| e-texts navigator |
| Wylie |
19b1 དེའི་ཚེ་འཁོར་འདུས་པ་དེ་དག་དང་། བྱང་ཆུབ་སེམས་དཔའ་ཆེན་པོ་རྡོ་རྗེ་སྙིང་པོ་དང་། ཐམས་ཅད་རྒྱུད་ལ་དགའ་ཞིང་མགུ་ནས་རྗེས་སུ་ཡི་རང་བར་གྱུར་ཏོ། །དཔལ་ནམ་མཁའ་ཆེན་པོའི་རྒྱུད་ཀྱི་རྒྱལ་པོ་རྫོགས་སྷོ།། །།
19b2 རྒྱ་གར་གྱི་མཁན་པོ་གཱ་ཡ་དྷ་ར་དང་། ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། ། རྒྱ་གར་སྐད་དུ། ཤྲཱི་ཀཱ་ཡ་བཱ་ཀ་ཙིཏྟ་ཏནྟྲ་རཱ་ཛ། བོད་སྐད་དུ། དཔལ་སྐུ་གསུང་ཐུགས་ཀྱི་རྒྱུད་ཀྱི་རྒྱལ་པོ། དཔལ་རྡོ་རྗེ
19b3 སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་འདོད་ཆགས་ཆེ། །མཆོག་གྱུར་འདི་ལ་ཡང་དག་གནས། །མགོན་པོ་ཐུགས་རྗེ་ཆེ་ལྡན་པ། །ཁྱོད་ཀྱིས་བདག་ལ་བཤད་དུ་གསོལ། །རྡོ་རྗེ་འཛིན་པས་བཀའ་སྩལ་པ། །སྐུ་ནི
19b4 བུམ་པའི་ངོ་བོ་སྟེ། །གསུང་ནི་གསང་བའི་ངོ་བོ་འདོད། །ཐུགས་ཀྱང་ཤེས་རབ་ཡེ་ཤེས་ཏེ། །སངས་རྒྱས་སྤྱན་དང་མཱ་མ་ཀཱི། །དམ་ཚིག་སྒྲོལ་མ་གོས་དཀར་མོ། །རྡོ་རྗེ་འཛིན་ལ་འདི་སྐད་གསོལ། །རྒྱུད་ཀྱི་དོན་ལ་གོམས་ཤིང་། །
19b5 སྨྲ་བའི་ཚིག་གིས་མ་རྨོངས་ལ། །གཞན་གྱི་རྩོད་པས་མི་རྫི་ཡང་། །དབང་དང་མན་ངག་མ་ཐོབ་པར། །དབང་བསྐུར་རབ་གནས་སྦྱིན་སྲེག་སོགས། །སྔགས་སྤྱོད་ངལ་བ་དོན་མེད་ཡིན། །ཤི་ནས་སེམས་ཅན་དམྱལ་བར་སྐྱེ། །དེ་ཕྱིར
19b6 གཙོ་བོས་དབང་བསྐུར་གྱི། །མན་ངག་ཡང་དག་བཤད་དུ་གསོལ། །རྡོ་རྗེ་འཛིན་པས་བཀའ་སྩལ་པ། །དང་པོར་བུམ་དབང་རིམ་པ་ཡང་། །གནས་ནི་ཤིན་དུ་བསྔགས་པ་བཙལ། །བཀྲ་ཤིས་ཡིད་དགའ་ཤིན་དུ་སྣུམ། །བཀྲ་ཤིས
19b7 བྱ་རྣམས་སྙན་པར་སྒྲོགས། །དཔག་བསམ་ཤིང་རྒྱས་ཡོད་པར་འདོད། །གཞན་ཡང་དུར་ཁྲོད་ཤིང་གཅིག་གམ། །ཆུ་ངོགས་དག་ལ་སོགས་པ་རུ། །ས་བདག་ས་ཡི་ལྷ་མོ་ལ། །གཏོར་མ་སྦྱིན་སྲེག་མཆོད་ཡོན་གྱིས། །
19b8 ས་བསླང་ཕྱིར་ནི་མཐོ་རྣམས་གཟུགས། །དེ་ནས་དང་པོ་བསྙེན་པ་དབུལ། །བསྙེན་པ་གསུམ་ནི་རབ་འབྲིང་སྟེ། །མཚན་མ་གྲངས་དང་དུས་སུ་གསུངས། །རེ་རེ་ལ་ཡང་གསུམ་གསུམ་སྟེ། །མཚན་མ་གཟུགས་དང་འོད་དང་སྒྲ། །
iiif viewer powered by OpenSeadragon
