| e-texts navigator |
| Wylie |
75a1 བྱེ་བྲག་ཕྱེད་པ་དང་བཟོད་པ་དག་གིས་མི་འཐུན་པར་སྨྲ་ཞིང་དགེ་སློང་གི་དགེ་འདུན་དག་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཕྱི་བཞིན་ཞབས་འབྲིང་དུ་དོང་ངོ་། །
75a2 དེ་ནས་དགེ་སློང་མང་པོ་རྒྱལ་པོའི་གནས་ན་འདུས་ཤིང་འཁོད་པ་རྣམས་ན་རེ། ཚེ་དང་ལྡན་པ་དག་སེམས་ཅན་རྣམས་ཀྱི་མོས་པ་སྣ་ཚོགས་འདི་ལྟ་སྟེ། ཀུན་དུ་རྒྱུ་རབ་དགའ་རྣམ་གྲངས་དུ་མའི་སྒོ་ནས། སངས་རྒྱས
75a3 ལ་མི་སྙན་པ་བརྗོད་ལ། ཆོས་དང་དགེ་འདུན་ལ་ཡང་མི་སྙན་པ་བརྗོད་པ་དང་། ཀུན་དུ་རྒྱུ་རབ་དགའི་སློབ་མ་བྲམ་ཟེའི་བུ་ཚངས་སྦྱིན་ཞེས་བྱ་བ་ནི་རྣམ་གྲངས་དུ་མའི་སྒོ་ནས། སངས་རྒྱས་ལ་སྙན་པ་བརྗོད་ལ། ཆོས
75a4 དང་དགེ་འདུན་ལ་ཡང་སྙན་པ་བརྗོད་པ་ཞིག་སྟེ། དེ་ལྟར་སློབ་དཔོན་དང་སློབ་མ་དེ་གཉིས་ཕན་ཚུན་ལྟ་བ་དང་མོས་པ་དང་བྱེ་བྲག་ཕྱེད་པ་དང་བཟོད་པ་དག་གིས་མི་མཐུན་པར་སྨྲ་ཞིང་དགེ་སློང་གི་དགེ་འདུན་དང་དེ་བཞིན་གཤེགས་པ
75a5 དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཕྱི་བཞིན་ཞབས་འབྲིང་དུ་དོང་བ་འདི་ནི་ངོ་མཚར་རབ་ཏུ་ཆེའོ་ཞེས་སྐབས་ཀྱི་གཏམ་དེ་ལྟ་བུ་དག་ཡང་དག་པར་བརྗོད་པར་གྱུར་ཏོ། །དེ་ནས་དགེ་སློང་མང་པོ་དག་རྒྱལ
75a6 པོའི་གནས་ན་འདུས་ཤིང་འཁོད་པ་རྣམས་ཀྱི་སྐབས་ཀྱི་གཏམ་དུས་ལ་བབ་པ་དག་། བཅོམ་ལྡན་འདས་ཉིན་མོའི་གནས་ན་བཞུགས་བཞུགས་པའི་ལྷའི་སྙན་རྣམ་པར་དག་པ་མིའི་ལས་འདས་པས་གསན་པར་གྱུར་ཏོ། །
75a7 གསན་ནས་ཀྱང་ཏིང་ངེ་འཛིན་དེ་ལས་བཞེངས་ནས། རྒྱལ་པོའི་གནས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་མདུན་དུ་གདན་བཏིང་བ་ཉིད་ལ་བཞུགས་སོ། །བཞུགས་ནས་ཀྱང་དགེ་སློང་རྣམས་ལ
75a8 བཀའ་སྩལ་པ། དགེ་སློང་དག་ཁྱེད་རྒྱལ་པོའི་གནས་སུ་དགེ་སློང་མང་པོ་རྣམས་འདུས་ཤིང་འཁོད་པ་རྣམས་ཀྱི་སྐབས་ཀྱི་གཏམ་དུས་ལ་བབ་པ་ནི་གང་ཡིན། ཁྱེད་གཏམ་གང་གིས་ན་ད་ལྟར་འདུས་ཤིང་འཁོད་པ་བཙུན
iiif viewer powered by OpenSeadragon
