| e-texts navigator |
| Wylie |
32b1 @##། །རྒྱ་གར་སྐད་དུ། ཨཱརྱ་ཏཱ་རེ་ཀུ་རུ་ཀུལླེ་ཀལ་པ། བོད་སྐད་དུ། འཕགས་མ་སྒྲོལ་མ་ཀུ་རུ་ཀུ་ལླེའི་རྟོག་པ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འཕགས་མ་ལྷ་མོ
32b2 སྒྲོལ་མ་ལ་ཕྱག་འཚལ་ལོ། །སྒྲོལ་མ་འབྱུང་བའི་རྣལ་འབྱོར་རྒྱ་མཚོའི་རྒྱུད་ཀྱི་ནི། །གཞུང་དང་རྟོག་པ་ཉམས་ཤིང་ནུབ་པར་གྱུར་ནས་ཡང་། །སྒྲོལ་མ་འབྱུང་བའི་ཏིང་འཛིན་ཞེས་བྱ་རྒྱུད་ཀྱི་གཙོ། །དེ་ཡང་ནུབ་པར་གྱུར་ནས་རྟོག་པ
32b3 འདི་ཡང་འབྱུང་། །སེམས་ཅན་མང་པོའི་དོན་དུ་རྣལ་འབྱོར་པ། །རྒྱས་པར་བསྟན་པའི་རྒྱུད་ལས་བསྡུས་བྱས་ནས། །རྟོག་པ་འདི་ནི་འཇིག་རྟེན་དབང་ཕྱུག་གསུངས། །བྱང་ཆུབ་སེམས་དཔའ་ཐམས་ཅད་མཉན་པར་གྱིས། །འཇིག
32b4 རྟེན་སྐྱབས་མེད་གྱུར་ལ་རྣམ་བལྟས་ནས། །འགྲོ་ཀུན་དོན་བྱེད་པ་ཡི་ཚུལ་འདི་ནི། །སྡུག་བསྔལ་གསུམ་གྱིས་སྡུག་བསྔལ་གྱུར་བལྟས་ནས། །གུས་པ་ཆེན་པོས་ཁྱོད་ཀྱིས་བླང་བར་བྱོས། །འཇིག་རྟེན་རྣམ་རྟོག་ཞི་བར་བྱ
32b5 ཕྱིར་རྟོག་པ་འདི། །སངས་རྒྱས་ཐམས་ཅད་ཀྱིས་ནི་རབ་ཏུ་གསུངས། །དཔལ་ལྡན་གྲུ་འཛིན་རི་ལ་འཇམ་དཔལ་དང་། །པད་མ་བསྣམས་དང་རྒྱལ་བར་བྱེད་པ་དང་། །སྒྲིབ་པ་རྣམ་སེལ་བློ་གྲོས་རྒྱ་མཚོ་དང་། །བྱམས་པ་ལ་སོགས
32b6 ཚོགས་རྣམས་ཐམས་ཅད་ཀྱིས། །གང་ཡང་ཆོས་ཀྱི་ཚིགས་འདི་ཐོས་གྱུར་ནས། །རྗེས་སུ་ཡི་རང་སྤྱི་བོས་གུས་ཕྱག་བྱས། །རྒྱལ་བའི་སྲས་ཀྱིས་མངའ་བྱས་བསྟོད་པ་འམ། །ཡང་ན་གླུ་དང་དབྱངས་དག་བྱས་པ་ཡིས། །
32b7 སྣ་ཚོགས་གར་གྱིས་འདི་ནི་མཆོད་པ་བྱས། །གནོད་སྦྱིན་སྲིན་པོ་ཡི་དགས་འཇིག་རྟེན་དང་། །སྣ་ཚོགས་བུ་མོ་དང་ནི་རྒྱུ་སྐར་དང་། །ས་ཡི་དབང་དང་ལག་ན་རྡོ་རྗེ་དང་། །རླབས་རྣམས་སྣ་ཚོགས་ཅན་གང་གནས་པ་ཡི། །ཀླུ་ཡི་བུ
32b8 མོ་ཟུར་གྱིས་བལྟ་བས་ལྟ་བ་དང་། །ས་འོག་སྐྱོང་དང་ལྷ་དབང་གྲུབ་པའི་བུ་མོས་མཆོད། །དྲི་ཟའི་རྒྱལ་མོ་ནུ་མ་ཤིན་ཏུ་རྒྱས་པ་དང་། །རིག་པ་འཛིན་དང་མི་འམ་ཅི་ཡི་ཆུང་མ་དང་། །གནོད་སྦྱིན་ཆུང་མ་རི་ཡི་བུ་མོའི་བུ་དག་ནི། །
iiif viewer powered by OpenSeadragon
