| e-texts navigator |
| Wylie |
230a1 མདའ་སྟེའུ་ཀ་ཉ་རྔ་མ་དེ་དེ་ནས་ཕྱིར་ལོག་སྟེ། བད་སའི་རྒྱལ་པོ་འཆར་བྱེད་དེ་ཉིད་ཀྱི་མགོའི་དྲང་ཐད་ཀྱི་སྟེང་གི་བར་སྣང་ལ་འབར། རབ་ཏུ་འབར། ཀུན་ཏུ་རབ་ཏུ་མཆེད་དེ་འབར་ཞིང་མེ་ལྕེ་གཅིག
230a2 ཏུ་གྱུར་ཏེ་ཕར་འགྲོ་ཚུར་འགྲོ་ཞིང་འདུག་འདུག་ནས་བད་སའི་རྒྱལ་པོ་འཆར་བྱེད་ག་ལ་བ་དེར་སོང་ནས་བད་སའི་རྒྱལ་པོ་འཆར་བྱེད་ཀྱི་གཡོན་རོལ་ལོགས་སུ་འདུག་པར་གྱུར་ཏེ། དེ་ལུས་ལ་ནི་མ་ཕོག་གོ། །ལན་གཉིས
230a3 ལན་གསུམ་དུ་དེ་ལྟར་གྱུར་བ་དང་། དེ་ནས་བཙུན་མོ་སྔོ་སངས་ཅན་གྱིས་བད་སའི་རྒྱལ་པོ་འཆར་བྱེད་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེ་ལྟ་ལགས་པས་གལ་ཏེ་ཁྱོད་དེ་བཞིན་གཤེགས་པ་ལ་ཕྱག
230a4 འཚལ་ན་ཁྱོད་ལ་ཡང་བདེ་ལེགས་སུ་འགྱུར་ལགས་སོ། །དེ་ནས་བད་སའི་རྒྱལ་པོ་འཆར་བྱེད་འཇིགས་ཤིང་དངངས་ལ་སྒྱིད་ལུག་ཅིང་སྤུ་ཟིང་ཞེས་བྱེད་པར་གྱུར་ཏེ་ས་ལ་འགྱེལ་ནས་བཙུན་མོ་སྔོས་སངས་ཅན་ལ
230a5 ཚིགས་སུ་བཅད་དེ་སྨྲས་པ། ཁྱོད་ནི་ལྷ་མོ་འམ་དྲི་ཟ་མོ། །ཤ་ཟ་མོ་འམ་སྲིན་མོ་འམ། །ངས་ནི་ཇི་ལྟར་གཟུང་བར་བྱ། །ང་ཡིས་དྲིས་པ་དེ་སྨྲོས་ཤིག་།གང་ལ་མཚོན་གྱིས་མི་གནོད་པའི། །བུད་མེད་འགའ
230a6 ཡང་ཡོད་མིན་ཏེ། །ངས་ནི་འདི་ལ་གང་དུ་ཡང་། །ཐོས་སམ་མཐོང་ངམ་ཤེས་པའང་མེད། །ང་ནི་སྟོབས་ལྡན་བརྩོན་འགྲུས་ཅན། །འཕོང་གི་ཤེས་པ་ལེགས་བསླབས་པས། །ང་ཡི་མདའ་ནི་གདོན་མི་ཟ། །ནམ་ཡང
230a7 མི་ཕོག་ཡོད་མིན་ཏེ། །སྤྲེའུ་འམ་ཡང་ན་བྱ་དང་ནི། །མི་འམ་ཡང་ན་འབེན་ཀྱང་རུང་། །གང་ལ་ང་ཡིས་མདའ་འཕངས་པ། །ནམ་ཡང་མི་ཕོག་ཡོད་མིན་ན། །དེ་རིང་མདའ་འདི་འཕངས་པ་ནི། །བཟློག་པའི་ཚུལ་དུ་ཕྱིར
230a8 འོངས་ཏེ། །ལུས་ལ་གནོད་པ་མེད་པར་ནི། །ང་ཡི་མདུན་དུ་འདུག་པར་འགྱུར། །གཞན་གྱི་ཚིག་ནི་མཉན་ནས་ཀྱང་། །ང་ནི་ཁྱོད་ལ་བསོད་འདོད་པ། །ང་ནི་ཁྱོད་ལ་སྐྱབས་སུ་འགྲོ། །སྡུག་བསྔལ་གྱུར་བ་ང་ལ་སྐྱོབས། །
iiif viewer powered by OpenSeadragon
