| e-texts navigator |
| Wylie |
230a1 ཉིད་དུ་དྲེགས་པར་གྱུར་ཏོ། །དེ་ནས་རྒྱལ་པོ་གཟུགས་ཅན་སྙིང་པོའི་ཕོ་བྲང་གི་སྒོར་གདན་བཤམས་པ་ལ་བཅོམ་ལྡན་འདས་འཁོར་དང་བཅས་པ་བཞུགས་སོ། །དེ་ལྟར་བཞུགས་པར་ཤེས་ནས་རྒྱལ་པོས་གྱད
230a2 ཆེན་པོའི་འདེགས་པ་ཞེས་བྱ་བ་རྦད་དེ་རྡོ་ཤིན་དུ་ཆེ་བ་བཅོམ་ལྡན་འདས་ལ་འཕངས་སོ། །རྡོ་དེ་ནམ་མཁའ་ལ་ལྡིང་ཞིང་དེ་ལས་སྒྲ་འདི་སྐད་ཅེས་གྲག་གོ། །ཀྱེ་མ་འདུས་བྱས་རྟག་པ་མེད། །སྐྱེ་ཞིང་འགོག་པའི་ཆོས་ཅན་ཡིན། །
230a3 སྐྱེ་བ་ཡོད་ན་འཆི་བ་ཡོད། །འདུ་བ་ཡོད་ན་འབྲལ་བ་ཡོད། །བསགས་པ་ཡོད་ན་འཛད་པ་ཡོད། །ལང་ཚོའི་མདོག་ཀྱང་ནད་ཀྱིས་འཕྲོག་།འཚོ་བའི་ཚེ་ཡང་འཆི་བས་འཕྲོག་།ཆགས་པར་གྱུར་ན་སྡུག་བསྔལ་འཕེལ། །སྐྱོ་བར
230a4 བྱས་ན་ཐར་བར་འགྱུར། །ཞེས་པ་དེ་རྒྱལ་པོ་གཟུགས་ཅན་སྙིང་པོས་ཐོས་པས་མོས་པར་གྱུར་ཏེ་ཐད་དུ་སོང་ནས་ཐལ་མོ་སྦྱར་ཏེ་འཁོད་པ་ལ་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཆོས་ལ་མོས་པར་བྱ།
230a5 ཁོང་དུ་ཆུད་པར་བྱ། བསྒོ་བར་བྱ་ཡིད་འབྱུང་བར་བྱའོ། །རྒྱལ་པོས་གསོལ་པ། བཅོམ་ལྡན་འདས་གང་ལ་སྐྱོ་བར་བགྱི། ཡིད་འབྱུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཁོར་བ་ལས་སྐྱོ་ཞིང་ཡིད་འབྱུང་བར་བྱའོ། །
230a6 རྒྱལ་པོས་གསོལ་པ། ཅིའི་ཕྱིར་འཁོར་བ་ལས་སྐྱོ་ཞིང་ཡིད་འབྱུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཁོར་བ་འདི་མི་རྟག་པ་དང་། སྡུག་བསྔལ་བའི་ཕྱིར་རོ། །རྒྱལ་པོས་གསོལ་པ། བཅོམ་ལྡན་འདས
230a7 འཁོར་བ་འདི་ཇི་སྐད་མི་རྟག་པ་ལགས། བཅོམ་ལྡན་འདས་ཀྱིས་བཀའ་སྩལ་པ། སྣོད་ཀྱི་འཇིག་རྟེན་འདི་ཡང་མི་རྟག་ལ། བཅུད་ཀྱི་སེམས་ཅན་ཡང་མི་རྟག་གོ། །རྒྱལ་པོས་གསོལ་པ། སྣོད་ཀྱི་འཇིག་རྟེན་ཇི་ལྟར་མི
230a8 རྟག་པ་ལགས། བཅོམ་ལྡན་འདས་ཀྱིས་བཀའ་སྩལ་པ། སྣོད་ཀྱི་འཇིག་རྟེན་རི་རབ་གླིང་ཁམས་ཀྱང་། །འཇིག་པའི་དུས་ཚེ་བསྐལ་པའི་མེ་བྱུང་ནས། །ཐལ་བའི་ལྷག་མ་ཙམ་ཡང་མ་ལུས་སོ། །ཆུ་དང་རླུང་གིས་འཇིག
iiif viewer powered by OpenSeadragon
