| e-texts navigator |
| Wylie |
360b1 འདས་དགའ་བ་ཉིད། །འཕྲོ་བ་མེད་པས་སེམས་གནས་པའོ། །ཟུག་རྔུའི་རྡུལ་མང་རྣམ་འཚེ་དག་།སྒོ་གསུམ་ངང་དུ་དུལ་ཞིང་ཞི། །བདེ་བ་ཟག་མེད་ཆོས་ཉིད་གནས། །འདུ་འབྲལ་མེད་པར་གྱུར་པས་སོ། །རབ་ཏུ་དུལ
360b2 བ་རྣམ་ཤེས་ཚོགས། །དག་གྱུར་ཤེས་བྱ་ཆོས་ཀྱི་ཁམས། །ཟད་ཅིང་གཟུང་འཛིན་རྣམ་དག་པས། །སྟོང་ཉིད་ཡེ་ཤེས་རྩེ་གཅིག་པ། །རྣམ་པ་ཀུན་ཏུ་མི་ལྡོག་པས། །མཚན་མ་མེད་པ་བྱང་ཆུབ་པའོ། །སྣང་བ་ཐོབ་པ་སྟོང་པ
360b3 ཉིད། །མཆོད་པ་སྟོང་ཆེན་གྱུར་པ་སྟེ། །སྣང་ཙམ་ཐམས་ཅད་སྟོང་པ་དང་། །ཉེར་ཐོབ་ཐམས་ཅད་སྟོང་པ་ཉིད། །དག་པ་རབ་གསལ་མཆོག་གྱུར་པས། །རོ་གཅིག་གྱུར་པ་ལུགས་འབྱུང་དང་། །ལུགས་བཟློག་རྟོག་ཚོགས་ཞི་བ་སྟེ། །
360b4 སངས་རྒྱས་ཀུན་དངོས་འཇིག་རྟེན་ལམ། །དེ་ཉིད་མཆོག་ཏུ་བསྟན་པ་ཡིན། །དེ་བཞིན་གཤེགས་ཀུན་བདག་ཉིད་ལས། །རྐྱེན་ལས་འབྱུང་བ་ལམ་གྱུར་པ། །རྣལ་འབྱོར་གསལ་དང་མི་རྟོག་པ། །བདེ་བའི་བྱེད་པ་ལྟ་སྟངས
360b5 ལས། །ཀ་ར་ཎ་བཅིངས་ནུས་པས་ནི། །སྲིད་པ་གསུམ་པོ་གཡོ་མི་འགྱུར། །བིནྡྷུ་ཀུན་དོར་གནང་སྡོམ་ལས། །མི་འགྱུར་བརྟན་བྱེད་ཡོན་ཏན་ཐོབ། །ལུས་གནས་རྩ་ཡི་ཕོ་བྲང་ལས། །གཡས་པའི་ཉི་མ་རྩོལ་བ་སྟེ། །
360b6 གཡོན་པ་ཟླ་བ་སྲོག་བཅིང་བ། །འབྱུང་འཇུག་གནས་པ་ལམ་བསྟན་པའོ། །དབུ་མར་བྱང་སེམས་རྟེན་བྱེད་པ། །ཀུན་འདར་ངེས་གནས་འཕོ་མེད་བཟུང་། །མཚན་མར་མི་འགྱུར་མཆོག་གི་རྩ། །ལས་ཀྱི་རླུང་སྒོམ་བྱེ་བྲག་པ། །
360b7 འགོག་པས་མུན་པ་སྒྲ་གཅན་འཛིན། །གསང་བའི་སྣ་རྩེའི་སྟེང་འོག་ཏུ། །འབྱུང་བ་རྐྱེན་རླུང་སྣང་བ་གྲོགས། །སྒོ་ལྔ་བཟློག་ལས་གནས་པར་བྱ། །ཡེ་ཤེས་སྒྲོན་མེ་སྣང་བ་སྐྱེ། །རྣལ་འབྱོར་གང་ཞིག་མངོན་གྱུར་པས། །
360b8 རླུང་སེམས་རྣམ་དག་རྟགས་འཆར་བ། །ཡང་ན་འཕོ་ཚེ་ལམ་འཐོབ་འགྱུར། །དེ་ལས་རང་བཞིན་དག་པའི་ཚེ། །འོད་གསལ་ངང་ལས་སྤྲོ་བསྡུ་ཉིད། །དབུ་མའི་ལམ་ནས་འཇུག་པར་འགྱུར། །བདེ་བའི་ཐིག་ལེ་ཐབས་དང་ནི། །
iiif viewer powered by OpenSeadragon
