| e-texts navigator |
| Wylie |
345a1 དབྱིངས་ཀྱི་གནས་ཉིད་དུ། །བསྲེགས་ཤིང་ཐིམ་གྱུར་མི་གནས་པའོ། །རྡོ་རྗེ་ལྟ་བུའི་ཏིང་འཛིན་གྱིས། །ཀུན་རྟོག་མ་ལུས་བཅོམ་གྱུར་པའི། །རྣམ་པར་དག་པའི་ཡེ་ཤེས་ཀྱི། །མཁྱེན་པ་བྱང་ཆུབ་སེམས་ཀྱི་རྒྱུན། །མི
345a2 འགག་ཕྲིན་ལས་རྒྱུན་མི་འཆད། །མི་འགྱུར་སྟོང་ཉིད་བདེ་ཆེན་པོ། །ཟུང་འཇུག་རབ་ཏུ་མི་གནས་པ། །ཐོབ་ཏུ་མེད་ལས་ཀུན་དུ་འབྱུང་། །ལྷུན་གྲུབ་དེ་བཞིན་ཉིད་གནས་པའོ། །དེ་ཁོ་ན་ཉིད་ལས་རྟོག་པ་དང་མི་རྟོག་པ་རྣམ་པར་དག་པར
345a3 གྱུར་པས། རང་བཞིན་སློབ་པ་དང་མི་སློབ་པའི་བྱེ་བྲག་གིས་རབ་ཏུ་མི་གནས་པའི་ངོ་བོར་འགྱུར་རོ། །འདི་ནི་མཐར་ཐུག་པའི་བཤད་པ་གསུངས་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་གསུམ་པའོ།། །།
345a4 བྱམས་པས་གསོལ་པ། བཅོམ་ལྡན་འདས། རྣལ་འབྱོར་གྱི་རྒྱུད་དུ་དེ་བཞིན་གཤེགས་པ་ཐམས་ཅད་ཀྱིས་མཐའ་དྲུག་གིས་བཤད་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ་དགོངས་པས་བཤད་པ་དང་དགོངས་པ
345a5 མ་ཡིན་པས་བཤད་པ་དང་། དྲང་བའི་དོན་དང་། ངེས་པའི་དོན་དང་། སྒྲ་ཇི་བཞིན་པ་དང་། སྒྲ་ཇི་བཞིན་མ་ཡིན་པ་རྣམས་སོ། །བྱམས་པས་གསོལ་པ། ཐུགས་བརྩེ་བ་ཉེ་བར་གཞག་ཅིང་། བཅོམ་ལྡན་འདས་ཚིག་རེ་རེའི་དབྱེ་བ་བསྟན་དུ
345a6 གསོལ། བཅོམ་ལྡན་འདས་ཀྱིས་བཀའ་སྩལ་པ། མཐར་ཐུག་པས་བཤད་པ་དེ་ཉིད་དགོངས་པས་འཇིག་རྟེན་གྱི་སྤྱོད་པ་དང་འགལ་བ་རྨད་དུ་བྱུང་བ་བཤད་པ་ནི་འདི་ལྟ་སྟེ། འདོད་ཆགས་མ་ཡིན་པ་དང་། འདོད་ཆགས་དང་བྲལ་བ་ཡང
345a7 མ་ཡིན་པ་དང་། བར་མ་དབུ་མ་ཉེ་བར་མི་དམིགས་པ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི་དགོངས་པས་བཤད་པའོ། །བདེ་བ་ཟག་བཅས་མ་ཡིན་ཏེ། །ཟག་པ་མེད་པའི་བདེ་བ་ཉིད། །བདེ་བ་སྤངས་ཤིང་འབྲས་མེད་པས། །སྒྱུ
345a8 མ་ལྟ་བུར་བྱུང་བ་སྟེ། །དེ་ཉིད་བདེ་བའི་ཡེ་ཤེས་ནི། །དབུ་མ་ཙམ་དུའང་མི་དམིགས་སོ། །གང་ཟག་དབང་པོ་དམན་པ་རྣམས། །སྐྲག་བྱེད་འགལ་བ་ལྟར་སྣང་ངོ་། །དབང་པོ་མཆོག་རྣམས་ཆོས་ལ་ནི། །སྔོན་ཆད་མ་བྱུང་ཆོས་ཐོས
iiif viewer powered by OpenSeadragon
