| e-texts navigator |
| Wylie |
341a1 སྤྱི་བོ་དང་། གསང་བ་དང་། མཛོད་སྤུའི་འཁོར་ལོ་དག་དང་། ཡང་ན་སུམ་བཅུ་གཉིས་དང་། རྩ་ཁ་གསུམ་པ་དང་། རྩ་ལུ་གུ་རྒྱུད་དང་། རྩ་བའི་མིག་ལྟ་བུ་དང་། རྩ་བར་ཏ་ཀ་རིན་པོ་ཆེའི་ཕོ་བྲང་དང་། རྩ་རིག་པའི་གནས་དང་།
341a2 གཞུ་ཆེན་གྱི་དབྱིབས་དང་། བདེ་སྐྱོང་ནོར་བུའི་འཁོར་ལོ་སྟེ། དབྱིབས་ཐ་དད་དུ་མ་ལས་ཡི་གེའི་རྣམ་པ་སོགས་སྲོག་ཏུ་གྱུར་པ་སྙིང་པོར་གནས་པ་ལས། ཁམས་གསུམ་པའི་འགྲོ་བའི་རྒྱུད་དཔག་ཏུ་མེད་པ་ལས་སྐྱོན་དང་ཡོན་ཏན
341a3 མཐའ་དག་གི་རྟེན་ཅན་ཏེ། དེའི་ཕྱིར་ལུས་དང་ལུས་ལས་འབྱུང་བའི་དཀྱིལ་འཁོར་དུ་འཆར་བ་ལ་སོགས་པའི་ཕྱག་རྒྱ་དང་། གསུང་གི་བཟླས་པའི་ཕྱིར་ཕྱག་རྒྱ་དང་། བསྒོམ་པའི་ཕྱག་རྒྱ་གསུམ་དུ་གྱུར་པ་དང་། ཨཱ་ལི་ཀཱ་ལི་ལས
341a4 ཡང་དག་པར་འབྱུང་བའི་སྔགས་དང་སེམས་ཀྱི་ཐབས་སུ་གྱུར་པ་ཤེས་རབ་དང་། མི་ཕྱེད་པས་བདེ་བ་ཆེན་པོ་ལྟར་དམིགས་པའོ། །ཡབ་ཡུམ་བསྲུབས་པའི་བདེ་བ་དེ་ཉིད་ལས། །གནས་སྐབས་དག་ལས་རིགས་ཀྱི་ཆ་ཐོབ་པ། །མངོན་པར
341a5 བྱང་ཆུབ་ཡེ་ཤེས་ལྔར་འབྱུང་ལས། །ལུས་རྫོགས་འབྱུང་བས་བྱ་བ་བྱེད་འགྱུར་བའོ། །ཆོས་རྣམས་ཀུན་ནི་བདག་ཏུ་བསྒྲུབ་པ་དང་། །བདག་ནི་ལྷར་བསྒྲུབ་ལྷ་ཉིད་ཡེ་ཤེས་སོ། །གཟུགས་ལ་སོགས་པའི་ཡུལ་དབང་པོ་གཉིས་ཐབས་སུ
341a6 གྱུར་པའོ། །རྡོ་རྗེ་དང་པདྨ་ཡང་དག་པར་སྦྱོར་བ་ནི། སེམས་དང་སེམས་ལས་འབྱུང་བ་དག་གི་ཐབས་སུ་གྱུར་པའོ། །སེམས་ལས་བྱུང་བ་མཉམ་པར་སྦྱོར་བའི་བདེ་བ་ཆེན་པོའི་ཏིང་ངེ་འཛིན་གྱིས་ཐབས་ཤེས་རབ་རོ་མཉམ་པར
341a7 གྱུར་པའོ། །དེ་སྒྱུ་མ་ལྟ་བུའི་དཔེ་ཉེ་བར་མཚོན་ཏེ། དེ་ནས་དེ་བཞིན་གཤེགས་པ་གངྒཱའི་བྱེ་མ་སྙེད་ཀྱི་ཞིང་ཁམས་རྣམས། སྒྱུ་མ་ལྟ་བུ་དང་། ཆུ་ཟླ་དང་། མིག་ཡོར་དང་། སྨིག་རྒྱུ་དང་། རྨི་ལམ་དང་། སྒྲ་བརྙན་དང་། དྲི་ཟའི་གྲོང
341a8 ཁྱེར་དང་། མིག་འཕྲུལ་དང་། དབང་པོའི་གཞུ་དང་། གློག་དང་། ཆུ་བུར་དང་། མེ་ལོང་ནང་གི་གཟུགས་བརྙན་ལྟ་བུ་སྟེ། སྒྱུ་མའི་དཔེ་བཅུ་གཉིས་ཀྱིས། བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པའི་ཚུལ་ལོ། །རྡོ་རྗེ་ལུས་ཀྱི་རྩ
iiif viewer powered by OpenSeadragon
