| e-texts navigator |
| Wylie |
135b1 འབྲས་བུ་སྐྲུན། །རང་གིས་རང་ལ་བསླུས་འདེབས་ཤིང་། །བསླབ་པ་ལ་ནི་མི་གནས་ཤིང་། །བདེ་བར་གཤེགས་པའི་རྒྱལ་མཚན་འཛིན། །གཟུགས་ཙམ་ལ་ནི་བརྟེན་ནས་སུ། །ང་ནི་དགེ་སློང་ཡིན་ཟེར་བ། །གླང་སྨྱོན་སྣལ
135b2 རལ་བཏགས་པ་འམ། །སྦྲུམ་མ་སྐྱུར་རྩི་འཐུངས་པ་ལྟར། །མི་དེ་ཉི་མ་གཅིག་ལ་ཡང་། །སྡིག་པའི་ས་བོན་དཔག་མེད་དང་། །རང་ལ་གནོད་པ་སྣ་ཚོགས་པ། །བྱེད་པར་འགྱུར་བ་ཁོ་ན་ཡིན། །གང་ཞིག་བསླབ་ལ་མི་གནས
135b3 ཤིང་། །བདེར་གཤེགས་རྒྱལ་མཚན་འཛིན་པ་བས། །བསླབ་པ་མི་གནས་སྐད་ཅིག་ལ། །གཟུགས་པོར་ཁྱིམ་པར་གནས་པ་བཟང་། །བསླབ་པ་མི་གནས་རྟགས་འཛིན་པ། །འཇིག་རྟེན་པ་ནི་ཐམས་ཅད་ཀྱི། །སྙིང་དུ
135b4 སྡུག་པར་མི་འགྱུར་ཞིང་། །ཀུན་གྱི་ཚིག་གི་ངན་སྣོད་ས། །དཔེར་ན་སྡོང་པོ་བཟང་པོ་ལ། །ཡུན་རིང་ཡལ་ཀ་འཁྲུང་བ་བཞིན། །མི་དེ་རྟགས་ཙམ་ཡུན་རིང་ན། །ཁ་ན་མ་ཐོའི་གཏམ་འཕེལ་དང་། །སྡིག་པའི་ལས་རྣམས
135b5 འཕེལ་བར་བཤད། །ཚུལ་ཁྲིམས་འདི་ནི་བདེ་བའི་མཆོག་།ཚུལ་ཁྲིམས་འདི་ནི་ཐར་པའི་ལམ། །ཚུལ་ཁྲིམས་འདི་ནི་ཡོན་ཏན་ཞིང་། །ཚུལ་ཁྲིམས་འདི་ནི་སངས་རྒྱས་རྒྱུ། །ཚུལ་ཁྲིམས་འདི་ནི་རབ་མཆོག་ཡིན། །མིག
135b6 གི་འབྲས་བུ་བཞིན་དུ་སྲུངས། །སྲོག་ལ་བབ་ཀྱང་ཚུལ་ཁྲིམས་ནི། །གཏོང་བ་མི་མཁས་བླུན་པོ་ཡིན། །སྲོག་ཆད་ཕྱི་མར་སྐྱེ་བ་སྟེ། །ཚུལ་ཁྲིམས་ཕྱི་ནས་དེ་ལྟར་མིན། །དེ་བས་ཉེ་བར་འཁོར་སོགས་ཀྱིས། །འདི་ཉིད་ལ
135b7 ནི་བརྟན་པར་ཟུང་། །དེ་སྐད་ཅེས་བཅོམ་ལྡན་འདས་ཀྱིས་བཀའ་སྩལ་ཏེ། ཉེ་བར་འཁོར་ལ་སོགས་པ་དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དགེ་སློང་ལ་རབ་ཏུ་གཅེས་པའི་མདོ་ཞེས་བྱ་བ་རྫོགས་སོ།། །།
135b8 @##། །རྒྱ་གར་སྐད་དུ། ཤཱི་ལ་སཾ་ཡུག་ཏ་སཱུ་ཏྲ། བོད་སྐད་དུ། ཚུལ་ཁྲིམས་ཡང་དག་པར་ལྡན་པའི་མདོ། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན
iiif viewer powered by OpenSeadragon
