| e-texts navigator |
| Wylie |
357a1 ལྷན་ཅིག་སྐྱེས་པ། སྐལ་བ་དང་ལྡན་པ་རྣམས་ལས། ཚད་མེད་པའི་དོན་དམ་པའི་ཡེ་ཤེས་ཀྱི་དབང་རྡོ་རྗེས་ཐོགས་པ་མེད་པར་ཀུན་དུ་དབང་བསྐུར་བའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས
357a2 རབ་ཏུ་བྱེད་པ་ཉི་ཤུ་པའོ། ། །། དེ་བཞིན་གཤེགས་པའི་མཛད་པ་ཡི། །ཆོས་དོན་དེ་ཉིད་བླ་ན་མེད། །སྤྱོད་པའི་གསང་བ་མངོན་དུ་བྱུང་། །ཁྱད་པར་སྣོད་ལྡན་རྟོགས་གྱུར་པའོ། །དག་པའི་གནས་དང་འཁོར་འདུས་ལ། །ཅི་ཕྱིར
357a3 ཚིག་ནི་འདི་ལྟ་བུ། །རིགས་པ་མ་ཡིན་ཅེས་པའི་དོན། །ཐེ་ཚོམ་གནས་སུ་གྱུར་པ་ལས། །ཕྱི་རོལ་གྱུར་དང་ཐུན་མོང་དང་། །ཇི་བཞིན་སྒྲ་དང་མ་ཡིན་དང་། །བསྟན་ལ་རང་དགར་འཇུག་པ་ཅན། །ཡིན་ནམ་སྙམ་དུ་རྟོག་པ་ལ། །
357a4 བཟློག་པ་དེ་བཞིན་གཤེགས་རྣམས་ཀྱིས། །ཕྱིན་ཅི་ལོག་ཏུ་གྱུར་ལས་བཟློག་།ལན་གསུངས་སྒྲོ་འདོགས་བཅད་པའོ། །སེམས་ལ་དམིགས་པ་བདག་མེད་པ། །རྣམ་པར་དབེན་དོན་བསྟན་པ་ལས། །གསང་བ་བྱང་ཆུབ་རིམས
357a5 ཀྱིས་དང་། །ཅིག་ཅར་རིམ་པ་ཉེར་བསྟན་པ། །དེ་ཉིད་ལམ་དུ་མངོན་པར་འབྱུང་། །སྤྱོད་དང་གྲོལ་བ་བླ་མེད་པ། །སྣ་ཚོགས་ཐབས་ཀྱིས་གདུལ་དོན་དུ། །སྒྱུ་མ་ལྟ་བུའི་སྤྱོད་པ་སྤྱོད། །རྣལ་འབྱོར་བརྟུལ་ཞུགས་མཆོག་འཛིན
357a6 པའི། །ཀུན་འགྲོ་ཀུན་ལ་དབང་བསྐུར་བ། །མི་འཇིགས་དགྲ་ལས་རྒྱལ་བ་སྟེ། །རིག་པ་བརྟུལ་ཞུགས་སྤྱོད་བྱ་བ། །ཀུན་བཟང་མགོན་པོ་ཀུན་སྤྱོད་དོ། །སྤྲོས་པའི་སྤྱོད་པས་མཉམ་གཞག་དང་། །རྗེས་ཐོབ་གཉིས་མེད་ལམ་དུ
357a7 བླང་། །ཕྱོགས་ལས་རྣམ་རྒྱལ་སྤྱོད་ཐོབ་ནས། །ཡེ་ཤེས་ཆེན་པོའི་སྤྱད་བྱ་བ། །ཟུང་འཇུག་བདེ་ཆེན་རོ་མཉམ་ལས། །མཐར་ཐུག་སྤང་བླང་མེད་པར་གྲོལ། ། བ་དྷཱུ་ཏཱིའི་སྤྱོད་པ་ལས། །སྤྲོས་བཅས་སྤྲོས་མེད་དག་དང་ནི། །
357a8 ཤིན་ཏུ་སྤྲོས་མེད་སྤྱོད་པ་སྤྱོད། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་ཉི་ཤུ་རྩ་གཅིག་པའོ།། །། སངས་རྒྱས་ཀུན་གྱི་བླ་མེད་པ། །གསང་བ་བྱང་ཆུབ་སེམས་དབང་བསྐུར། །དབང་པོ་རབ་དང་ཡང་རབ་དང་། །འབྲིང་གྱུར
iiif viewer powered by OpenSeadragon
