| e-texts navigator |
| Wylie |
38b1 གསེར་དུལ་མ་མ་ཡིན་པ་འདི་ཇི་ལྟར་ན་དུལ་མར་འགྱུར་སྙམ་ནས་དེའི་ཕྱིར་མེར་འཇུག་སྟེ། ཤིན་དུ་བསྲེགས་པའི་ཕྱིར་རིན་པོ་ཆེའི་འོས་སུ་འགྱུར་རོ། །རིན་པོ་ཆེས་སྤྲས་པ་དེའི་རིན་ཐང་མེད་པར་འགྱུར་ཏེ། དྲང་སྲོང་ཆེན་པོ་དེའི་ཕྱིར་གསེར
38b2 བརྡུང་བ་དང་བསྲེག་པས་རྣམ་པར་སྦྱོང་ངོ་། །དྲང་སྲོང་ཆེན་པོ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་རྒྱུ་མེད་པར་སྲེག་པའི་བསྐལ་པ་མི་འབྱིན་ཏེ། འདིར་སེམས་ཅན་གང་ལ་ཡང་གནོད་པར་མི་འགྱུར་རོ། །དེ་ནས་བཅོམ་ལྡན
38b3 འདས་ལ་དྲང་སྲོང་ཆེན་པོ་མེ་སྒྲོན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བསྐལ་པས་སྲེག་པའི་མེ་ཕྱུང་ཡང་སེམས་ཅན་གང་ལ་ཡང་གནོད་པར་མི་འགྱུར་བ་ནི་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ།
38b4 དྲང་སྲོང་ཆེན་པོ་དེ་བཞིན་གཤེགས་པ་རྣམས་ནི་སེམས་ཅན་གང་ལ་ཡང་གནོད་པར་མི་མཛད་དོ། །དྲང་སྲོང་ཆེན་པོ་འདི་ལྟ་སྟེ། དཔེར་ན་ཕྱོགས་བཅུ་རྣམས་སུ་ཆར་ཕྲ་མོའི་རྒྱུན་འབབ་པ་དེ་བས་ནི་དྲང་སྲོང་ཆེན་པོ་དེ་བཞིན་གཤེགས་པ་རྣམས་དང་།
38b5 ས་བཅུ་ལ་གནས་པའི་བྱང་ཆུབ་སེམས་དཔའ་རྣམས་ཉེ་བར་གནས་ཏེ། རང་གི་ལག་གིས་སེམས་ཅན་ཐར་པར་བྱེད་པ་ནི་ཆེས་མང་ངོ་། །དྲང་སྲོང་ཆེན་པོ་དེའི་ཚེ་སེམས་ཅན་དེ་དག་གིས་དེ་བཞིན་གཤེགས་པ་དང་། བྱང་ཆུབ་སེམས་དཔའ
38b6 དེ་དག་གི་གཟུགས་ཀྱང་མཐོང་། ཁ་དོག་མཛེས་པ་ཡང་མཐོང་། བསྐལ་པས་བསྲེགས་པའི་འཇིགས་པ་ལས་བདག་ཉིད་སྒྲོལ་བ་ཡང་མཐོང་ནས་དགའ་བ་དང་། མཆོག་ཏུ་དགའ་བ་སྐྱེས་ཏེ་འདི་སྐད་ཅེས་བདག་ཅག་ཀྱང་འདི་ལྟར
38b7 སྒྲོལ་བ་པོར་གྱུར་ཅིང་བདག་ཅག་ཀྱང་འདི་ལྟར་གཟུགས་མཛེས་པར་གྱུར་ཅིག་། བདག་ཅག་ཀྱང་འདི་ལྟར་ཁ་དོག་མཛེས་པར་གྱུར་ཅིག་ཅེས་འཛེར་ཏེ། ཁ་ཅིག་ནི་ཡིད་བྱུང་ནས་སེམས་རྣམ་པར་གྲོལ་ཏེ་རྒྱུན་དུ་ཞུགས་པའི་འབྲས་བུ
38b8 མངོན་སུམ་དུ་བྱེད། ཁ་ཅིག་ནི་ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་མངོན་སུམ་དུ་བྱེད། ཁ་ཅིག་ནི་དགྲ་བཅོམ་པ་ཉིད། ཁ་ཅིག་ནི་རང་བྱང་ཆུབ། ཁ་ཅིག་ནི་མི་སྐྱེ་བའི་ཆོས་ལ་བཟོད་པ་རབ་ཏུ
iiif viewer powered by OpenSeadragon
