| e-texts navigator |
| Wylie |
321b1 ཡོད་དེ། འདི་ལྟ་སྟེ། གང་དེ་ཉིད་ཀྱི་མཚན་མོའི་གུང་ཐུན་ལ་མཚན་གྱིས་རྣམ་པར་བརྒྱན་པ། དཔེ་བྱད་བཟང་པོས་རྣམ་པར་མཛེས་པར་བྱས་པའི་སྐུ་འདི་དང་སྟོབས་དེ་དག་གི་སྣོད་དུ་གྱུར་པའི་སྐུ་སྲོག་འདི་རབ་ཏུ
321b2 འཇོམས་པར་འགྱུར་བའི་མི་རྟག་པ་ཉིད་ཀྱི་སྟོབས་ཤེས་བྱའོ། །གནས་འཇོག་གི་རྒྱུད་དག་འདི་ནི་གང་སྟོབས་དེ་དག་ལས་ཆེས་སྟོབས་དང་ལྡན་ཞིང་། གང་སྟོབས་དེ་དག་ཟིལ་གྱིས་གནོན་པར་བྱེད་པའི་སྟོབས
321b3 གཞན་དེ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ། ཚིགས་སུ་བཅད་པ་དག་བཀའ་སྩལ་པ། ལུས་ལས་བྱུང་བའི་སྟོབས་དང་བསོད་ནམས་སྟོབས། །ཡེ་ཤེས་སྟོབས་དང་རྫུ་འཕྲུལ་སྟོབས་པས་ཀྱང་། །
321b4 ང་ཡི་གཟི་བརྗིད་འཇོམས་པ་མི་རྟག་ཉིད། །མཆོག་ཏུ་སྟོབས་དང་ལྡན་པར་བཞེད་པ་ཡིན། །གང་དུ་དེ་དང་འདྲ་བའི་སྐུ་ལུས་ནི། །གསེར་གྱི་རི་ཡི་དབང་པོའི་རྩེ་མོ་འདྲ། །མི་རྟག་ཉིད་ཀྱི་གཟི་བརྗིད་ཀྱིས་བཅོམ་པ། །
321b5 ང་ཡི་འཇིག་པ་འོང་བར་འགྱུར་བ་ཡིན། །མི་རྟག་ཉིད་ཀྱི་སྟོབས་ནི་སྟོབས་མཆོག་བར། །མཁས་པ་ཡིས་ནི་རྣམ་པར་ཤེས་བྱ་སྟེ། །གང་དུ་མི་རྟག་ཉིད་ནི་མི་འོང་བའི། །མི་འཆི་བ་ཡི་གནས་དེ་ཐོབ་པར་བྱ། །
321b6 བཅོམ་ལྡན་འདས་ལས་ཀུ་ཤའི་གྲོང་ཁྱེར་ནས་སྐྱེས་པའི་གྱད་རྣམས་ཀྱིས་དེ་སྐད་ཐོས་ནས་རྨོངས་པར་གྱུར་ཏེ། ཇི་ལྟར་ཡང་འདུ་ཤེས་ཐོབ་པ་དག་ཏུ་གྱུར་ནས་ས་ལ་འགྲེ་ལྡོག་སྟེ། འདི་ལྟ་སྟེ་ཤིང་གི་སྡོང་དུམ
321b7 བཞིན་ནོ། །ཁ་ཅིག་ནི་དཔུང་པ་དག་བསྣོལ་ཏེ་རབ་ཏུ་ངུ་བར་བྱེད་དོ། །ཁ་ཅིག་ནི་སེམས་ཀྱི་སྡུག་བསྔལ་དང་ཀུན་དུ་ལྡན་ཞིང་འཁོད་དོ། །ཁ་ཅིག་ནི་ཆོས་ཉིད་ཁོ་ན་ལ་རྟོན་པར་བྱེད་དེ། བཅོམ་ལྡན་འདས་ཀྱིས་བདག
321b8 ཅག་ལ་ཡང་དང་པོ་ཉིད་དུ་འདོད་པ་དང་། སྡུག་པ་དང་། དགའ་བ་དང་། ཡིད་དུ་འོང་བ་ཐམས་ཅད་ལས་དངོས་པོ་ཐ་དད་པ་དང་། མེད་པར་འབྱུང་བ་དང་། འབྲལ་བ་དང་མི་ལྡན་པ་འབྱུང་བར་འགྱུར་རོ་ཞེས་གསུངས་སོ་སྙམ་མོ། །
iiif viewer powered by OpenSeadragon
