| e-texts navigator |
| Wylie |
70a1 ཡུད་ཙམ་ཅིག་གིས་བགྲང་བར་སྤྲོའི། བཅོམ་ལྡན་འདས་བདག་གིས་བྱང་ཆུབ་སེམས་དཔའ་འདི་དག་ནི་ལོ་བརྒྱར་ཡང་བགྲང་བར་སྤྲོ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་གལ་ཏེ་འཛམ་བུའི
70a2 གླིང་འདི་རྡུལ་ཕྲ་རབ་ཀྱི་རྡུལ་གྱིས་གང་བར་གྱུར་ཀྱང་རྡུལ་ཕྲ་རབ་དེ་བགྲང་བའི་ཚུལ་གྱིས་མཐའ་རྟོགས་པར་ནུས་ཀྱི། བྱང་ཆུབ་སེམས་དཔའ་འདི་དག་ནི་བགྲང་བའི་ཚུལ་གྱིས་མཐའ་རྟོགས་པར་མི་ནུས་ཏེ། བྱང་ཆུབ་སེམས་དཔའ་འདུས
70a3 པ་འདི་དག་ནི་དེ་ཙམ་དུ་ཚད་མེད་དོ། །གསོལ་པ། བཅོམ་ལྡན་འདས་བྱང་ཆུབ་སེམས་དཔའ་འདི་དག་གང་དུ་བྱང་ཆུབ་མངོན་པར་རྫོགས་པར་འཚང་རྒྱ་བའི་སངས་རྒྱས་ཀྱི་ཞིང་དེ་སྙེད་མཆིས་པར་ག་ལ་འགྱུར། བཅོམ་ལྡན་འདས་ཀྱིས་བཀའ
70a4 སྩལ་པ། ཤཱ་རིའི་བུ་ཁ་རོག་འདུག་དེ་སྐད་མ་སྨྲ་ཤིག་།ཤཱ་རིའི་བུ་སངས་རྒྱས་ཀྱི་ཞིང་ཚད་མེད་པ་དག་དེ་བཞིན་གཤེགས་པས་སྟོང་ངོ་། །ཤཱ་རིའི་བུ་ཡོངས་སུ་བརྟགས་པ་བཟུང་ན། གལ་ཏེ་དེ་བཞིན་གཤེགས་པའི་ཚེའི་ཚད་བསྐལ
70a5 པ་གང་གཱའི་ཀླུང་གི་བྱེ་མ་སྙེད་དུ་གྱུར་ལ། ཉི་མ་རེ་རེ་ཐམས་ཅད་ལ་འང་ཆོས་བཤད་པ་གང་གཱའི་ཀླུང་གི་བྱེ་མ་སྙེད་འཇུག་པར་གྱུར་ཅིང་ཆོས་བཤད་པ་ཐམས་ཅད་ལ་འང་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་ལུང་བསྟན་པར
70a6 གྱུར་ལ། གང་གིས་ཤར་ཕྱོགས་སུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་འདས་ནས། བྱང་ཆུབ་སེམས་དཔའ་གཅིག་མཚན་མར་བཞག་ཀྱང་། སངས་རྒྱས་ཀྱི་ཞིང་རྣམས་དེ་བཞིན་གཤེགས་པ་དག་གིས་དེ་ཙམ་དུ་སྟོང་ན།
70a7 ཕྱོགས་བཅུའི་སངས་རྒྱས་ཀྱི་ཞིང་གང་དེ་བཞིན་གཤེགས་པའི་ཤའི་སྤྱན་ཐ་མལ་པས་གཟིགས་པར་འགྱུར་བའི་སངས་རྒྱས་ཀྱི་ཞིང་དེ་དག་ཏུ་སྐྱེས་པའི་སེམས་ཅན་དེ་དག་གི་སེམས་དེ་བཞིན་གཤེགས་པས་མཁྱེན་པའི་དེ་བཞིན
70a8 གཤེགས་པ་དེ་དག་གིས་སྟོང་པ་ལྟ་ཅི་སྨོས། དེ་ནས་ཉན་ཐོས་ཆེན་པོ་དེ་དག་དང་ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས། ཚིག་འདི་སྐད་དུ་བདག་ཅག་གི་སྟོན་པ་དེ་དག་དེ་ལྟར་རྫུ་འཕྲུལ་ཆེ། དེ་ལྟར་མཐུ་ཆེ། དེ་ལྟར
iiif viewer powered by OpenSeadragon
