའི་འོད་ཟེར་གསལ་བ། སྤྲོས་པ་མེད་པའི་ཚུལ་གྱིས་ཕོ་བྲང་གི་སྙིང་པོ་ཟླུམ་པོར་གྱུར་པ། དབྱིངས་དང་ཡེ་ཤེས་རྒྱུ་དང་འབྲས་བུར
281a3 ལྡན་པའི་འཁོར་ལོ་རྩིབས་དང་ལྡན་པ། ཐམས་ཅད་མཁྱེན་པའི་ཡེ་ཤེས་རང་སྣང་བའི་ཐབས་ལས་བྱུང་བའི་མུ་ཁྱུད་ཀྱིས་བསྐོར་བ། བསོད་ནམས་དང་ཡེ་ཤེས་ཀྱི་ཚོགས་ཐུགས་རྗེ་རྒྱས་པའི་ཕྱིར་གྲུ་བཞིར་གསལ་བ། རྣམ་པར་ཐར་པའི་སྒོ་ནས
281a4 འཇུག་པའི་སྒོ་བཞི་ན་རྣམ་པར་ཐར་པ་བརྒྱད་ཀྱི་ལམ་སྟེགས་སུ་ཤར་བ། ཕྱི་དང་ནང་མེད་པར་ལྷུན་གྱིས་གྲུབ་པའི་གཞལ་ཡས་ཁང་དེ་ན་ཉི་མ་དང་ཟླ་བ་རངས་པ་དང་ཕྱེད་ཀྱིས་འོད་གསལ་བར་སྣང་བ་དང་། ཆེ་བའི་ཡོན་ཏན་རྣམ་པ་སྣ་ཚོགས་པའི
281a5 དྲིལ་བུ་དང་མུ་ཏིག་གི་ཆུན་མཛེས་འཕྱང་བ་དང་། ཤར་བུའི་རྒྱན་དང་། བླ་རེ་དང་། གདུགས་དང་། རྒྱལ་མཚན་ལ་སོགས་པའི་རྒྱན་གྱི་ཁྱད་པར་དང་། མཉམ་པ་ཉིད་ཀྱི་ཏ་ལའི་ལྗོན་ཤིང་དང་། རེ་བ་སྐོང་བའི་དཔག་བསམ་གྱི་ཤིང་དང་། ཡིད་བཞིན་གྱི
281a6 ནོར་བུ་རིན་པོ་ཆེའི་རྒྱལ་མཚན་དང་། འཇིག་རྟེན་པའི་ལྷ་དང་། ལྷའི་བུ་མོ་རྣམ་པ་སྣ་ཚོགས་པའི་རོལ་མོ་དང་གླུ་དབྱངས་ཀྱི་ཚིགས་སུ་བཅད་པས་བརྒྱན་པའི་གནས་ཁྱད་པར་རྒྱུ་རིན་པོ་ཆེ་སྣ་ཚོགས་ལས་གྲུབ་པའི་གནས་དེ་ཉིད་ན་ཐབས་དང་ཤེས་རབ་རང
281a7 བཞིན་གྱིས་འོད་གསལ་བའི་ཉི་ཟླ་དང་མ་ཆགས་མ་གོས་པའི་པད་མ་དང་མི་ཟད་པའི་རིན་པོ་ཆེ་འབར་བའི་གདན་ཁྲི་དང་བཟིམས་ཆ་དང་སྣམ་རྟེན་དུ་ལྡན་པར་གནས་སོ། །གཞན་ཡང་ཁྲག་འཐུང་གི་ཚོགས་འདུས་པའི་གནས་སུ་ཡང་འགྱུར་ཏེ། དུར་ཁྲོད
281a8 ཀྱི་རྒྱན་གྱི་ཁྱད་པར་གྱི་བྱེ་བྲག་ཞིང་གི་གདན་དང་སྦྲུལ་ནག་གི་ཆུན་འཕྱང་དང་ཐོད་པ་རྣམ་གསུམ་གྱི་མཚན་མ་དང་། རླུང་ནག་གི་ཕུང་པོ་སྤུངས་ཤིང་རག་ཏའི་རྒྱ་མཚོ་མི་བཟད་པར་འཁྲུག་པ་དང་། མེ་རི་སེར་ནག་ཏུ་འཁྱིལ་ཅིང་འབར་བ། ཀེང་རུས་ཀྱི་རི་རབ་ལས
iiif viewer powered by OpenSeadragon
