| e-texts navigator |
| Wylie |
36b1 ལྷོ་ཕྱོགས་པ་དང་། ནགས་ཁྲོད་པ་དཔག་ཏུ་མེད་པ་ཕྱུང་། རྒྱལ་རིགས་ཤིང་སཱ་ལ་ཆེན་པོ་ལྟ་བུ་དང་། བྲམ་ཟེ་དང་ཁྱིམ་བདག་ཤིང་སཱ་ལ་ཆེན་པོ་ལྟ་བུ་དང་། མི་གཟུགས་དང་། ཆ་བྱད་དང་། མདོག་དང་། སྨྲ་བའི་སྐད་སྣ་ཚོགས་པ་ཇི་སྙེད
36b2 པ་དང་། ལྷའི་རིས་ཇི་སྙེད་པ་དེ་དག་ཐམས་ཅད་དེ་བཞིན་གཤེགས་པའི་སྐུ་ལས་ཕྱུང་ངོ་། །དེ་ནས་འཁོར་ཆེན་པོ་དེ་ཐེ་ཚོམ་དུ་གྱུར་ནས་ཕན་ཚུན་གདོང་དུ་ལྟའོ། །བྱང་ཆུབ་སེམས་དཔའ་རྣམས་རབ་ཏུ་དགའ་སྟེ། རིན་པོ་ཆེའི་ཆར་འབེབས་པ
36b3 ནས་རྒྱན་ཐམས་ཅད་ཀྱི་བར་གྱི་ཆར་འབེབས་སོ། །དེ་ནས་བཅོམ་ལྡན་འདས་རིན་པོ་ཆེ་གཏོང་བའི་ཏིང་ངེ་འཛིན་ལས་བཞེངས་ཏེ། སེང་གེ་བསྒྱིངས་པས་ཕྱོགས་བཅུར་རྣམ་པར་གཟིགས་སོ། །བཅོམ་ལྡན་འདས་ཀྱིས་ཕྱོགས
36b4 བཅུར་གཟིགས་མ་ཐག་ཏུ་དེ་ནས་ཕྱོགས་བཅུའི་སངས་རྒྱས་ཀྱི་ཞིང་དག་ནས་སངས་རྒྱས་བཅོམ་ལྡན་འདས་ཇི་སྙེད་སངས་རྒྱས་ཀྱི་སྤྱན་ལ་སྣང་བ་དེ་དག་ཐམས་ཅད་ལག་མཐིལ་དུ་བཞག་པ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་སུ་ཀུན་དུ་སྣང་ངོ་། དེ་བཞིན་གཤེགས་པ་ཐམས་ཅད་ཀྱིས་ཀྱང་བཅོམ་ལྡན་འདས་ཤཱཀྱ་ཐུབ་པས་ཇི་ལྟར་ཕྱུང་བ་དེ་འདྲ་བའི་རྫུ་འཕྲུལ་གྱི་ཆོ་འཕྲུལ་ཕྱུང་སྟེ།
36b5 དེ་བཞིན་གཤེགས་པ་རྣམས་ཀྱི་སྤྲུལ་པ་ཕྱུང་བ་ཇི་སྙེད་པ་དེ་དག་ཐམས་ཅད་ཀྱང་བཅོམ་ལྡན་འདས་ག་ལ་བ་དེ་ལོགས
36b6 སུ་དོང་སྟེ་ཕྱིན་ནས་བཅོམ་ལྡན་འདས་ཀྱི་འཁོར་གྱི་ནང་དུ་འདུས་པར་གྱུར་ཏོ། །བྱང་ཆུབ་སེམས་དཔའ་དཔག་ཏུ་མེད་པ་དག་ཀྱང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་གང་གཱའི་བྱེ་མ་སྙེད་དག་དང་ལྷན་ཅིག་ཏུ
36b7 དེ་བཞིན་གཤེགས་པ་ལ་མཆོད་པ་ཆེན་པོ་དཔེ་མེད་པ་ཐོགས་ཏེ་འདིར་ལྷགས་སོ། །དེ་བཞིན་དུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ
36b8 ཡིན་པ་དུ་མ་དེ་དག་ཀྱང་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་དེ་མཐོང་ནས་བཅོམ་ལྡན་འདས་ག་ལ་བ་དེར་དོང་ངོ་། །དེ་ནས་གང་དག་ཕྱོགས་བཅུ་ནས་ལྷགས་པའི་བྱང་ཆུབ་སེམས་དཔའ་དེ་དག་གིས་མཆོད་པ་བླ་ན་མེད་པས་བཅོམ་ལྡན་འདས
iiif viewer powered by OpenSeadragon
