| e-texts navigator |
| Wylie |
275a1 གནོད་པ་བགྱིད་པའི་ནད་གང་ལགས། །སྨན་པའི་མཆོག་གཅིག་དེ་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། འདོད་པ་སྡུག་ཀྱང་མི་ཕན་པ། །ཐར་པ་ཕན་ལ་མི་སྡུག་པ། །འདོད་ཆགས་གནོད
275a2 པ་མེད་པའི་ནད། །སྨན་པའི་མཆོག་གཅིག་སངས་རྒྱས་ཡིན། །ལྷས་གསོལ་པ། གང་གིས་འཇིག་རྟེན་འདི་བསྒྲིབས་ལགས། །གང་གིས་འཇིག་རྟེན་དབང་དུ་བགྱིས། །གང་གིས་མཛའ་བཤེས་འབྱེད་པར་བགྱིད། །
275a3 གང་གིས་མཐོ་རིས་མཆི་མི་འགྱུར། བཅོམ་ལྡན་འདས་ཀྱིས་བཀའ་སྩལ་པ། མི་ཤེས་པས་ནི་འཇིག་རྟེན་བསྒྲིབས། །གཏི་མུག་གིས་ནི་དབང་དུ་བྱས། །ཞེན་པས་མཛའ་བཤེས་འབྱེད་པར་བྱེད། །ཆགས་པས
275a4 མཐོ་རིས་འགྲོ་མི་འགྱུར། །ལྷས་གསོལ་པ། གང་གིས་མཛའ་བཤེས་འཕེལ་བར་འགྱུར། །གང་གིས་དགྲ་རྣམས་ཞི་བར་བགྱིད། །གང་གིས་མཐོ་རིས་འཐོབ་པར་བགྱིད། །གང་གིས་ཐར་པར་འགྲོ་བར་འགྱུར། །
275a5 བཅོམ་ལྡན་འདས་ཀྱིས་བཀའ་སྩལ་པ། གཏོང་བས་མཛའ་བཤེས་འཕེལ་བར་འགྱུར། །བྱམས་པས་དགྲ་རྣམས་ཞི་བར་བྱེད། །ཚུལ་ཁྲིམས་ཀྱིས་ནི་མཐོ་རིས་ཐོབ། །ཤེས་པས་ཐར་པར་འགྲོ་བར་འགྱུར། །
275a6 ལྷས་གསོལ་པ། རྒྱལ་པོ་དང་ནི་ཆོམ་རྐུན་གྱིས། །ཤིན་དུ་བསྒྲིམ་པ་བགྱིས་གྱུར་ན། །སྐྱེས་པ་འམ་བུད་མེད་གང་གི་འང་རུང་། །དབྲོག་པར་མི་ཚུགས་ཅི་ཞིག་ལགས། །བཅོམ་ལྡན་འདས་ཀྱིས་བཀའ་སྩལ་པ།
275a7 རྒྱལ་པོ་དང་ནི་ཆོམ་རྐུན་གྱིས། །ཤིན་དུ་བསྒྲིམ་པ་བྱས་གྱུར་ཀྱང་། །སྐྱེས་པ་འམ་བུད་མེད་གང་གི་འང་རུང་། །དབྲོག་པར་མི་ཚུགས་ཚུལ་ཁྲིམས་སོ། །ལྷས་གསོལ་པ། འཇིག་རྟེན་འདི་ནི་གང་གིས་འཆིང་། །
275a8 གང་གིས་འཇིག་རྟེན་རྣམ་པར་གྲོལ། །གང་ཞིག་རྣམ་པར་སྤངས་པས་ན། །མྱ་ངན་འདས་ཤེས་བགྱི་བར་བགྱི། །བཅོམ་ལྡན་འདས་ཀྱིས་བཀའ་སྩལ་པ། འདོད་པས་འཇིག་རྟེན་འཆིང་བར་བྱེད། །འདོད་པ
iiif viewer powered by OpenSeadragon
