| e-texts navigator |
| Wylie |
56a1 བ་དང་འཇིག་པར་རྗེས་སུ་ལྟ་ཞིང་གནས་སོ། །གང་ཅུང་ཟད་སྐྱེ་བའི་ཆོས་དེ་ཐམས་ཅད་ནི། ཡུན་མི་རིང་བ་ཉིད་ཏུ་འགག་པའི་ཆོས་ཡིན་ནོ་ཞེས་བྱ་བར་རིག་ནས། དེ་ཉིད་ཏུ་རང་བྱང་ཆུབ་རྗེས་སུ་ཐོབ་བོ། །དེ་ནས་བཅོམ
56a2 ལྡན་འདས་རང་སངས་རྒྱས་དེའི་རྐྱེན་ཇི་ལྟ་བ་བཞིན་གྱིས། ཆོས་ཐོབ་པ་མཐོང་ནས། དེའི་ཚེ་ཚིགས་སུ་བཅད་པ་འདི་དག་སྨྲས་པ། ཡང་དག་བསྙེན་ནས་ཆགས་གྱུར་ལ། །ཆགས་ལས་སྡུག་བསྔལ་འདི་བྱུང་སྟེ། །ཆགས
56a3 ལ་སྡུག་བསྔལ་འདི་འཇུག་པས། །དེ་ཕྱིར་མཁས་པས་ཆགས་སུན་ཕྱུང་། །བསེ་རུ་ལྟ་བུར་གཅིག་པུ་སྤྱད། །དེ་ནས་བཅོམ་ལྡན་འདས་རང་སངས་རྒྱས་དེ་འདི་སྙམ་དུ་གྱུར་ཏེ། བདག་གིས་སེམས་ཅན་རྣམས་ཀྱི་ཕྱིར
56a4 དཀའ་བ་མང་ཞིག་སྤྱད་པས་ན་སུ་ལ་ཡང་ཕན་པ་བྱས་པ་མ་ཡིན་ཏེ། བདག་གིས་དེང་སུ་ཞིག་ལ་སྙིང་བརྩེ་བར་བྱ་ཞིང་། བདག་གིས་དེང་སུ་ཞིག་ལ་བསོད་སྙོམས་བླངས་ཏེ། ཡོངས་སུ་བཟའ་བར་བྱ་སྙམ་མོ། །དེ་ནས་བཅོམ
56a5 ལྡན་འདས་རང་སངས་རྒྱས་དེ་མི་ལས་ཤིན་དུ་འདས་པའི་ལྷའི་སྤྱན་གྱིས་འཛམ་བུའི་གླིང་འདི་ཀུན་དུ་བལྟས་པ་དང་། བཅོམ་ལྡན་འདས་རང་སངས་རྒྱས་དེས་འཛམ་བུའི་གླིང་གི་ཟས་ལ་སོགས་པ་ཡོངས་སུ་ཟད་པར་མཐོང་སྟེ།
56a6 གཞན་དུ་རྒྱལ་པོ་གསེར་མདོག་ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་དོ། །དེ་འདི་སྙམ་དུ་གྱུར་ཏེ། བདག་གིས་ངེས་པར་རྒྱལ་པོ་གསེར་མདོག་ལ་སྙིང་བརྩེ་བར་བྱ་ཞིང་། བདག་གིས་ངེས་པར་རྒྱལ་པོ་གསེར་མདོག
56a7 ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་པ་ལས་བླངས་ཏེ་ཡོངས་སུ་བཟའ་བར་བྱའོ་སྙམ་མོ། །དེ་ནས་བཅོམ་ལྡན་འདས་རང་སངས་རྒྱས་དེ། དེའི་རྫུ་འཕྲུལ་འདི་ལྟ་བུས་ནམ་མཁའ་ལ་མངོན་སུམ་དུ་སོང་སྟེ། ལུས
56a8 སྣང་བར་བྱ་བཞིན་དུ་རྫུ་འཕྲུལ་གྱིས། རྒྱལ་པོའི་ཕོ་བྲང་གསེར་ཅན་གང་ན་བ་དེར་སོང་ངོ་། །དེའི་ཚེ་རྒྱལ་པོ་གསེར་མདོག་བློན་པོ་ལྔ་སྟོང་ཙམ་དང་། ཁང་བཟངས་ཀྱི་སྟེང་ན་འཁོད་པར་གྱུར་ཏོ། །བཅོམ་ལྡན་འདས་རང
iiif viewer powered by OpenSeadragon
