| e-texts navigator |
| Wylie |
34b1 སྐྱེས་གླང་པོ་རྟ་མཆོག་རིགས་དང་ལྡན་པ་དང་། །དུག་བཅས་གདེངས་ཀ་ཅན་གྱི་སྦྲུལ་མཆོག་དང་། །ཆུ་སྲིན་ཆུ་གླང་སྟག་དང་བསེ་དག་དང་། །རང་གི་སྔགས་ཀྱི་སྟོབས་ཀྱིས་བཀུག་ནས་ནི། །ཞོན་ཡང་ངོ་མཚར་མེད་པར་བྱས་པ་ཡི་ནི་མིག་དག་གིས། །
34b2 ལྟ་བར་གལ་ཏེ་གསང་སྔགས་གྲུབ་པ་དེ་ཡིས་མཐོང་བར་འགྱུར། །གལ་ཏེ་སྙིང་རྗེའི་ལྟ་བས་འཇིག་རྟེན་འདི་ལྟར་སྡུག་བསྔལ་བས། །རྒུད་པར་གྱུར་པའི་མི་མཉམ་པ་ལ་བསྔགས་པ་དེས། །ཡིད་བཞིན་ནོར་བུ་བཞིན་དུ་འཇིག་རྟེན་ལ
34b3 ཕན་སྒྲོན་མ་ཡིན། །འཇིག་རྟེན་མ་ལུས་སྒྲོན་མེར་བྱེད་ཅིང་ཞི་བར་བྱེད། །བདུད་རྣམས་བཅོམ་ནས་ནོར་གྱི་ཆར་རྒྱུན་འབེབས་པར་བྱེད། །དཔག་བསམ་ཤིང་དུ་གྱུར་ནས་འགྲོ་རྣམས་ཅི་འདོད་སྦྱིན་པར་བྱེད། །ནོར་གྱི་དབང་ཕྱུག་མ་ལུས་པ་ཡི
34b4 ནོར་རྣམས་ཀུན་བཀུག་ནས། །སེམས་ཅན་ཀུན་ལ་ཕན་པའི་ཕྱིར་དུ་སྦྱིན་པར་བྱེད། །དེ་བཞིན་ཕོངས་པའི་འཇིག་རྟེན་རྣམས་ཀྱི་ཆེད་དུ་གོས་དག་དང་། །སྟན་དང་ཁྱིམ་དང་བླ་རེ་དག་ཏུ་སྒྲོལ་མས་མཛད་པ་དང་། །རྒྱ་མཚོའི་གླིང་དུ་ཚོང་བའི་གྲུ
34b5 ཞིག་གྱུར་པའི་ཕོངས་པ་ལ། །གཟིངས་དང་གྲུ་ལ་སོགས་པར་སྒྲོལ་མས་མཛད་པར་འགྱུར། །སྒྲོལ་མ་དེ་བསྒོམས་རྣལ་འབྱོར་པ། །དང་པོ་སྡུག་བསྔལ་ལྷན་ཅིག་གྱུར། །དེ་སྤངས་ནས་ནི་ཅུང་ཞིག་ན། །མིས་ནི་སྟོན་མོ་རྙེད་པར་འགྱུར། །
34b6 གཉིས་པར་གོས་ནི་རྙེད་པར་འགྱུར། །དེ་བཞིན་བཙུན་མོ་དང་ཡང་འཕྲད། །དེ་ནས་སོ་རྩི་ལོངས་སྤྱོད་འགྱུར། །མ་བླངས་པར་ཡང་ཅི་འདོད་སྤྱོད། །གལ་ཏེ་ཚངས་སྤྱོད་ཡིན་ན་ཡང་། །ལྷ་མཆོག་བསྐྱེད་པའི་བུ་མོ་སྤྱོད། །སེམས་ཅན
34b7 གསོད་ལ་དགའ་བ་ཡིས། །བསྟན་པ་འདི་ལ་འགྲུབ་མི་འགྱུར། །དགེ་བ་བཅུ་ལ་དགའ་འགྱུར་ཞིང་། །ཐེག་པ་ཆེ་ལ་སེམས་གཅིག་པས། །རྡོ་རྗེ་ཆོས་ཀྱི་བཀའ་བཞིན་དུ། །དངོས་གྲུབ་མཆོག་ནི་དེས་སྤྱོད་འགྱུར། །འདི་ནི་རས་རིས་ལ
34b8 འཇུག་པའི་རྟོག་པ་སྟེ་དང་པོའོ། ། །། ཆོས་མཆོད་པ་ཡི་སྦྱོར་བ་ཡིས། །གང་གི་ཆོས་ཉིད་བརྙེས་གྱུར་ན། །ཆོས་ཀྱི་དབྱིངས་སུ་རང་གྱུར་པ། །དེ་ནས་ཡང་དག་བཤད་པར་བྱ། །དེའི་རྗེས་ལ
iiif viewer powered by OpenSeadragon
