| e-texts navigator |
| Wylie |
346b1 ལུས་ཀྱི་གནས་ལས་སྐྱེས། །དབང་གི་དཀྱིལ་འཁོར་གཡོ་ལྡན་པ། །གནས་བཞི་པ་ལས་ཕྱོགས་གྱུར་པ། །ཆུ་བོས་བརྒྱད་བཅུ་རྩ་བཞི་སྟེ། །སྟོང་དང་བརྒྱད་བཅུ་དྷྲྀ་འོད་ཅན། །དེ་དག་ཆོས་ཀྱི་སྒོར་གྱུར་པ། །ཕུང་པོ་བླ་ན
346b2 མེད་པར་འགྱུར། །གཉིས་ཀ་དང་བྱ་བའི་རྒྱུད་ལ་སོགས་པ་རྣམས་སུ་དོན་གསལ་བར་གསུངས་པ་ནི་སྒྲ་ཇི་བཞིན་པ་སྟེ། འདི་ལྟ་སྟེ་དཀྱིལ་འཁོར་དང་མཆོད་སྦྱིན་དང་། གཏོར་མ་དང་། སྨན་དང་། ཞི་བ་ལ་སོགས་པའི་ལས
346b3 ཀྱི་ཚོགས་རྣམས་དང་། དེ་བཞིན་དུ་འཇིག་རྟེན་པའི་དངོས་གྲུབ་ཆེན་པོ་བརྒྱད་གསུངས་པ་རྣམས་ནི་སྒྲ་ཇི་བཞིན་པ་སྟེ་ཡི་གེའི་དོན་གྱིས་བཤད་པའོ། །དཀྱིལ་འཁོར་རྟོག་པའི་ཆོ་ག་སོགས། །སྤྱོད་པ་བསྙེན་བསྒྲུབ་འབྲས་ལྡན་པ། །
346b4 ཡན་ལག་དོན་རྒྱས་རྣམ་བཤད་པ། །ཇི་བཞིན་སྒྲ་ཞེས་བསྟན་པ་ཡིན། །ཀོ་ཊ་ཀྵ། ཀོ་ཊ་བྷ་ཎ། ཀོ་ཊ་ཝེ། ཀོ་ཊ་བྷ་ཤྭ་པ། ཀ་ཏི་ར་ཀ་།ཀོ་ལ་ཁྱ། ཀོ་ལ་བ། ཀོ་ལ་བྷ་ཤྠ། ཀོ་ལ་སྟ་ཐཱ། ཀོ་ལ་བྷ་བྷི། འདིས་དབང་པོ་དང་ཡུལ་གསུངས་ཏེ། དེ་ལྟ་བུ་ལ་སོགས
346b5 པ་རྡོ་རྗེའི་ཚིག་ནི་སྒྲ་ཇི་བཞིན་མ་ཡིན་པའི་སྒོ་ནས་སྦས་པའི་བཤད་པའོ། །དེ་བཞིན་གཤེགས་པའི་བརྡའི་གསང་བ་གང་། །ཀོ་ཊ་ཀྵ་སོགས་མཐའ་འགྲོས་བསྟན་པ་དང་། །བརྡ་སྤྱོད་གསང་བ་འཇིག་རྟེན་མ་གྲགས་པས། །ཇི་བཞིན་མ་ཡིན་སྒྲར་བསྟན
346b6 པའོ། །བྱང་ཆུབ་སེམས་ཉིད་སྤྲོས་མེད་ལས། །མཐའ་བྲལ་རྣམ་པར་མི་རྟོག་པས། །དམིགས་མེད་ཕྱག་རྒྱ་ཆེན་པོ་སྟེ། །མི་གནས་ཟུང་འཇུག་བླ་ན་མེད། །རྡོ་རྗེ་རང་འབྱུང་ཏིང་ངེ་འཛིན། །དེ་བཞིན་གཤེགས་པའི་ངོ་བོ་ཉིད། །རྒྱལ་བས་ངེས་པའི་དོན་དུ་གསུངས། །
346b7 མཐའ་དྲུག་རྣམ་པར་དབྱེ་བ་གཏན་ལ་ཕབ་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཞི་པའོ།། །། བྱང་ཆུབ་སེམས་དཔའ་ཆེན་པོས་གསོལ་པ། བཅོམ་ལྡན་འདས་རྡོ་རྗེ་ཐེག་པ་ཆེན་པོའི་རྒྱུད་སྡེ་གང
346b8 ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱུད་སྡེ་ནི་འདི་ལྟ་སྟེ་རྣལ་འབྱོར་བླ་ན་མེད་པའི་རྒྱུད་དང་གཉིས་ཀའི་རྒྱུད་དང་སྤྱོད་པའི་རྒྱུད་དང་། བྱ་བའི་རྒྱུད་དང་། རྟོག་པའི་རྒྱུད་དོ། །བྱམས་པས་གསོལ་པ། རྒྱུད་དེ
iiif viewer powered by OpenSeadragon
