| e-texts navigator |
| Wylie |
297b1 རིགས་དེ་དག་དེའི་ཚེ་ལོངས་སྤྱོད་ཆེ་བར་འགྱུར་བའི་ལམ་དུ་ཞུགས་པ་ཡིན་ནོ་ཞེས་གསུངས་པ་ལྟ་བུ་སྟེ། ལས་དེ་ལྟ་བུ་ནི་ལོངས་སྤྱོད་ཆེ་བར་འགྱུར་བའོ། །དེ་ལ་ཤེས་རབ་ཆུང་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་འདི་ལ་ལ་ལ་ཞིག་དགེ་སྦྱོང
297b2 ངམ་བྲམ་ཟེ་གཞན་དག་ལ་ཆོས་ནི་གང་ཡིན། བདག་གིས་ཅི་ཞིག་བྱས་ན་ལེགས་པར་འགྱུར་ཞེས་མི་འདྲིའི། ཤེས་རབ་འཆལ་པ་ལ་སྟེན་ཅིང་མཁས་པ་རྣམས་སྤོང་བ་དང་དམ་པའི་ཆོས་མ་ཡིན་པ་ཡོངས་སུ་སྟོན་ཅིང་ཆོས་སྨྲ་བ་རྣམས་ཀྱིས
297b3 ལེགས་པར་རྗོད་པར་ཤེས་ཀྱང་འཇུངས་པའི་སེམས་ཡོད་པས་ལེགས་སོ་ཞེས་མི་རྗོད་ཅིང་། དམ་པའི་ཆོས་མ་ཡིན་པ་སྨྲ་བ་རྣམས་ལ་ལེགས་སོ་ཞེས་རྗོད་ཅིང་ལོག་པར་ལྟ་བའི་བསྔགས་པ་རྗོད་པ་དང་ཡང་དག་པའི་ལྟ་བ་ལ་ཉེས་པར་སྨོད
297b4 པ་དང་གླེགས་བམ་འདྲི་བ་དང་ཀློག་པ་ལ་ངན་དུ་རྗོད་པ་དང་དེ་དག་གི་འཚོ་བ་འཕྲོག་པ་སྟེ། ལས་དེ་ལྟ་བུ་ནི་ཤེས་རབ་ཆུང་བར་འགྱུར་བའོ། །དེ་ལ་ཤེས་རབ་ཆེ་བར་འགྱུར་བའི་ལས་ཡོད་དེ་དེ་གང་ཞེ་ན། དེ་ནི་འདི་ལ་ཡོངས་སུ་འདྲི་ཕོད་པའི
297b5 ངང་ཚུལ་ཅན་ལ་ལ་ཞིག་གིས་དགེ་སྦྱོང་དང་བྲམ་ཟེ་མཁས་པ་ལ་འདྲི་བ་དང་། ཤེས་རབ་འཆལ་པ་ཡོངས་སུ་སྤོང་བ་དང་། དམ་པའི་ཆོས་སྟོན་ཅིང་གསལ་བར་བྱེད་པ་དང་། དམ་པའི་ཆོས་མ་ཡིན་པ་ལ་རྣམ་པར་སྨོད་པ་དང་། ཆོས་སྨྲ
297b6 བ་རྣམས་ལ་མི་འཇིགས་པ་ཉེ་བར་སྒྲུབ་པ་དང་། རིགས་པ་ལ་ལེགས་སོ་ཞེས་ཟེར་བ་དང་། མི་རིགས་པ་ཡོངས་སུ་སྤོང་བ་དང་། ཡང་དག་པར་ལྟ་བའི་ལེགས་པ་རྗོད་པ་དང་། ལོག་པར་ལྟ་བ་ལ་ཉེས་པར་དམོད་པ་དང་། གླེགས་བམ
297b7 དང་སྣག་ཙ་དང་སྨྱུག་གུ་ལ་སོགས་པའི་སྦྱིན་པ་བྱེད་པ་དང་ཆང་མི་འཐུང་བ་སྟེ། དཔེར་ན་དགའ་བོའི་མདོ་ལས། ཆང་གི་ཉེས་པ་སུམ་བཅུ་རྩ་ལྔ་གསུངས་པ་དགེ་བའི་ཕྱོགས་སུ་སྦྱར་བ་ལྟ་བུ་སྟེ། ལས་དེ་ལྟ་བུ་ནི་ཤེས་རབ་ཆེ
297b8 བར་འགྱུར་བའོ། །དེ་ལ་སེམས་ཅན་དམྱལ་བར་སྐྱེ་བར་འགྱུར་བའི་ལས་ཡོད་དེ་དེ་གང་ཞེ་ན། དེ་ནི་ཤིན་དུ་ཞེ་སྡང་བའི་སེམས་ཀྱིས་ལུས་དང་ངག་དང་ཡིད་ཀྱི་ཉེས་པ་ཆེར་བྱས་པ་དང་ཆད་པར་ལྟ་བ་དང་རྟག་པར་ལྟ་བ་དང
iiif viewer powered by OpenSeadragon
