| e-texts navigator |
| Wylie |
361a1 ཡེ་ཤེས་མེ་ནི་ཤེས་རབ་ཆེ། །གཉིས་མེད་དྷཱུ་ཏཱིའི་ནང་ཞུགས་པས། །བདུད་རྩི་མི་འཕོ་གསང་ལམ་གནས། །དེ་ཉིད་དུ་ནི་སྲོག་བརྟེན་ཅིང་། །འཛིན་པ་ཡེ་ཤེས་ལམ་གྱུར་པའོ། །དེ་ལས་གཏུམ་མོ་འབར་གྱུར
361a2 ཞིང་། །ལས་རླུང་གྱེན་ལོག་ལྟེ་བར་ཕྱིན། །ཧོ་ལས་བདུད་རྩི་འབར་འཛག་གྱུར། །མགྲིན་པར་དགའ་བ་སྙིང་གར་ནི། །མཆོག་དགའ་ལྟེ་བར་ཁྱད་པར་ཅན། །གསང་བར་མི་ལྡོག་ལྷན་ཅིག་སྐྱེས། །མཆོག་ཏུ་མི་འགྱུར་འཐོབ
361a3 པའོ། །དེ་ཉིད་ཡེ་ཤེས་རྗེས་དྲན་གཅེས། །ལུས་ངག་ཡིད་དང་ཡེ་ཤེས་ཞི། །ཕྱག་རྒྱའི་དེ་ཉིད་མངོན་གྱུར་པའོ། །ཤེས་པ་དག་ནི་རྣམ་དག་པ། །ལྟེ་བར་འདོད་ཆགས་རྟོག་པ་དག་།སྙིང་གར་གཉིད་ཀྱི་རྟོག་པ་ཞི། །མགྲིན་པར
361a4 རྨི་ལམ་ཤེས་པ་དག་། དཔྲལ་བར་སད་པའི་ཤེས་པ་སྤངས། །ལས་རླུང་རྩ་ཡི་འཁོར་ལོ་ཡི། །ཐིག་ལེར་གནས་པ་རྟེན་དང་ནི། །བརྟེན་པ་བྱང་སེམས་མི་འགྱུར་ཐོབ། །ལས་ཀྱི་ཕུང་པོ་ལོག་གྱུར་ཅིང་། །མཉམ་པའི་བདེན་པ་ལ
361a5 འཇུག་པ། །གཙུག་ཏོར་སྒོ་ནི་ཕྱེ་གྱུར་པས། །འབིགས་བྱེད་བརྟན་པའི་དོན་ཐོབ་པས། །ཡོན་ཏན་དཔག་མེད་མངོན་དུ་གྱུར། །ཐབས་དང་ཤེས་རབ་དབྱེར་མེད་པ། །དཔལ་ལྡན་རྡོ་རྗེ་འཆང་དུ་གྱུར། །དེ་ཉིད་ཡོན་ཏན་ཕྲིན་ལས
361a6 ཚོགས། །རྟོག་མེད་ངང་ལས་ཀུན་དུ་འབྱུང་། །སྐད་ཅིག་མངོན་རྫོགས་ཟུང་འཇུག་པ། །ཏིང་ངེ་འཛིན་ཞེས་བརྗོད་པ་སྟེ། །གསང་ཆེན་གནས་འཐོབ་མངོན་སངས་རྒྱས། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ
361a7 བྱེད་པ་ཉི་ཤུ་རྩ་བདུན་པའོ། ། །། དེ་ནས་ཡེ་ཤེས་ཀུན་མཁྱེན་པའི། །གསང་བ་རབ་འབྱམས་གྲུབ་པ་སྟེ། །འཇིག་རྟེན་འཇིག་རྟེན་འདས་པ་ཡི། །ཡང་དག་སྦྱོར་བའི་དོན་གྱིས་ནི། །ཐོགས་མེད་ནུས་པ་ལྡན་གྱུར་པ། །བདེན
361a8 པ་གཉིས་བསྲེས་དོན་བསྟན་པའོ། །ཕྲིན་ལས་བཞི་ཡི་བྱེད་པ་ལས། །གྲུབ་ཚུལ་དེ་ཉིད་བསྟན་པའོ། །བཟླས་ཐབས་བཅུ་ཡིས་གྲུབ་པའི་དོན། །སྔགས་རྣམས་ཀུན་གྱི་དེ་ཉིད་ཀྱིས། །ལམ་རྫོགས་ས་རྣམས་མངོན་གྱུར་པས། །
iiif viewer powered by OpenSeadragon
