| e-texts navigator |
| Wylie |
75a1 འགྲོ་བ་ཐ་དད་པའི་ཆོས་ལས་འདས་ཤིང་འཇིག་རྟེན་ལས་འདས་པའི་ཆོས་ཐོབ་པ་དེ་ནི་དགེ་སློང་ཡང་དག་པར་གྱུར་པ་སྟེ། དད་པས་བྱིན་པ་སྤྱོད་པའི་མཆོད་གནས་སོ། །དེ་ནས་བྱམས་པ་བྱང་ཆུབ་སེམས་དཔས
75a2 འཇིག་རྟེན་གྱི་དབང་པོ་བྱང་ཆུབ་སེམས་དཔའ་ལ་སྨྲས་པ། བཅོམ་ལྡན་འདས་ཀྱིས་ཅི་ལས་དགོངས་ཏེ། བརྩོན་པ་མི་འདོར་བའི་དགེ་སློང་གང་གིས་གཟུགས་མི་འདོར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར
75a3 ཤེས་པ་མི་འདོར་བ་དེ་ནི་རབ་ཏུ་བྱུང་བའི་དགེ་སློང་སྟེ། དེ་ནི་དགེ་བར་གསུངས་པའི་ཆོས་ཀྱིས་འདུལ་བ་ལ་ཤིན་དུ་རབ་ཏུ་བྱུང་བར་གྱུར་པས་ན་འདི་ལྟ་བུའི་དགེ་སློང་ནི་དད་པས་བྱིན་པ་སྤྱོད་པའི་མཆོད་གནས་སུ་གྱུར་པའོ་ཞེས་གསུངས།
75a4 འཇིག་རྟེན་གྱི་དབང་པོས་སྨྲས་པ། ཀྱེ་རྒྱལ་བའི་སྲས་བཅོམ་ལྡན་འདས་ཀྱིས་ཆོས་ཉིད་ལ་དགོངས་ཏེ་ཆོས་ཀྱི་དབྱིངས་ནང་ན་ཡང་མེད། ཕྱི་ན་ཡང་མེད་དེ། གཉི་གར་ཡང་དམིགས་སུ་མེད་པས་ན་ནད་མེད་པར་བཏགས་པ་དང་།
75a5 མི་སྐྱེ་བར་བཏགས་པ་དང་། མི་འགག་པར་བཏགས་པ་རྣམས་གདགས་སུ་མེད་པ་སྟེ། སེམས་ཅན་གྱི་ཁམས་མཉམ་པ་བཞིན་དུ་ཆོས་ཀྱི་དབྱིངས་མཉམ་པ་ཉིད་ཆོས་ཀྱི་དབྱིངས་མཉམ་པ་བཞིན་དུ་སེམས་ཅན་གྱི་ཁམས
75a6 མཉམ་པ་ཉིད་དང་། ཆོས་ཀྱི་དབྱིངས་མཉམ་པ་ཉིད་དུ་མི་གཉིས་ཏེ་གཉིས་སུ་མེད་དོ། །དེ་མི་གཉིས་ཏེ་གཉིས་སུ་མེད་པས་ན་དེ་ལ་དོར་བ་ཡང་མེད། མི་དོར་བ་ཡང་མེད། གང་དོར་བ་ཡང་མེད། མི་དོར་བ་ཡང་མེད་པས
75a7 ན་དེ་ལ་འདའ་བ་དང་། ཐོབ་པར་མི་ནུས་ཏེ་བཅོམ་ལྡན་འདས་ཀྱིས་ཀྱང་འདི་ལྟར་དགོངས་ནས་གདགས་སུ་མེད་པའི་དགེ་སློང་བཏགས་པ་ལ་མི་འཇུག་གོ། །གང་ཡི་གེ་མེད་པའི་དགེ་སློང་ཡི་གེ་ལས་འདས་པ་སྟེ།
75a8 དེ་ལ་གྲངས་ཀྱིས་བསྟན་པར་ཡང་མི་རུང་སྟེ། དེ་ནི་མི་འོང་མི་འགྲོ་མི་གནས་མི་འདུག་ཉལ་བར་ཡང་མི་རྟོག་གོ། ཞི་བ་དང་ཉེ་བར་ཞི་བ་རྣམས་མི་དམིགས་པའི་དགེ་སློང་ལ་བརྟགས་པ་སྟེ། སྤྱོད་པ་རྣམས་ཀྱང་བརྟགས་པའོ། །
iiif viewer powered by OpenSeadragon
