| e-texts navigator |
| Wylie |
151a1 @#། །རྒྱ་གར་སྐད་དུ། ཤྲི་ཀྲྀཥྞ་ཡ་མཱ་རི་ཏན་ཏྲ་རཱ་ཛཱ་ཏྲི་ཀལྤ་ནཱ་མ། བོད་སྐད་དུ། དཔལ་གཤིན་རྗེའི་གཤེད་ནག་པོའི་རྒྱུད་ཀྱི་རྒྱལ་པོ་རྟོག་པ་གསུམ་པ་ཞེས་བྱ་བ། བཅོམ་ལྡན་འདས་དཔལ་གཤིན་རྗེའི་གཤེད་པོ་ལ་ཕྱག
151a2 འཚལ་ལོ། །དོན་དམ་ཆོས་སྐུ་ཞི་བ་ཉིད། །གང་འདིར་ཁམས་གསུམ་རྣམ་རྒྱལ་ཏེ། །གཤིན་རྗེའི་དགྲ་ཞེས་གྲགས་པ་ཡི། །འཁོར་ལོ་བསྐོར་བའི་ཆོ་ག་བཤད། །ཡོན་ཏན་ལྡན་པའི་སྔགས་པ་ཡིས། །ཆོ་ག་བཞིན་དུ་བསྙེན་བྱས
151a3 ནས། །དུར་ཁྲོད་དབེན་པ་ལ་སོགས་པར། །མཎྜལ་ཁྲུ་དོའི་ཚད་དུ་བྱ། །དྲི་དང་བ་ཡི་རྣམ་ལྔ་དང་། །ཉི་ཟླ་སོགས་པས་བྱི་དོར་བྱ། །བ་ལང་ལ་སོགས་དམ་རྫས་ལྔ། །གཞན་ཡང་ཚོགས་ཀྱི་འཁོར་ལོ་དང་། །ཕྱི་ནང་མཆོད་པའི་བྱེ
151a4 བྲག་གིས། །ལེགས་པར་མཆོད་པ་བྱས་ནས་ནི། །འཁོར་ལོ་བྲི་དང་བཏུ་བ་དང་། །དྲང་དང་བསྲེ་དང་སྤོ་བ་བརྩམ། །སྔགས་པ་རྣལ་འབྱོར་ལྡན་པ་ཡིས། །ལྷོ་ཡི་ཕྱོགས་སུ་ཁ་བལྟས་ཏེ། །དམ་ཚིག་རྗེས་སུ་དྲན་པ་ཡིས། །
151a5 ཨོཾ་བཛྲ་ས་མ་ཡ་སྟྭ~ཾ། །གསང་སྔགས་འདི་ནི་དྲན་བྱེད་ཅིང་། །འཁོར་ལོ་བྲི་བ་བརྩམ་པར་བྱ། །དབུས་ནས་སོར་ཚད་བཅུ་དྲུག་པར། །ཀུན་ནས་ཟླུམ་པོར་བསྐོར་བ་ནི། །འདི་ནི་ནང་གི་འཁོར་ལོ་སྟེ། །རིམ་པ་གསུམ་དུ་བསྐོར་བ་ལ། །སྒོ་མེད
151a6 ལྕགས་མཁར་བཅུ་དྲུག་བྱ། །འདི་ནི་གཤིན་རྗེའི་གྲོང་ཁྱེར་ཏེ། །སྲིད་པ་གསུམ་གྱི་འཇུག་ས་ཡིན། །དེ་ཡི་ཕྱི་རིམ་མུ་ཁྱུད་གསུམ། །ཀུན་ཏུ་ལྕགས་རིས་བསྐོར་བ་སྟེ། །མུ་ཁྱུད་དེ་དག་རེ་རེ་ལའང་། །ཁང་པ་སུམ་བཅུ་རྩ་གཉིས་མཛེས། །
151a7 འགྲོ་བ་ཆོས་བཞིན་སྤྱོད་པ་ཡི། །འཁོར་ལོ་འདི་ལྟར་བྲིས་ནས་ནི། །ཕྱི་རིམ་མུ་ཁྱུད་ཐ་མ་ལ། །ཡི་གེ་ཀ་སོགས་ད་ཡིག་མཐའ། །ང་ཉ་བསལ་ནས་དགོད་པར་བྱ། །ཡི་གེ་དྷ་སོགས་ཀྵཿཡིག་མཐར། །དེ་ཡི་རྗེས་སུ་བྲི་བར་བྱ། །མུ་ཁྱུད
151a8 དབུས་མ་དག་ལ་ནི། །དབྱངས་ཡིག་བཅུ་དྲུག་ཉིས་འགྱུར་དགོད། །བཏུ་དང་དགོད་སོགས་བརྩོམ་པ་ན། །མཚན་མ་འདི་དག་ཤེས་པར་བྱ། །ཟླ་བ་མིག་དང་ཡོན་ཏན་དང་། །རིག་བྱེད་མདའ་དང་དབང་པོ་དང་། །རྒྱ་མཚོ་བཀྲ་ཤིས་གཟའ་དང
iiif viewer powered by OpenSeadragon
