| e-texts navigator |
| Wylie |
296a1 དེའི་ཡོན་ཏན་རྗོད་པ་དང་དེ་ལ་རྗེས་སུ་དགའ་བ་དང་ཕ་མ་ན་བའི་རིམ་གྲོ་བྱེད་པ་དང་ཁྱིམ་པ་དང་རབ་ཏུ་བྱུང་བ་དང་རྒན་ནམ་གཞོན་ཡང་རུང་སྟེ། ན་ན་རིམ་གྲོ་བྱེད་པ་དང་མི་མཛའ་བ་ན་ཡང་མི་དགའ་བར་སེམས་པ་དང་།
296a2 དེའི་ནད་སོས་ན་དགའ་བར་སེམས་པ་དང་སྨན་གྱི་སྦྱིན་པ་བྱེད་པ་དང་ཁ་ཟས་ཞུ་ནས་སྟོབས་པ་སྟེ། ལས་དེ་ལྟ་བུ་ནི་ནད་ཉུང་བར་འགྱུར་རོ། །དེ་ལ་ཁ་དོག་མི་སྡུག་པར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ཁྲོ་བ་དང་འཁོན་དུ
296a3 འཛིན་པ་དང་འཆབ་པ་དང་འཚིག་པ་དང་ཕ་མ་ལ་ངན་དུ་རྗོད་པ་དང་ཁྱིམ་པ་དང་རབ་ཏུ་བྱུང་བ་རྒན་གཞོན་ལ་ངན་དུ་བརྗོད་པ་དང་། མཆོད་རྟེན་དང་གཙུག་ལག་ཁང་དང་མཆོད་རྟེན་གྱི་ས་གཞི་མི་སྡུག་པར་བྱས་པ་དང་མཆོད་རྟེན་དང
296a4 སྐུ་གཟུགས་ཀྱི་མར་མེ་བསད་པ་དང་། སེམས་ཅན་ཁ་དོག་མི་སྡུག་པ་རྣམས་ལ་ཕྱས་འདྲོགས་པ་དང་གཙང་སྦྲ་ཆུང་བ་སྟེ། ལས་དེ་ལྟ་བུ་ནི་ཁ་དོག་མི་སྡུག་པར་འགྱུར་བའོ། །དེ་ལ་མཛེས་པར་འགྱུར་བའི་ལས་ཡོད་དེ་དེ་གང
296a5 ཞེ་ན། དེ་ནི་མི་ཁྲོ་བ་དང་འཁོན་དུ་མི་འཛིན་པ་དང་མི་འཆབ་པ་དང་མི་འཚིག་པ་དང་གོས་ཀྱི་སྦྱིན་པ་བྱེད་པ་དང་མཆོད་རྟེན་དང་གཙུགས་ལག་ཁང་དག་ལ་རྡོ་ཐལ་གྱིས་རྐྱང་ནུལ་བྱེད་པ་དང་སྣོད་སྤྱད་སྡུག་གུའི་སྦྱིན་པ་བྱེད་པ་དང་།
296a6 སྤོས་དང་བྱུག་པ་དང་གོས་དང་རྒྱན་གྱི་སྦྱིན་པ་བྱེད་པ་དང་། ཕ་མའི་ལེགས་པ་རྗོད་པ་དང་འཕགས་པ་དང་ཚུལ་ཁྲིམས་དང་ལྡན་པ་དག་གི་ལེགས་པ་རྗོད་པ་དང་མཆོད་རྟེན་གྱི་གཞི་དང་གཙུག་ལག་ཁང་དང་ཁྱིམ་གྱི་ཕྱག་དར་རྟག
296a7 ཏུ་བྱེད་པ་དང་སེམས་ཅན་མི་སྡུག་པ་རྣམས་ལ་ཕྱས་མི་བྱེད་པ་དང་། དེ་བཞིན་དུ་རྒན་པ་འམ་གཞོན་པ་གཞན་དག་ལ་ཕྱས་མི་བྱེད་པ་དང་གཙང་སྦྲ་ཆེ་བ་སྟེ་ལས་དེ་ལྟ་བུ་ནི་མཛེས་པར་འགྱུར་བའོ། །དེ་ལ་མཐུ་ཆུང་བར་འགྱུར
296a8 བའི་ལས་ཡོད་དེ། དེ་གང་ཞེ་ན། དེ་ནི་སེར་སྣ་བྱེད་པ་དང་ཕྲག་དོག་ཆེ་བ་དང་གཞན་གྱིས་ཐོབ་ན་མི་དགའ་བ་དང་གཞན་ལ་མི་སྙན་པར་རྗོད་ན་དགའ་བ་དང་ཕ་མ་ལ་བརྙས་པ་དང་འཕགས་པ་དང་ཚུལ་ཁྲིམས་དང་ལྡན་པ་ལ་བརྙས
iiif viewer powered by OpenSeadragon
