| e-texts navigator |
| Wylie |
274b1 ཚིག་དུག་མཚོན་ཆ་རྣོན་པོ་ཡིན། །འདོད་ཆགས་ཧ་ལ་ཧ་ལའི་དུག་།ཞེ་སྡང་རབ་ཏུ་འབར་བའི་མེ། །མུན་པ་རབ་གནག་མ་རིག་པ། །ལྷས་གསོལ་པ། མི་ཡིས་ཟིན་པ་དེ་གང་ལགས། །གང་འདིར་བོར་བ་དེ་གང་ལགས། །
274b2 མི་ཤིགས་གོ་ཆ་ཅི་ཞིག་ལགས། །འདི་ན་མཚོན་དུ་ཅི་རྣོ་ལགས། །བཅོམ་ལྡན་འདས་ཀྱིས་བཀའ་སྩལ་པ། བདག་གིས་གང་བྱིན་ཟིན་པ་ཡིན། །ཁྱིམ་དུ་གང་བཞག་འདིར་བོར་ཡིན། །མི་ཤིགས་གོ་ཆ་བཟོད་པ་ཡིན། །
274b3 འདི་ན་མཚོན་དུ་ཤེས་རབ་རྣོ། །ལྷས་གསོལ་པ། ཆོམ་རྐུན་ཞེས་བགྱི་དེ་གང་ལགས། །དམ་པ་རྣམས་ཀྱི་ནོར་གང་ལགས། །ལྷ་དང་བཅས་པའི་འཇིག་རྟེན་ན། །བསླུས་ཤེས་བགྱི་བ་གང་དག་ལགས། །
274b4 བཅོམ་ལྡན་འདས་ཀྱིས་བཀའ་སྩལ་པ། རྣམ་རྟོག་ཆོམ་རྐུན་མཁས་པ་ཡིན། །ཚུལ་ཁྲིམས་དམ་པ་རྣམས་ཀྱི་ནོར། །གང་དག་ཚུལ་ཁྲིམས་ལོག་ལྷུང་བྱས། །དེ་དག་འཇིག་རྟེན་བསླུས་པ་ཡིན། །ལྷས་གསོལ་པ།
274b5 བདེ་ཞེས་བགྱི་བ་དེ་གང་ལགས། །དབང་ཕྱུག་དམ་པ་དེ་གང་ལགས། །རྟག་ཏུ་རྣམ་པར་རྒྱན་པ་གང་། །མཐོ་བརྩམས་གང་ལགས་བཀའ་སྩལ་གསོལ། །བཅོམ་ལྡན་འདས་ཀྱིས་བཀའ་སྩལ་པ། འདོད་ཆུང
274b6 བདེ་བར་ཤེས་པར་བྱ། །ཆོག་ཤེས་དབང་ཕྱུག་དམ་པ་ཡིན། །ཁྲིམས་ལྡན་རྟག་ཏུ་རྣམ་པར་བརྒྱན། །ཚུལ་ཁྲིམས་ཉམས་པ་མཐོ་བརྩམས་ཡིན། ལྷས་གསོལ་པ། རྩ་ལག་མཉེས་གཤིན་དེ་གང་ལགས། །
274b7 བསམ་པ་སྡང་བའི་དགྲ་གང་ལགས། །སྡུག་བསྔལ་མི་བཟད་དེ་གང་ལགས། །མཆོག་ཏུ་བདེ་བ་དེ་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། རྩ་ལག་མཉེས་གཤིན་བསོད་ནམས་ཡིན། །
274b8 སྡིག་པ་བསམ་པ་སྡང་བའི་དགྲ། །དམྱལ་བའི་སྡུག་བསྔལ་མི་བཟད་པ། །ཕུང་པོ་མེད་པའི་བདེ་བའི་མཆོག་།ལྷས་གསོལ་པ། སྡུག་ལ་མི་ཕན་དེ་གང་ལགས། །ཕན་ཡང་མི་སྡུག་གང་ཞིག་ལགས། །
iiif viewer powered by OpenSeadragon
