| e-texts navigator |
| Wylie |
331b1 རྣམས་དཔག་མེད་ལ། །རང་སངས་རྒྱས་ནི་ཐམས་ཅད་དང་། །ཉན་ཐོས་དག་གིས་རྣམ་ཀུན་དུ། །རྫོགས་པའི་སངས་རྒྱས་བསགས་པ་ན། །དེ་བཞིན་གཤེགས་པ་སྤྲོས་མེད་ལ། །བྱིས་པ་སྤྲོས་པ་སྤྱོད་པ་ཡི། །
331b2 སེམས་ཅན་ཀུན་གྱིས་རྒྱལ་བ་རྣམས། །རིག་པར་མི་ནུས་སྨོས་ཅི་དགོས། །སངས་རྒྱས་ཀྱིས་ནི་སངས་རྒྱས་དང་། །སངས་རྒྱས་ཆོས་ཉིད་གང་ཡིན་དང་། །རང་བྱུང་སྐུ་ཐུགས་ཅི་འདྲ་དང་། །ཤེས་རབ་ཅི་འདྲ་རབ
331b3 ཏུ་མཁྱེན། །འཇིག་རྟེན་དུ་ནི་འཇིག་རྟེན་སྒྲོན། །རྣམ་པར་འདྲེན་པ་རྣམས་བྱུང་ཡང་། །འཇིག་རྟེན་དང་ནི་འདྲེས་མེད་ལ། །འཇིག་རྟེན་དུ་ཡང་སྣང་བ་སྟོན། །སྐུ་དང་སྐུ་ཡི་ཕྲིན་ལས་དང་། །གསུང་གིས་གང་དག
331b4 བརྗོད་པ་དང་། །ཡིད་དང་ཡིད་ཀྱི་རྣམ་རྟོག་རྣམས། །རྒྱལ་བའི་ཐམས་ཅད་འཇིག་རྟེན་འདས། །འཇིག་རྟེན་ན་ནི་ཐུགས་བརྩེ་བས། །འཇིག་རྟེན་མགོན་པོ་འོད་མཛད་པ། །འཇིག་རྟེན་ཇི་ལྟར་རྟོག་པ་བཞིན། །
331b5 སེམས་ཅན་རྣམས་ལ་ཆོས་སྟན་ཏོ། །འཇིག་རྟེན་འདས་པའི་སྤྱོད་རྣམས་ཀྱིས། །སངས་རྒྱས་ཐམས་ཅད་ཡང་དག་འཕགས། །དེ་དག་ཕྲིན་ལས་འཇིག་རྟེན་འདས། །རྣམ་པར་སྨིན་པ་བླ་ན་མེད། །
331b6 གལ་ཏེ་འཇིག་རྟེན་རྣམ་འདྲེན་རྣམས། །འཇིག་རྟེན་འཐུན་པར་མི་འཇུག་ན། །སངས་རྒྱས་ཆོས་ཉིད་གང་ཡིན་དང་། །སངས་རྒྱས་སུས་ཀྱང་ཤེས་མི་འགྱུར། །འཇིག་རྟེན་ཀུན་ལ་ཕན་བཞེད་པ། །སྐྱོབ་པ
331b7 རྫུ་འཕྲུལ་ལྡན་པ་པོ། །རང་བྱུང་སྡིག་པ་མི་མངའ་བ། །དེ་དག་གཡོ་བ་བསམ་མི་ཁྱབ། །བདེ་བར་གཤེགས་པ་རྣམས་ཀྱི་སྐུ། །འཁྲིག་པ་ལས་ནི་བྱུང་མིན་ལ། །ཡབ་དང་ཡུམ་ཡང་སྟོན་མཛད་པ། །འདི་ནི
331b8 འཇིག་རྟེན་འཐུན་འཇུག་ཡིན། །བསྐལ་པ་བྱེ་བ་གྲངས་མེད་ནས། །ཤེས་རབ་ཕ་རོལ་ཕྱིན་ལས་བྱུང་། །འོན་ཀྱང་བྱིས་པ་ཉིད་སྟོན་པ། །འདི་ནི་འཇིག་རྟེན་འཐུན་འཇུག་ཡིན། །སངས་རྒྱས་འོད་ནི་དཔག་མེད་དེ། །
iiif viewer powered by OpenSeadragon
