| e-texts navigator |
| Wylie |
235b1 སེམས་དཔའ་ཀླུས་བྱིན་གྱིས་སྨྲས་པ། སེམས་སྙོམས་པ་དང་། སེམས་དུལ་བ་དང་། སེམས་འཇམ་པ་དང་། སེམས་དྲང་བ་དང་། སེམས་མཉེན་པ་དང་། སེམས་ཅང་ཤེས་པའི་ཕྱིར་ཐམས་ཅད་མཁྱེན་པའི་ཡེ་ཤེས་ཀྱི་ཡི་དམ་བརྟན
235b2 པོ་སྙིང་པོ་ལ་གནས་པའི་གོ་ཅ་བགོས་པས་ཐམས་ཅད་མཁྱེན་པའི་ཡེ་ཤེས། ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་དཔལ་འབྱུང་གིས་སྨྲས་པ། ཀྱེ་གྲོགས་པོ་དག་བསྐལ་པའི་གྲངས་ཀྱིས་ཡེ་ཤེས
235b3 ཆེན་པོ་དེ་རྟོགས་པར་མི་ནུས་ཀྱི། བསྐལ་པ་དཔག་ཏུ་མེད་པར་གོ་ཆ་བགོས་པས་ཐམས་ཅད་མཁྱེན་པའི་ཡེ་ཤེས་དེ་རྟོགས་པར་ནུས་སོ། །བྱང་ཆུབ་སེམས་དཔའ་དཔལ་གྱི་སྙིང་པོས་སྨྲས་པ། རིགས་ཀྱི་བུ་བྱང་ཆུབ་སེམས
235b4 དཔའ་བདག་གི་བདེ་བ་ལ་ཆགས་ཤིང་གནས་པས་ཡེ་ཤེས་ཆེན་པོ་དེ་རྟོགས་པར་མི་ནུས་ཀྱི། བདག་གི་བདེ་བ་ལ་མ་ཆགས་པས་ཐམས་ཅད་མཁྱེན་པའི་ཡེ་ཤེས་དེ་རྟོགས་པར་ནུས་ཏེ། གང་ཟང་ཟིང་མེད་པ་ལན་དུ་བྱ་བ་མ
235b5 ཡིན་པའི་བདེ་བ་དེ་སེམས་ཅན་ཐམས་ཅད་ལ་བསྟབས་སོ་ཞེས་སེམས་ཅན་ཐམས་ཅད་བདེ་ཞིང་བདེ་བ་དང་ལྡན་པ་ལ་གཞོག་པར་བྱེད་པ་དེས་ཐམས་ཅད་མཁྱེན་པའི་ཡེ་ཤེས་དེ་རྟོགས་པར་ནུས་སོ། །བྱང་ཆུབ་སེམས་དཔའ་པད་མ་བླ
235b6 མའི་དཔལ་གྱིས་སྨྲས་པ། བདག་ཉིད་མ་དུལ། མ་བསྲུངས། མ་བྱང་བ་དེས་ཕ་རོལ་མ་དུལ་མ་བསྲུངས། མ་བྱང་བ་དུལ་བར་བྱ་བ་དང་། ཞི་བར་བྱ་བའི་གནས་དེ་ནི་མེད་ཀྱི། བདག་ཉིད་ཤིན་དུ་དུལ། ཤིན་དུ་བསྲུངས། ཤིན་དུ་བྱང་བ་དེས
235b7 ཕ་རོལ་མ་དུལ། མ་བསྲུངས། མ་བྱང་བ། དུལ་བར་བྱ་བ་དང་། ཞི་བར་བྱ་བའི་གནས་དེ་ནི་ཡོད་དོ་ཞེས་བཅོམ་ལྡན་འདས་ཀྱིས་ཀྱང་དེ་སྐད་གསུངས་ཏེ། དེ་བས་ན་དུལ་བ་དང་ཞི་གནས་ཀྱི་རྣལ་འབྱོར་ལ་ཞུགས་ཤིང་ཕ་རོལ་དུལ་བ་དང་། ཞི
235b8 གནས་དང་འཐུན་པར་བྱ་བ་ལ་མཁས་པས་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་པད་མ་དཔལ་འབྱུང་གིས་སྨྲས་པ། ཀྱེ་གྲོགས་པོ་དག་འཇིག་རྟེན་གྱི་ཆོས་དང་འབྲེལ་པས་འཇིག་རྟེན་ལས་འདའ
iiif viewer powered by OpenSeadragon
