| e-texts navigator |
| Wylie |
6b1 ཡིན་པའི་ངོ་བོ་ཉིད་དོ། །མིག་འཕྲུལ་ནི་བཅོས་མ་ཙམ་དུ་དགོས་པའོ། །གྲོགས་པོ་དག་དེ་དེ་བཞིན་དེ། དངོས་པོ་ཇི་སྙེད་པ་ཐམས་ཅད་ནི་སྒྱུ་མ་དང་། རྨི་ལམ་དང་། མིག་འཕྲུལ་དང་འདྲ་བར་ཤེས་པར་བྱའོ། །གཞན་ཡང་ཀུན་རྫོབ་དང་། དོན་དམ་པ
6b2 དག་བསྟན་པར་བྱ་སྟེ། དེ་ལ་ཀུན་རྫོབ་ཅེས་བྱ་བ་ནི་འདི་ནི་བདག་གོ། །འདི་ནི་གཞན་ནོ་ཞེས་བྱ་བ་དང་། སྲོག་དང་། སྐྱེས་བུ་དང་། གང་ཟག་དང་། བྱེད་པ་པོ་དང་། ཚོར་བ་པོ་དང་། ནོར་དང་། བུ་དང་། ཆུང་མ་དང་། མཛའ་བཤེས་དང་། ཉེ་དུ་ལ་སོགས་པར་རྟོག་པ་དེ་ནི
6b3 ཀུན་རྫོབ་ཅེས་བྱའོ། །གང་ལ་བདག་མེད་པ་དང་། གཞན་མེད་པ་དང་། སྲོག་མེད་པ་དང་། སྐྱེས་བུ་མེད་པ་དང་། གང་ཟག་མེད་པ་དང་། བྱེད་པ་པོ་མེད་པ་དང་། ཚོར་བ་པོ་མེད་པ་དང་། ནོར་མེད་པ་དང་། བུ་མེད་པ་དང་། ཆུང་མ་མེད་པ་དང་། མཛའ
6b4 བཤེས་མེད་པ་དང་། ཉེ་དུ་ལ་སོགས་པ་མེད་པ་དེ་ནི་དོན་དམ་པ་ཞེས་བྱའོ། །གང་ལ་རང་བཞིན་གྱིས་དངོས་པོ་ཐམས་ཅད་དུ་ཡོངས་སུ་བརྟགས་ཤིང་དགེ་བ་དང་། མི་དགེ་བའི་འབྲས་བུ་དང་། སྐྱེ་བ་དང་། འགག་པ་ནི་ཀུན་རྫོབ་བོ། །དགེ་བ་དང
6b5 མི་དགེ་བའི་འབྲས་བུ་མེད་པ་དང་། སྐྱེ་བ་མེད་པ་དང་། འགག་པ་མེད་པ་དེ་བཞིན་ཉིད་ཀྱི་ངོ་བོ་ཉིད་དེ་ལ་ནི་ཀུན་ནས་ཉོན་མོངས་པ་དང་། རྣམ་པར་བྱང་བ་མེད་དེ། དེ་ནི་དབུ་མའི་ཆོས་རྣམས་ཀྱི་སྒྲུབ་པ་ལྷུར་ལེན་པའོ། །དེ་ལ་འདི་སྐད
6b6 ཅེས་བྱ་སྟེ། ཀུན་རྫོབ་དང་ནི་དོན་དམ་སྟེ། །དབྱེ་བ་གཉིས་སུ་ཡང་དག་བཤད། །ཀུན་རྫོབ་འཇིག་རྟེན་པའི་ཆོས། །དོན་དམ་འཇིག་རྟེན་འདས་པའོ། །ཀུན་རྫོབ་ཆོས་ལ་ཞུགས་པ་ཡི། །སེམས་ཅན་ཉོན་མོངས་དབང་དུ་འགྲོ། །དོན་དམ
6b7 ཡོངས་སུ་མ་ཤེས་པས། །འཁོར་བར་ཡུན་རིང་འཁོར་བར་འགྱུར། །ཀུན་རྫོབ་འཇིག་རྟེན་ཆོས་རྣམས་ལ། །མི་འཁས་པ་དག་རྟོག་པར་བྱེད། །ཀུན་ཏུ་རྟོག་པ་དེ་ཡིས་ནི། །སྡུག་བསྔལ་ཉམས་སུ་མྱོང་བར་འགྱུར། །ཇི་ལྟར་སོ་སོའི་སྐྱེ་བོ་ཡི། །
6b8 བྱིས་པས་གྲོལ་ལམ་མི་ཤེས་པས། །མི་ཟད་པའི་སྡུག་བསྔལ་དག་།མང་པོ་རྗེས་སུ་མྱོང་བར་འགྱུར། །གང་དུ་སྲིད་པ་འགག་འགྱུར་བའི། །དོན་དམ་དག་ནི་མི་ཤེས་པས། །སྐྱེ་བ་དང་ནི་འགག་འགྱུར་ཞིང་། །སྐྱེ་མེད་འགྲོ་དང་འོང་བར་འགྱུར། །
iiif viewer powered by OpenSeadragon
