| e-texts navigator |
| Wylie |
296a1 ཁ་དོག་ཅན་དུ་གྱུར་ཏོ། །ལྷའི་གཞལ་མེད་ཁང་རྣམས་དང་། ཀླུའི་ཁང་ཁྱིམ་རྣམས་དང་། ལྷའི་གཙོ་བོ་རྣམས་ཀྱི་གཞལ་མེད་ཁང་རྣམས་ཀྱང་རབ་ཏུ་གཡོས་པར་གྱུར། ཆུ་བོ་དང་། མཚོ་དང་། རྒྱ
296a2 མཚོ་ཆེན་པོ་དང་། རི་འཁོར་ཡུག་དང་། རི་རབ་ལྷུན་པོ་དང་། སའི་རི་དང་། རི་ནག་པོ་རྣམས་ཀྱང་རབ་ཏུ་གཡོས་པར་གྱུར་ཏོ། །ཉི་མ་དང་། ཟླ་བ་དང་། ནོར་བུ་དང་། མེ་དང་། རྒྱུ་སྐར་དང་། གཟའི་འོད་རྣམས་ཀྱང་ཟིལ་གྱིས་མནན་ཏེ་མི་སྣང
296a3 བར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོས་ངོ་མཚར་རྨད་དུ་བྱུང་བའི་མཚན་མ་དེ་དག་མཐོང་བ་དང་། སྔོན་ཆད་ནམ་ཡང་དེ་ལྟ་བུ་མ་བྱུང་ངོ་ཞེས་ངོ་མཚར་དུ་གྱུར་ནས། སྟན་ལས་ལངས་ཏེ་ཐལ་མོ་སྦྱར
296a4 ནས་འདི་སྐད་ཅེས་བཅོམ་ལྡན་འདས་རྫུ་འཕྲུལ་གྱི་མཚན་མ་འདི་ལྟ་བུ་འདི་དག་སུས་བཀྱེ་ལགས་ཞེས་གསོལ་ནས། ཚིགས་སུ་བཅད་དེ་ཞུ་བ་ཞུས་པ། དིང་ནི་སུ་ཞིག་མངོན་པར་སངས་རྒྱས་ན། །འདི་ལྟར་འོད་ཟེར་ཆེན་པོ་རབ
296a5 བཀྱེ་བས། །ཕྱོགས་བཅུའི་འཇིག་རྟེན་གསེར་གྱི་མདོག་དུ་གྱུར། །སྟོང་ཆེན་འཇིག་རྟེན་ཁམས་ཀྱང་དེ་བཞིན་ལགས། །དེང་ནི་སུ་ཞིག་རང་དབང་ཐོབ་གྱུར་ན། །ཡ་མཚན་རྫུ་འཕྲུལ་ཆེན་པོ་མཐུ་བཀྱེ་ནས། །མཐའ་མེད་སངས་རྒྱས
296a6 ཞིང་རྣམས་རབ་གཡོས་ཤིང་། །ལྷ་ཀླུ་གཞལ་མེད་ཁང་རྣམས་མི་བདེར་གྱུར། །སུ་ཡི་མཐུ་ལགས་རྒྱུ་རྐྱེན་མ་རྟོགས་པས། །འཁོར་མང་འདི་དག་ཐེ་ཚོམ་འཚལ་གྱུར་ན། །བཅོམ་ལྡན་འདས་ཀྱི་ཐུགས་རྗེ་ཆེན་པོ་ཡིས། །
296a7 རྫུ་འཕྲུལ་འདི་ཡི་རྒྱུ་རྐྱེན་བཀས་བཤད་གསོལ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོ་ལ་བཀའ་སྩལ་པ། རིགས་ཀྱི་བུ་ཁྱེད་ཀྱིས་འདི་རིག་པར་བྱ་སྟེ། དེང་འཁོར་གྱི་དཀྱིལ་འཁོར
296a8 འདུས་པ་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱ་བ་ཞིག་ཡོད་པ་དེ། སྔོན་བསྐལ་པ་ཚད་མེད་པ་ནས་བྱམས་པ་ཆེན་པོ་དང་སྙིང་རྗེ་ཆེན་པོ་ཕུན་སུམ་ཚོགས་པར་གྱུར་པ། གཟུངས་ཀྱི
iiif viewer powered by OpenSeadragon
