| e-texts navigator |
| Wylie |
175a1 ཆོ་ག་ཇི་སྐད་གསུངས་པ་བཞིན། །འཁྲུལ་འཁོར་སྔགས་ཀྱི་སྦྱོར་ལ་སོགས། །ལས་ཀྱི་དབྱེ་བས་སྦྱར་བར་བྱ། །མཚན་མ་མནན་ནས་བཟླས་པའམ། །ཁྲོ་བོའི་དཀྱིལ་འཁོར་སྦྱིན་སྲེག
175a2 གམ། །བསྒོམ་པས་གདུག་པའི་སེམས་ཅན་གྱིས། །ཟོས་པར་གྱུར་པར་རབ་ཏུ་བརྟག་།ཞི་ལ་ཞི་བའི་སེམས་ཀྱིས་བྱ། །རྒྱས་ལ་དགའ་བའི་ཡིད་ཀྱིས་ཏེ། །དབང་ལ་ཆགས་པའི་ཡིད་དུ་བྱ། །ཁྲོ་ལ
175a3 གཏུམ་པས་རབ་ཏུ་བསྒྲུབ་ཅེས་པའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱི་ཐེ་ཚོམ་ཐམས
175a4 ཅད་བཅད་པར་མཛད་ནས། ཐེ་ཚོམ་ཐམས་ཅད་གཅོད་པར་མཛད་པ་སྐུ་དང་གསུང་དང་ཐུགས་རྡོ་རྗེ་རང་གི་སྐུ་དང་གསུང་དང་ཐུགས་རྡོ་རྗེ་ལ་བཞུགས་པར་རང་གི་སྐུ་དང་གསུང་དང་ཐུགས་ཀྱིས་དམིགས
175a5 ནས་ཅང་མི་གསུང་བར་བཞུགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས་དེ་བཞིན་གཤེགས་པ་དེ་དག་ཐམས་ཅད་ལ་བསྟོད་པའི་རྒྱལ་པོ་འདིས
175a6 བསྟོད་དོ། །ཐམས་ཅད་སྐུ་ཁྱོད་ཕྱག་འཚལ་ལོ། །ཐམས་ཅད་གསུང་ལ་ཕྱག་འཚལ་འདུད། །ཐམས་ཅད་ཐུགས་ཁྱོད་ཕྱག་འཚལ་ལོ། །ཐམས་ཅད་མཛད་ལ་ཕྱག་འཚལ་འདུད། །སྐུ་གསུང་ཐུགས་ནི་རྡོ་རྗེ་ཡི། །
175a7 སྐུ་གསུང་ཐུགས་ནི་ཐོབ་འགྱུར་བས། །སེམས་ཅན་སངས་རྒྱས་མི་མཉམ་མཉམ། །བསྒྲུབ་བྱ་སུ་ཡིན་སྒྲུབ་པོ་གང་། །སྒྲུབ་པའི་དབང་པོ་བདག་ཉིད་ཆེ། །སངས་རྒྱས་ཐམས་ཅད་གསོད་པ་ཡིས། །ཇི་ལྟར་སྡིག
175a8 པས་གོས་མི་འགྱུར། །གལ་ཏེ་གོས་འགྱུར་འབྲས་བུ་གང་། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་ལེགས་སོ་ལེགས
iiif viewer powered by OpenSeadragon
